3
Jöhöjöhö areŋ dölökŋaŋgö nup meme ambazip akzin.
Nanak könaŋamni kunbuk könahiba jim ölöwakŋamaŋgöra mötmörize me? Mi qahö. Nup meme ambazip tosatŋan Korint eŋön yeŋgö könaŋini mötmegöra möta jim ölöwak kimbi ohobingö kapaŋ kölakze. Tosatŋan Korint eŋön yeŋgö könaŋini naŋgöba jiba jim ölöwak kimbiŋi kimbiŋi ohomegöra iŋini kuŋgum eŋgimakze. Nöŋön nupni diŋdiŋanök mealaŋgöra jim ölöwak kimbi mewöŋaŋgöra qahö osizal. Anutunöŋ Korint iŋini böröne al eŋgii letota wölböt kötŋi aka nanŋinak nöŋgö jim ölöwak kimbini ewö akze. Anutunöŋ nöŋgö jim ölöwak kimbini mewö ohoiga ambazip körekŋan silik tandökŋini dölökŋi mi eka oyoŋmakze.
* Eks 24.12; Jer 31.33; Eze 11.19; 36.26Iŋini Kraistkö papia kimbi ewö akzei, miaŋön aukŋe ahöza. Mosesnöŋ Köna keuŋi naŋim oŋi iŋk miaŋön köt tafenöŋ ohoyöhi, iŋini miaŋgö dop qahö akzemö, Kraistnöŋ kimbiŋi eŋgö uruŋinaŋgö tafeŋe kewö ohoi kinje: Neŋön nup meinga ölŋi asuhui Kraistnöŋ Anutu malmal köhöikŋi Toŋaŋgö Uŋaŋi uruŋine ali letotket. Ambazipnöŋ nupninaŋgö ölŋi mi eketka miaŋön bauköm eŋgiiga nupninaŋgö könaŋi möt asarimakze.
Kraistpuk qekötahöinga Anutunöŋ nupninaŋgö tandökŋi mötza. Miaŋgöra nup meinga iŋini Kraistkö buŋaŋi akeri, mi ölöp Anutugö jeŋe awösamkakak kinda jizin. Nanini köhököhöi qakŋe nup ölöpŋi ki Anutugö jeŋe membinaŋgö dop akzini, mewö ölöp qahö jibin. Nanini yuai kunöŋ qahö lapingömakzinmö, Anutunöŋ nanŋök inahöba mötmöt neŋgiiga nup ki memakzin.
* Jer 31.31Anutunöŋ inahöba mötmöt neŋgiiga jöhöjöhö areŋ dölökŋaŋgö nup meme ambazip akzin. Mosesgö Köna keuŋaŋgö kulemŋi mohot mohotköra urukönöp akinak ewö, keu miaŋön mönö keunini jim teköiga kömum köhöibinak. Uŋa Töröŋaŋgö nup areŋi jim asariinga yaŋön mem gulim neŋgiiga mal köhöibin. Miaŋgöra Köna keugö areŋi miyök wuataŋgömegöra qahö kapaŋ kölakzinmö, Uŋa Töröŋi möt aŋgön kölmegöra uru kuŋgum eŋgimakzin. Mewö.
Jöhöjöhö areŋ dölökŋaŋgö nupŋi mi aködamunŋambuk.
* Eks 34.29Anutunöŋ Köna keuŋi jiba kulemŋi kötnöŋ möndömgöba ohoyökmö, ambazipnöŋ mi qahö tem kölgetka Anutunöŋ keu miaŋgö dop kewöta likepŋi meleŋ eŋgiiga kömumba köhömuŋi mala kotket. Anutunöŋ mutuk Köna keuŋi neŋgiiga nalö miaŋgöreŋ asakmararaŋan Mosesgö jemesoholŋi qei asariyök. Asakmararaŋ miaŋön waziba ayapkömawaŋgö dop ahökmö, mi töndup Israel ambazipnöŋ jemesoholŋi törörök uba ekingö dop qahö aket. Gwötpuk asariyöhaŋgöra mi osiget. Köna keugö Buŋa areŋ walŋan lök mewö asakmararaŋambuk asuhuyök.
Mewö asuhuyökmö, Uŋa Töröŋan Buŋa areŋ dölökŋi neŋgii miaŋgö asakmararaŋan asuhumawi, miaŋön mönö jöhöjöhö areŋ walŋaŋgö asakmararaŋi oŋgita önöŋi qahö asariba jenini gamugamu ahakŋa. Mutuk Mosesgö Köna keu asuhuba kewöt neŋgiiga miaŋgö dop könöp siagö buŋaya akzin. Buŋa keu mi lök aködamunŋambuk asuhuyök. Miaŋgöra Anutunöŋ keunini kewöta jim teköi solanibini, Buŋa keu miaŋgö aködamunŋan mönö keta bölökŋi akza. Miaŋön jöhöjöhö areŋ walŋaŋgö aködamunŋi mi gwötpuk oŋgita qetbuŋaŋambuk akza.
