1 Jisösnöŋ toroqeba kewö jiyök, “Sardis sitigö zioz kambu yeŋgö pom garataŋinaŋgöra mönö kimbi kewö ohoman,

“Kunöŋ Anutugö uŋa bohonŋi 7 aka seŋgelau 7 mi böröŋe ahöi memba maljawi, yaŋön keu kewö jiza: Nöŋön göhö ahakmemegahö könaŋi möt kutubi kewö ahöza: Göŋön ambazip jeŋine guliba maljanaŋgö qetŋi bisimakzanmö, Anutugö jeŋe köhömuŋi akzan. 2 Miaŋgöra mönö imbigi möta wahötman. Göhö ahakmemegan nöŋgö Anutunaŋgö jeŋe aködamunŋambuk qahö akza. Göhö könaŋamgi kewöta mewö miwikŋaial. Göhö könagesö uruŋe urumeleŋ ambazip tosatŋi kunbuk maljemö, yeŋön mewöyök kömum taköbingö akze. Miaŋgöra göŋön mönö mem köhöim eŋgiba malman.

3 *Mat 24.43-44; Luk 12.39-40; Ind 16.15; Eks 32.32-33; Sum 69.28; Ind 20.12; Mat 10.32; Luk 12.8“Anutugö yuai gihigetka buŋa qem aŋguba mötnöŋi, mi mönö urukönömge jöhöba mötmöriman. Buŋa mi mönö tem köla urugi meleŋman. Guliguli qahö malman ewö, nöŋön mönö yoŋgorö meme ewö ölöŋ kaba asuhumam. Kamamaŋgö aua nalöŋi qahö mötnöŋga keunan mönö zilaŋ qake öŋgöiga lömböt miwikŋaiman. 4 Mewömö, Sardis zioz kambu eŋgö sutŋine ambazip awamdökŋi eŋön opo söröŋini ölöpŋanök galöm kölgetka töwötŋambuk qahö akze. Miaŋgöra yeŋön ölöp maluku tuatŋan sileŋine löŋgöta nömbuk anda kaba malme. Yeŋön mönö mewö aka malmeaŋgö dop akze.

5 “Kunŋan esapesap bölöŋi pakpak oŋgita luhut almawi, yaŋgöra mönö maluku tuat lalamŋi waŋgigetka köla malma. Yaŋgö qetŋi malmal köhöikŋaŋgö buk papianöŋ ohoget ahözawi, nöŋön mi qahö kutumam. Iwinaŋgö jemesoholŋe aŋgoriga Suep garataurupŋan eketka qetŋi ölöp aukŋe jim miwikŋaim eŋgimam.

6 “Eŋgöreŋök kunŋan kezapŋambuknöŋ malja ewö, Uŋa Töröŋan zioz kambuŋi kambuŋi neŋgöra keu jimakzawi, yaŋön mönö mi kezap ala möt kutuma.” Mewö.

7 *Ais 22.22; Job 12.14“Filadelfia sitigö zioz kambu yeŋgö pom garataŋinaŋgöra mönö kimbi kewö ohoman,

“Kunöŋ Azi Töröŋi aka Ölbölŋi aka kiŋ Deiwidkö ki moröŋi memba galöm köla maljawi, yaŋön keu kewö jiza: Yaŋön naŋgu metaliga kunŋan mi köla kiŋi memamgö osima. Yaŋön mi köla jöhöiga kunŋan mi musulmamgö osima. 8 Nöŋön göhö ahakmemegahö könaŋi ölöp möt kutuzal. Alani mötnöŋ, göhö ösumgan eretŋi akzawi, mi mötzal. Eretŋi akzapmö, göŋön mönö nöŋgö Buŋa keuni tem köla könani wuataŋgöba qetni qahö qaŋ köla malnöŋ. Miaŋgöra nöŋön naŋgu kun wösöge metalbiga kunŋan mi kölmamgö osima.

9 *Ais 49.23; 60.14; 43.4“Mötnöŋ, kambu kun yeŋön ‘Köuluk mirininambuk akzin,’ jiba aiakaŋinan Satan möpöseimakze. Juda ambazip qahö aka töndup qetŋini mewö qeta muneŋ jimakze. Nöŋön ambazip mi kuŋgum eŋgibiga göhö könaŋamgi möt asarime. Mi möt asariba kaba göhö könage sipköba eta jöpaköm gihimakzali, mi aukŋe jim miwikŋaime. 10 Nöŋön kapaŋ köla lömböt möta mökösöŋda kin köhöimangö jiali, göŋön nöŋgö jimkutukutuni mi aŋgön köla wuataŋgöba malnöŋ. Miaŋgöra nöŋön mewöyök gi kewö aŋgön köl gihimam: Wahöjaliŋ nalö tandökŋi kun kaba kantriŋi kantriŋi dop köla gölmenöŋ mal anjei, mi esapesapnöŋ al eŋgima. Nalö miaŋön kam kuŋguiga nöŋön gi wahöjaliŋ miaŋgöreŋök meköba bohongi jöhömam.

