Timotigö Kimbi 1
Polnöŋ Timotigöra Kimbi mutukŋi alök.
Jim-asa-asari
Timoti sepguli azi yaŋgö namŋi Juda ambi aka iwiŋi Grik azi. Yaŋön Eisia prowinsnöŋ mala uruŋi meleŋda Kraistkö alaŋi aka malök. Mewö mala Polgö neŋakŋi aka bauköm waŋgiiga mohotŋe liliköba misin nup memba malohot. Polnöŋ lömbötnöŋ memba et al waŋgibapuköra waimanjat keu bohonŋi karöbut mötmöriba Buŋa Kimbi ki ohoyök.
Waimanjat bohonŋi ketaŋi mi böhi takapulakaŋi. Tosatŋan zioz uruŋe kinda keu goŋgoŋi kusum sohom eŋgiba malgeri, Polnöŋ yeŋgöra aka galöm meme keu köhöikŋi ohoyök. Böhi mieŋön Juda yeŋgöreŋ mötmöt aka gölmegö mötmöt tosatŋi mindirigetka könaŋamŋini loloŋqaloŋ aiga kewö möt nariba jiba ambazip kusum eŋgiba malget: “Gölme aka yuai pakpak ehakzini, mi bölöŋi akza. Miaŋgöra tosatŋan Suepkö buŋa akingö kapaŋ köla mötmöt asa-asambötŋi qainŋi kun qahö buŋa qem aŋguba nenegö dönqizizin aka soŋgo tosatŋi walöŋda awanöm akze ewö, Anutunöŋ mönö keu miaŋgöreŋ qaköba amöt qem eŋgimamgö osima.”
Waimanjat keu bohonŋi kun mi: Denöwö urumeleŋ könagesö galöm köl eŋgiinga törörök Anutugö waikŋi memba möpöseibeak. Polnöŋ miaŋgö qambaŋ keuŋi papianöŋ ohoyök. Mewöŋanök zioz galöm, babafi aka nup meme ambazip tosatŋan denöwö aka malgetka dop köljawi, miaŋgö keu areŋi mi jim asariba ohoyök.
Teteköŋe keu bohonŋi karöbutŋi miaŋgöreŋ Timotigöra goro keu tosatŋi ohoyök. Undumŋi yaŋön mönö denöwö Jisös Kraistkö welenqeqe ölöpŋi aka mötnarip ambazip kambuŋi kambuŋi eŋgöbisiba bauköm eŋgiiga dop kölmawi, miaŋgö goroŋi ohom waŋgiyök.
Buk kiaŋgö bahöŋi bohonŋi 3 mi kewö:
Keu mutukŋi 1.1-2
Ziozgö nup meme yeŋgöreŋ jimkutukutu 1.3–3.16
Timotinöŋ nupŋi memapkö jimkutukutuŋi 4.1–6.21
1
1 Anutu, Amötqeqe Tonini aka Kraist Jisösnöŋ galöm köl neŋgimapkö jörömqöröm al mamböt ak waŋgizini, yetkön Pol nöŋgöra jim kutuba kuŋguba melaim niŋgiyohotka aposol maljal. Kraist Jisösgö jitŋememe mewöŋi aka göbuk keu eraum mötpitköra kimbi ki ohozal.
2 * Apo 16.1O Timoti! Gi urugi meleŋda Jisös möt nariba mötnaripkö nahön sorokni aka maljan. Iwi Anutu aka Kembunini Kraist Jisös, yetkön mönö ak kömumba kalem möriam gihiyohotka luainöŋ malman.
