1 *Luk 5.29-30Takis tilipqilip aka megeri aka siŋgisöndok ambazip tosatŋi mi jesöŋgöŋan Jisösgö Buŋaŋi mötpingö kaget. 2 Mewö kagetmö, Farisi aka Köna keugö böhi yeŋön Jisösgöra uruŋinan böliiga irikuruk keu kewö jiget, “Azi miaŋön siŋgisöndok ambazip eŋgimemba yembuk tata nene neza.” 3 Mewö jigeraŋgöra Jisösnöŋ dopkeu kun kewö jii mötket,

4 “Eŋgöreŋök kungö lamaurupŋi 100 malgetka mieŋgöreŋök kunŋan sohoba jaŋjuŋ aniga toŋan denöwö akŋa? Yaŋön mönö 99 mi gölme qararaŋkölkölŋe eŋgömosöta anda mohot jaŋjuŋ anöhi, miaŋgö jaruba anda mala miwikŋaiiga teköma. 5 Miwikŋaiba urusösöŋgai aka awötŋe ala kama. 6 Mire kaba alaurupŋi aka tosatŋi kösutŋe malmei, mi eŋgoholi tokogetka kewö jii mötme, ‘Lamani sohoyöhi, mi lök miwikŋaizalaŋgöra mönö nömbuk sösöŋgai akin’ 7 Nöŋön kewö jibi mötme: Miaŋgö dop siŋgisöndok azi mohotŋan uruŋi meleŋmawi, yaŋgöra Suep mire sösöŋgai ketaŋi asuhuma. Ambazip 99 nanŋine jeŋine solanŋi diŋdiŋi aka uruŋini meleŋbingö qahö möta maljei, yeŋgöra sösöŋgai mewöŋi qahö asuhuma.” Mewö.

8 “Mewöyök ambi kunŋan silwö moneŋ kötŋi 10 memba maliga mieŋgöreŋök mohokŋan geba sohoiga denöwö akŋa? Yaŋön mönö kiwa ohotiriba kapaŋ köla miri usuŋda jaruma. Jaruba mala miwikŋaiiga teköma. 9 Mi miwikŋaiba ambi alaurupŋi aka ambi tosatŋi kösutŋe maljei, mi eŋgoholi tokogetka kewö jii mötme, ‘Nöŋgöreŋ soujeŋi mohotŋan sohoyöhi, mi miwikŋaizalaŋgöra mönö nömbuk sösöŋgai aki.’ 10 Miaŋgö dop nöŋön kewö jibi mötme: Siŋgisöndok ambazip kunŋan uruŋi meleŋniga Anutugö garataurupŋi yeŋön miaŋgöra sösöŋgai öŋgöŋgöŋi akŋe.” Mewö.

11 Jisösnöŋ toroqeba kewö jiyök, “Azi kungö nahönyahötŋi yahöt malohot. 12 Munŋan iwiŋaŋgöra kewö jiyök, ‘Iwini, gi mönö moneŋ sukinapki mendeŋda nöŋgö bahöŋi niŋgiman.’ Mewö jiiga öröyuaiŋi pakpak dopŋire mendeŋda etkiyök. 13 Mi etkiiga nahönŋi moröŋan sömaŋi yahöt karöbut mala inap yuaiŋi pakpak mi kölölohoba memba kantri kungen anök. Miaŋgöreŋ anda nanŋi imbi-imbi aka köna ketaŋi ambi yembuk kiam bau ewö söŋaup malmal mala moneŋ inapŋi gil teköyök.

14 “Yuai pakpak gil teköiga bödi (buörö) ketaŋi asuhuba gölme pakpak mi dop kölök. Yaŋön nalö miaŋgöreŋ könahiba öngöpŋi aka osiyök. 15 Osiba kantri miaŋgö toŋi kungöreŋ anda nupköra qesim waŋgiiga melaii yaŋgö bau selŋe geba bau galömŋina malök. 16 Miaŋgöreŋ mali bau yeŋön sokop kötŋi neget eka ‘Ölöp mi nembi gölömni dop kölbawak,’ jiyökmö, mi mewöyök kunŋan qahö waŋgiyök.

