4
Keu muneŋi kusum eŋgigetka eŋololoŋ akza.
Anutugö Uŋaŋan keu kewö jim asariiga törörök möt yaközin: Gölmegö nalöŋan tekömamgö akŋawi, nalö miaŋgöreŋ ambazip keleŋmaleleŋ yeŋön mötnarip mosöta Kembu andö qeba ömewöröme yeŋgö böröŋine geme. Mewö gegetka ömenöŋ sölölöhöba kusum eŋgimakzei, mönö yeŋgöreŋ mötmöt wuataŋgöba eŋololoŋ aka siksauk malme.
Siksauk mi kewö asuhuma: Tosatŋan urumeleŋ silesile aketka Satanöŋ aiwesökŋi uruŋine ain könöpŋambuknöŋ qekötahöba urukezapŋini gwözöŋniga köhömuŋi aiga keu muneŋi laŋ jim sohomakze. Yeŋön ambazip kewö kusum sohom eŋgimakze, ‘Urumeleŋ ambazip eŋön mönö awanöm aŋgömeme kude akŋe aka nene tosatŋi kude nemba malme.’ Mewö kusum sohom eŋgimakzemö, Anutunöŋ nene pakpak mi nembingöra miwikŋaiyök. Mi ambazip Anutu möt nariba keu ölŋi möt yaközini, yaŋön mi kötuetköiga ölöp saiwap jiba nembingöra al neŋgiyök.
Anutunöŋ yuai pakpak miwikŋaiyöhi, mieŋön mönö ölöpŋi akze. Mi andö qebinaŋgö dop qahöpmö, yuai al neŋgimawi, mi ölöp saiwap jiba buŋa qem aŋgubin. Yuai ambazip jeŋine dönqizinŋambuk akawak ewö, mi mönö ölöp Anutugö keu jiba köuluköinga ösumŋan walöŋda dom-amöt qeiga sawölŋi akŋa. Mewö.
Kraist Jisösgö welenqeqe ölöpŋi mi kewö:
Göŋön urumeleŋ ambazip mewö kusum eŋgiba mala Kraist Jisösgöreŋ Buŋa nup meme azi ölöpŋi aka malman. Göŋön Buŋa keu wuataŋgöba mala kotzani, mi tosatŋi kusum eŋgiba nangak mewöŋanök keu ölöpŋi mi aka mötnaripkö qambaŋ keu pakpak oyoŋda mötmöriba miaŋön urugi gumohom aŋguba malman. Gölme ambazipnöŋ bem samban keuŋi oyoŋdewedewet jigetka Anutugö Buŋa keunöŋ böbölohot akŋamgö akzawi, mi mönö yaköriba andö qeman. Mi andö qeba Kraist ewö aka malmangöra urugö kölguliguli aka malman.
Anutunöŋ malmal nalö kewöŋe gölmenöŋ maljini, mi kötuetköm neŋgiiga könaŋgep oyaeŋkoyaeŋ malbingö jöhöjöhö alök. Mönahot aŋgolat mi boromdökŋanök sile guliguligöra bauköm neŋgiba eretŋi akzapmö, urugö kölguliguliŋi mi tandönini bohonŋi akza. Miaŋgöra urugö likepŋi pöndaŋ köl guliba malnöŋga miaŋön mönö yuai pakpak miaŋgöreŋ bohon köla naŋgöm gihimakŋa. Keu jizali, mi ambazip körekŋanök möt aŋgön kölbinaŋgö dop pöwöwöm köhöikŋi akza. Keu pöwöwöm köhöikŋi kun mi kewö,
10 “Anutu malmal Toŋi yaŋön ambazip körek pakpak amöt qem neŋgimamgö mötza. Urunini meleŋda möt narim waŋgimakin ewö, mönö ölŋa amöt qem neŋgimakŋa. Mewö möt narizin. Nini tosatŋan mewö asuhumapköra jörömqöröm mewöŋi Anutu al waŋgiba kinda nupŋi memba silenini qeba aum-mörimakzin.”
11 Ambazip keu miaŋgö dop aka memegöra jim kutuba kusum eŋgiba malman. 12 O Timoti, kunöŋ sepgwölö maljanaŋgöra memba et al gihibapuköra mönö mötnarip ambazip sutŋine silik ölöpŋi kewö kondel eŋgiba malman: Keu ölöpŋanök jiba ahakmeme diŋdiŋi wuataŋgöba ambazip törörök jöpaköm eŋgiba malman. Mötnaripkö kölguliguli pöndaŋ memba Anutugö nupŋi mem sorokönöŋga miaŋgöra möt narim gihiba malme. Mewö sarakŋanök aka menöŋga ambazipnöŋ ölöp göda qem gihigetka malman.
13 Mönö pöndaŋ Urumeleŋgö Buŋa Kimbi mi jegep oyoŋda kapaŋ köla jim asariba könagesö uruŋini miaŋön kuŋguba kusum eŋgiba malman. Nalö sutŋi kiaŋgöreŋ mewö aka malnöŋga nöŋön kabiga dop kölma. 14 Jitŋememe yeŋön böröŋini göhö qake ala köulukögetka Anutugö kezapqetok keu göhöra asuhuiga Anutunöŋ nup memegö mötmöt kalem gihiiga uruge ahözawi, mi kude köyatimanmö, miaŋgö qakŋe nup memba malman. 15 Kude köyatimanmö, Buŋa Kimbi oyoŋda jim asariba kusum eŋgiba malman. Yuai karöbut mi mönö kapaŋ köla jegep köl guliba malman. Taŋqaŋ qahö akŋan ewö, urugahö töhötmöriamŋan mönö qariiga köhöiba awösamkakak akŋani, mi körekŋan ek kutume.
16 O Timoti, mönö nangi uru silegi galöm köl aŋguba urumeleŋ nup törörök kusum eŋgimangöra galöm mem aŋguba malman. Mewö aka malman ewö, mönö nangi oyaeŋkoyaeŋ ak aŋguman aka keugi mörakzei, mi mohotŋe oyaeŋkoyaeŋ ak eŋginöŋga Suepnöŋ öŋgöme. Mewö.