Eŋololoŋ kusum eŋgibepukö galöm meme keu
3 Masedonia prowinsnöŋ anmamgö ahali, nalö miaŋgöreŋ kewö jim kutum gihial, ‘Gi mönö Efesus sitinöŋ toroqeba mala urumeleŋ kambu bauköm eŋgimakŋan. Tosatŋan mötnaripkö keu kembaŋi tosatŋi kusum sohomakzei, mi toroqeba akepuköra galöm mem aŋguba malme.’ Mewö jim kutum eŋgiba malmangöra jial. 4 Tosatŋan bem sambanŋi sambanŋi aka ambösakon yeŋgö qet areŋi areŋi mi teteköŋi qahö eraum mötketka supapköiga aŋgururuk aka keu qeqesi omaŋi asuhui mötmörimakze. Yeŋön uruŋini miaŋgöreŋ ala sohobepuk. Keu sinŋi sinŋi jiji mewöŋi mi qahöpmahöp bauköm eŋgimapmö, Anutugö malmal areŋi mi kewö ahöza, ‘Kunŋan Jisös möt nariba uruŋi meleŋniga yaŋön mönö i amöt qem waŋgiiga letotma.’ Merak mewö ak eŋgimangöra kunbuk uruwahöt keu jim gihizal.
5 Jim kutum gihizali, miaŋgö tohotŋi mi urujöpak. Nöŋön urukalem ahumapköra bim qeba kewö jim tuarim eŋgiba malmangö kuŋgum gihizal: Yeŋön uruŋinan sarakŋi ahömapköra galöm köl aŋgugetka mötmöt bölöŋan mi qahö gwözöŋma. Qahö gwözöŋniga Anutunöŋ saŋep alakzawi, mi urukezapŋinan ölöp möta malme. Mewö mala Kraist törörök möt narigetka Anutunöŋ mönö urukalemŋi uruŋine ali ölöp ahumakŋa. Urujöpak miaŋön sutŋine ahumapkö kapaŋ kölakzal.
6 Tosatŋan Anutugö malmal areŋi mi siŋgiba jaŋjuŋ aka oyoŋdewedewet keu omaŋi omaŋi laŋ jimakze. 7 Yeŋön Anutugö Köna keugö böhi malbingö mötzemö, nanŋinak keugö könaŋi qahö möt asariba mesohol kölayök jimakze. Öne ambazip jeŋine awösamkakak kinda keu laŋlaŋ köhöiba jiba bim qemakze.
8 Anutugö Köna keu miaŋön mönö ölöp sorokŋi akza. Mi könaŋaŋgö dop törörök kusum aŋguba wuataŋgöinga ölöp möhamgöm neŋgimakza, mi mötzin. 9 Anutu Köna keuŋaŋgö könaŋi mönö kewö möt yaköme: Mi ambazip solanŋi diŋdiŋi yeŋgöra aka qahöpmö, Anutunöŋ mi ambazip goŋgoŋi mindiŋgöm eŋgimapköra aka ali ahöza. Tosatŋan goŋgiba kewö ahakze: Iwilele jaubatbat aka keu qeba yaŋgiseŋ qakŋe aum jesöksök ahakze. Aŋgöjörak aka siŋgisöndokŋinambuk mala töndup Anutu nesampurek ak waŋgigetka uruŋini tölöhoba nönöŋgan malje. Iwinamŋini aka tosatŋi eŋguget kömumakze.
10 Serowilin ahakze. Sodom taonöŋ akeri, miaŋgö dop köna oŋgita azi nanŋirök aka ambi nanŋirök amimakze. Ambazip mem bölim eŋgimegöra qeraköba jöhömakze. Keu muneŋ jimakze. Keu jiba jöjöpaŋ keunöŋ jöhöba töndup tilipkömakze. Anutunöŋ ahakmeme diŋdiŋi akingöra Ölöwak Buŋa neŋgiyöhi, mi iŋi waiŋi aka memba miaŋön qetalakze. Anutugö Köna keu miaŋön ambazip mötnaripkö köna diŋdiŋi siŋgimakzei, mönö i mindiŋgöm eŋgimapköra aka ahöza. 11 Anutu, oyaeŋkoyaeŋ Toŋi yaŋön mötnaripkö köna diŋdiŋi mi Buŋa keunöŋ ali ahöza. Nöŋön Ölöwak Buŋaŋi aködamunŋambuk jim sehimamgö möt narim niŋgiba Buŋa keuŋi mi al niŋgiyök. Mewö.
Polnöŋ Kembu kalem möriamŋaŋgöra möpöseiza.