11 “Nöŋön mönö zilaŋ liliŋgöba kamam. Kunŋan utum gihiba ila jalö memeŋe luhut al gihibapuköra mönö urugö inap ahöm gihizawi, mi mönö töp memba malnöŋga qahö sohoba kahaimök ahöma. 12 *Ind 21.2; Ais 62.2; 65.15Kunŋan esapesap bölöŋi pakpak oŋgita luhut almawi, nöŋön mönö i waŋgita nöŋgö Anutunaŋgö möpömöpösei jike (tempöl) uruŋe kuŋgubiga tandöŋi akŋa aka nalö kunöŋ mi kunbuk qahö mosötma. Miaŋgöreŋ maliga sileŋe nani Anutunaŋgö qetŋi, Anutugö sitiŋaŋgö qetŋi aka nani qetni dölökŋi qet karöbut mi ohomam. Anutunan Jerusalem sitiŋi dölökŋi mi nanŋi mire euyaŋgöreŋ ali ahözawi, miaŋön Suepnöhök eta gölmenöŋ asuhuma.

13 “Eŋgöreŋök kunŋan kezapŋambuknöŋ malja ewö, Uŋa Töröŋan zioz kambuŋi kambuŋi neŋgöra keu jimakzawi, yaŋön mönö mi kezap ala möt kutuma.” Mewö.

14 *Qam 8.22“Laodisia sitigö zioz kambu yeŋgö pom garataŋinaŋgöra mönö kimbi kewö ohoman,

“Kun qetŋi Amen. Yaŋön Anutugö keuŋi pöndaŋ naŋgöba Dangunu ölbölŋi akza. Anutu bauköiga yuai pakpak miwikŋaiyohotka galöm kölakzawi, yaŋön keu kewö jiza: 15 Nöŋön göhö ahakmemegahö könaŋi möt kutubi kewö akza: Urugi qahö amöriza aka nöŋgö könöp bölamnan uruge qahö jemakza. O urugan amöribawak me könöwibawak, miaŋön mötpi dop kölbawakmö, jöŋaŋe malnöŋga qahö dop kölja.

16 “Kun me kun dop kölbawakmö, urugan borom kun könöpkönöp aiga könöpkan qahö jezawi me uruamöt qahö akzani, mi qahö dop kölja. Könöp aka amöt sutŋire uruyahötnöŋ laŋ maljanaŋgöra mönö numbuneyök söwötköm gihibi geman. 17 Nangi silegi mem öŋgöba kewö jimakzan: Nöŋön azi kindiŋbirik qetbuŋanambuk akzal. Sukinap mem sehiba dopne miwikŋaizal. Siyoŋsayoŋi qahö mala yuai kungöra qahö osizal. Mewö jimakzanmö, könaŋamgi ölŋi qahö möt kutuzani, mi kewö: Göŋön mönö kumkanjam aka tapötkokorok (dabökokorok) malnöŋga tosatŋan wösömötmöt ak gihimakze. Wanapŋi mala jegi gömöliiga tiktauk sile aukŋe malakzan.

18 “Miaŋgöra qambaŋ keu kewö gihizal: Göŋön nöŋgöreŋök yuai karöbut ki söŋgöröŋi meman: Azi kindiŋbirik qetbuŋagabuk akŋangöra mönö goul könöpnöŋ delasi ohoba gödöwörötŋi mendeŋget sösönihiba eta qahöwahöhi, mi mönö bohonŋi meman. Sile aukŋe malakzani, miaŋgö gamuŋi közambötmangöra mönö maluku tuatŋi bohonŋi memba löŋgötman. Jegi gömölizawi, miaŋgöra mönö jepisik kelök mi bohonŋi memba jegi törörök umangöra miriman. 19 *Qam 3.12; Hib 12.6Nöŋön wölböt alaurupni jöpaköm eŋgimakzali, mi körek bölöŋamŋinaŋgöra tembula jim eŋgiba mindiŋqindiŋ ak eŋgimakzal. Ölöwakŋegöra mewö ahakzal. Miaŋgöra gi mönö jaulalaŋ mosöta urugi meleŋda siŋgisöndoki andö qeba malman.

20 “Mötnöŋ, nöŋön naŋgunöŋ qeba kinjal. Kunŋan nöŋgö keu imbini möta uru naŋguŋi musulmawi, nöŋön mönö yaŋgö miri uruŋe öŋgöba yambuk tatpi yaŋön nömbuk köisirik tata mohotŋe nene nembit.

21 “Nöŋön esapesap bölöŋi pakpak oŋgita luhut ala Iwinan noaŋgiri yaŋgö jakömbuak dumŋe eta qöhöröŋe tatzal. Miaŋgö dop kunŋan esapesap bölöŋi pakpak oŋgita luhut almawi, nöŋön mönö i waŋgitpiga nöŋgö jakömbuak dumne eta qöhöröŋne tatma.

22 “Eŋgöreŋök kunŋan kezapŋambuknöŋ malja ewö, Uŋa Töröŋan zioz kambuŋi kambuŋi neŋgöra keu jimakzawi, yaŋön mönö mi kezap ala möt kutuma.” Mewö.