17 “Mewö mala uruŋi ahuiga kewö jiyök, ‘Iwinaŋgö nup ambazip wanat awamŋi yeŋön nup megetka söŋgöröŋi eŋgii nene nem timbireŋ aka maljemö, nöŋön kiaŋgöreŋ uzukörörap aka bödi mala kömumamgö akzal. 18 Ni mönö wahöta iwinaŋgöreŋ liliŋgöba anda kewö jibi mötma, ‘Iwini, ni siŋgisöndok memba miaŋön gi aka Suep Toŋi qetal etkiba qetki mem bölial. 19 Miaŋgöra göŋön kunbuk nöŋgöra ‘Nahöni,’ jimanaŋgö dop qahö akzal. Gi ölöp jinöŋga welenqeqega kun akŋam.’

20 “Mewö jiba wahöta iwiŋaŋgöreŋ anök. Anda mala miri dopdowii iwiŋan tikep endu kinda ehi kaiga wösöŋi pöröraköiga ehoriba ösumŋan diŋdiŋgöba anda imbiŋe gili geiga numbuŋi yöhötim nemba ‘Nahöni, owe owe!’ jiyök. 21 Mewö ahökmö, nahönŋan jiyök, ‘Iwini, ni siŋgisöndok memba miaŋön gi aka Suep Toŋi qetal etkiba qetki mem bölial. Miaŋgöra göŋön kunbuk nöŋgöra ‘Nahöni,’ jimanaŋgö dop qahö akzal.’

22 “Mewö jii iwiŋan miaŋgöreŋök welenqeqeurupŋi kewö jii mötket, ‘Iŋini mönö ösumok maluku aködamunŋambuk kun memba kaba löŋgöt waŋgiget. Ila jalö imbiŋe köla meŋölöm waŋgiba köna esu könaŋe löŋgöt waŋgiget. 23 Mewöyök selnöŋ anda bulmakau dömŋi kelökŋambuk kun memba kaba qeba ohogetka nemba sösöŋgai albin. 24 Nahöni ki kömum taköyöhaŋön mönö kunbuk guliba kaza. Yaŋön lök sohoigun Anutunöŋ kunbuk miwikŋaiiga asuhum tiŋgitza.’ Mewö jiiga könahiba sösöŋgai alget.

25 “Sösöŋgai algetmö, datŋan nupnöŋ mala liliŋgöba miri dopdowiba miaŋgöreŋ liŋet gwawet köla unduba söŋgaigeri, miaŋgö kourukŋi mörök. 26 Mi möta welen morö kun qeri kaiga ‘Mi denöwögöra akze?’ jiba qesim waŋgiyök. 27 Qesim waŋgiiga kewö jiyök, ‘Mungan liliŋgöba kaiga iwigan i kunbuk meiga unditundit aiga miaŋgöra jiiga bulmakau dömŋi kelökŋambuk qeba ohoba söŋgaize.’

28 “Mewö jiiga irimŋi seholiiga mire öŋgömamgö tököyök. Tököyökmö, iwiŋan mi möta yaigep eta uruluai keu ösöŋ jiba mölöwörim waŋgiyök. 29 Mölöwörim waŋgiyökmö, yaŋön meleŋda kewö jiyök, ‘Iwini, nöŋön yambu gwötpuk welengi qeba mala jimkutukutugi nalö kunöŋ qahö oŋgita malalmö, töndup göŋön nalö kunöŋ meme (noniŋ) moröŋi kun alaurupni yembuk sösöŋgai albingöra qahö niŋginöŋ. 30 Qahö niŋginöŋmö, nahöngi kiaŋön köna ketaŋi ambi yembuk mala moneŋ inapki ayuhuba kaŋgoriga göŋön mönö yaŋgöra aka jinöŋga bulmakau dömŋi kelökŋambuk qeba ohoze.’

31 “Jiiga iwiŋan kewö jii mörök, ‘Nahöni, gi nalö dop nanambuk malakzan. Miaŋgöra nani buŋani pakpak mi mönö göhö buŋaya mohok akza. 32 Mohok akzapmö, mungi kiaŋön kömum taköyöhaŋön kunbuk guliba kaza. Yaŋön lök sohoiga Anutunöŋ kunbuk miwikŋaiiga asuhum tiŋgitza. Miaŋgöra dölki nene sösöŋgai alinga dop kölja.’ ” Mewö.