12 Kraist Jisösnöŋ uruni kewöriga nupŋi pöndaŋ memamaŋgö dop nehi dop köliga nupŋi niŋgiiga memakzal. Nup memamgöra kukösum niŋgiba mala kotzawi, miaŋgöra Kembunini möpöseiba maljal. 13 * Apo 8.3; 9.4-5Nöŋön mutuk Jisös mepaiköba alaurupŋi ilita sesewerowero könöpuk ak eŋgiba malal. Mewö malalmö, yuai mi Jisös qahö möt nariba silebile tönpin mala laŋ aka memba malal. Siŋgisöndok mewö aka malalaŋgöra mönö ak kömum niŋgiiga kölöŋaiba letoral.
14 Kembuninan kalem möriamŋi niŋgiba keleŋmaleleŋ mokoiga nöŋgö qakne öŋgöyök. Mewö öŋgöiga mötnaripnan asuhuiga urujöpakö kondotkondot Toŋi Kraist Jisös miwikŋaial. Yambuk qekötahöba kinda urukalemŋi buŋa qem aŋguba ambazip tosatŋi urunan jöpaköm eŋgimakzal.
15 Nöŋön ambazip tosatŋi pakpak eŋgoŋgita siŋgisöndokö ambazip yeŋgö sutŋine ketaŋamŋini aka malal. Mewö malalmö, Kraist Jisösnöŋ siŋgisöndok ambazip amöt qem neŋgimamgöra aka gölmenöŋ erök. Keu kötŋi mi nöŋgöreŋ ölŋambuk ahök. Miaŋgöra keu kötŋi miaŋön mönö pöwöwöm köhöikŋi akza. Mi ambazip körekmakörek möt nariba aŋgön kölbinaŋgö dop akza.
16 Siŋgisöndokö ambazip yeŋgö ketaŋamŋini aka malalmö, Kraist Jisösnöŋ ni kewögöra ak kömum niŋgiyök: Yaŋön nömbuk uruluai qakŋe amöt qem niŋgiba Anutugö uru tandökŋi aukŋe asuhumapkö möt köhöiyök. Nöŋgö könane ambazip tosatŋan Jisös möt narimei, tandökŋi mi yeŋgöra kondel eŋgimamgö mörök. Mi kondel eŋgiiga ölöp amqeba uruŋini meleŋda malmal köhöikŋaŋgö buŋaya akŋe. 17 Ak kömum niŋgiyöhaŋgöra aka Anutu möpöseimakzal. Yaŋön Kiŋ Kembu teteköŋi qahö aka malma. Anutu mohotŋan qahö göröŋ qeiga kaisoŋgolomŋi qahö ehakzin. Nöŋön yaŋgö qetbuŋaŋi nalö dop möpöseibiga teteköŋi qahö aködamunŋambuk aka ahöma. Keu mi ölŋa.
18 O mötnaripkö nahöni Timoti! Mutuk kezapqetok keu tosatŋi göhöra jigeri, keu miaŋön kötöngöm gihiiga ölöp aködamungabuk aka malman. Keu miaŋgö dop kewö jim kutum gihizal: Göŋön mönö malmal sarakŋi malmangöra bim köhöikŋi qeba malman.
19 Bim qeba miaŋgöreŋ mötnaripki sörörauba sohobapuköra mönö töp meman. Urugi köyan köl aŋgunöŋga mötmöt bölöŋan qahö gwözöŋniga Anutunöŋ urukezapnöŋ saŋep alakzawi, mi ölöp möta malman. Ambazip tosatŋan uru köyankölkölŋini mosöta laŋ malgetka mötnaripŋinan löwöriba köhömuŋi aka pömsöm qeyök. Waŋgenöŋ köwet töromnöŋ kuŋguba jömgözawi, mönö miaŋgö dop kumkanjaŋ aka böliget. 20 Mötnaripŋinan pömsöm qeyöhi, yeŋgö sutŋine azi yahöt qetŋiri Himeneus aka Aleksander maljahot. Nanak mindiŋgöm etkimamgö osiba uruŋiri meleŋmahotköra i Satangö böröŋe al etkial. Al etkibiga Satangö kukösumŋi ahakmemeŋiraŋgö dop möta uruŋiran sihimbölögöra löwöriiga meleŋda mepaqepaik kunbuk qahö akahorak. Mewö.