10 Buŋa nup walŋan mutuk aködamunŋambuk ahökmö, mi Buŋa nup areŋ dölökŋambuk mindiriba kewöringa walŋi miaŋön mönö qetbuŋaŋi qahö akza. Uŋa Töröŋaŋgö nup areŋ miaŋgö aködamunŋan öŋgöŋgöŋi akzawaŋgöra nup areŋ walŋan mönö yuai omaŋi ewö akza.
11 Anutu amötqeqeŋaŋgö köna walŋan lök waziba ayapkömawaŋgö dop ahök. Miaŋön lök asakmararaŋambuk asuhuyök. Miaŋgöra köna dölökŋi teteköŋi qahö ahöm öŋgömawi, miaŋgö asakmararaŋan mönö köna mutukŋaŋgö asakmararaŋi mi önöŋi qahö oŋgita jenini gamugamu ahakza.
12 Jöhöjöhö dölökŋan teteköŋi qahö bauköm neŋgiiga asakmararaŋan asuhumawi, mewö Anutu jörömqöröm al waŋgimakzin. Miaŋgöra keŋgötnini qahöpmahöp möta awösamkakak kinda keu mi kusum eŋgimakzin. 13  * Eks 34.33Mosesnöŋ Israel ambazip asakmararaŋ waziba ayapköyöhi, mi ehibepuköra manjat möta jemesoholŋi opo jahönŋan esuhuyök. Neŋön miaŋgö dop qahö ahakzinmö, Buŋanini aukŋeyök jimakzin.
14 Buŋa walŋaŋgö asakmararaŋi eketmö, uruŋinan töndup gwözöŋni laŋ mala kotket. Nalö kewöŋe mewöyök yuai kunŋan mönö opo jöhan miaŋgö dop Juda ambazip gwötpuk yeŋgö uruŋini gwözöŋni malje. Miaŋgöra Jöhöjöhö Walŋaŋgö Buŋa keuŋi keuŋi oyoŋjei, mieŋgö könaŋini mi törörök qahö möt asarimakze. Uruŋini meleŋda Kraistpuk toroqegetka mewö miaŋönök mönö opo jöhanŋini mi qeköi möt asarime. 15 Nalö kewöŋe mewöyök Mosesgö Köna keuŋi oyoŋgetka yuai kunŋan mönö opo jöhan ewö uruŋini gwözöŋni mötmötŋinan lömbörii malje.
16  * Eks 34.34Mewö maljemö, Buŋa Kimbigö keu kun kewö ahöza, “Mosesnöŋ ‘Kembubuk eraum mötpit,’ jiba opo jöhanŋi mesoholŋeyök qeközapma.” Keu mewö ahöiga yeŋgöreŋök kunŋan uruŋi meleŋda Kembubuk toroqezawi, nalö miaŋgöreŋök mönö yuai opo jöhanŋaŋgö dop mi qeköi Anutugö amötqeqeŋaŋgö könaŋi möt asarima. 17 Keu miaŋön “Kembugöra” jiba mi mönö Kembugö Uŋaŋaŋgöra jiza. Kembugö Uŋa Töröŋan denike yeŋgö uruŋine maljawi, yaŋön mönö siŋgisöndokŋinaŋgö kösöŋi pösariga solanŋi (fri) malje. (Mewö mala solanŋi diŋdiŋi akingöra Köna keu wuataŋgöbingö qahö kapaŋ kölakze.)
18 Miaŋgö dop urunini meleŋninga Kembugö asakmararaŋan körek neŋgö je mesoholnine kuŋguiga bilikbilik aliga jenini qahö esuhuinga ambazipnöŋ neŋgeka Anutugö aködamunŋi qetpuk mi piliknöŋ uba ehekö tandök ehakze. Nini mi qarim sehiba ehakŋeaŋgö dop letorakin. Mewö letota aködamunŋi qetpuk mi qariba asariba Kembugö tandöktandök ahakin. Kembunöŋ Uŋaya akzawi, yaŋgö asakmararaŋan mönö mewö mem letot neŋgimakza. Mewö.

*3:3: Eks 24.12; Jer 31.33; Eze 11.19; 36.26

*3:6: Jer 31.31

*3:7: Eks 34.29

*3:13: Eks 34.33

*3:16: Eks 34.34