1 Lakea a maki dagi hateka a ngaru mu gu ratea i maea: Mu nana torea a Vure ge kori e huriki a bakovi a ngatavine, mu vasileki ne huriki, mu kavurikea a Vure na tahuna i kori e huriki. 2 E huriki a hariki, e huriki a bakovi dagi, ria ranga mu vasileki mavonga ne ria, ri gi matakari kamumu hita, si gi made madoru na nivalemu, si gi muri mai a Vure, si gi togo e huriki na maki lobo si rata. 3 Ra nivasileki maea i kamumu na matana Vure, ra viri i korimule hita. 4 I ngaru ni korimule e huriki lobo, ri gi lohoka vona a ngava muholi, 5 a vuhuna i uka tabu tara Vure. A Vure ia kikeri kunana. A bakovi ala taku kunana i rata e huriki ri gi made na nivalemu turana a Vure. Ra bakovi iea e Isu Kristo. 6 *Rom 3:29-30; Gal 1:4I mate na ningaru vona, ge konamule e huriki. Ra ngava nga, a Vure i ngaru si gi vakalongo e huriki vona ngane. 7 *Apo 9:15; Gal 2:7-8; 2Tim 1:11A Vure i vulaki iau ge iau a apostolo vona, ga vakalongo a ngava nga, ga tovo e huriki a kabu i uka ma ria a Iuda, ri gi luhoi torea e Kristo, ri gi lohoka vona a ngava muholi. Iau a ta muholi, i uka ma a tatami.

8 I mavonga, a ngaru e huriki a bakovi na Vure na tanga lobo ri gi vasileki vakaroro. Na tahuna ri toto rike a limane ria, ri gi luhoi mule a narone ria. Nahea ri gi hini hate, nahea ri gi vahehe.

9 *1Pe 3:3-5E huriki a ngatavine, nahea ri gi rodo a maki ni rata e huriki a bakovi ri gi matanono ria. Ri gi rodo kunana a maki i kara a ngatavine. Nahea ri gi bagetu hateka. Nahea ri gi huraki a gogo, nahea ri gi rodo a maki ge rike hateka a mapana. 10 *1Tim 5:10E huriki a ngatavine ri ngaru ni muri mai a nitana Vure, ri gi rata a naro kamumu. A naro kamumu, a bagetua ne ria.

11 Na tahuna e huriki a ngatavine ri longo a vinara, ri gi made madoru, ri gi longo kamumu a ngava, ri gi ramai kunana. 12 *1Ko 14:34Nahea tara ngatavine ge muga, o ge tovo e huriki a bakovi. Na tahuna mu vapopo, e huriki a ngatavine ri gi vulai ri gi longo kunana a ngava, 13 *Vuh 2:7,21-22; 1Ko 11:8-9a vuhuna a Vure i rata mugea e Adam, muri i ratea e Eva. 14 *2Ko 11:3Pali e Satan i uka ma i tamia e Adam. I tamia e Eva, lakea e Eva i longotaroa a Vure. 15 Pali a leho ne huriki a ngatavine, ni poda a koma. Na tahuna ri pesi tora ni luhoi torea e Kristo, ri ngaru e huriki, ri laho malamala, ri muri mai a naro i kara ria, bara i korimule ria a Vure.