1 *1Ko 4:21I mavonga, a koi ni gosi tabu mua, ga vakamadihi tabu mua. 2 Iau bara vakamadihi mua, mu gu vakapitei navai iau? A vakamadihi pali mua. 3 Pali a ngava a here muga, a here mu gu pulo a vilone mua i uka ma mu gu habi a nimadihi nau. Mua kunana a viri bara mu vakapitei iau. Pali mua bara mu ramai a ngava a here na raukea iea, bara mu vivi, lakea iau tara bara vivi. 4 *Apo 20:31Na tahuna a herea a raukea muga, i lege hateka a lohogu, a tangi. Iau a here lakene, i uka ma a ngaru ni vakamadihi mua. A here lakene, mu gu lohoka vona, iau a ngaru hateka mua.

5 Ra bakovi i ratea a maregoa iea, i uka ma i vakamarego iau kunana. Mua ranga, i vakamarego mua. Pali a koi ni rata hateka a ngava vona. 6 A nimadihi mua ala kupo mu habia vona a bakovi iea, i kara ia pali. 7 Ngane mu longo kaburungi a naro hale vona, mu lukea, ma ge dodo hateka, ge rihate. 8 Na naro iea kunana, a ngaru hateka mu gu vakasiri tabu ia, mu ngaru hateka ia. 9 I muga a here lakene mua, a ngaru ni toni mua, mu gu longototo a ngavagu lobo, o ge uka. 10 E rei a viri mu lohopile a maregoa vona, iau tara a lohopile. Ge muholi ge tahoka a maregoa i rata virihi iau vona, na rane Kristo, a lohopile a naro hale vona, a vuhuna a ngaru mua. 11 *Luk 22:31A rata mavonga, e Satan i uka ma ge tami hita. I uka ma si manga vona a narona.

12 *Apo 14:27; 1Ko 16:9Na tahuna a bele o Troas*E Troas a tanga dagi tabukoi na dari. I tabuli na tabeke ne Asia, ra provins tara ne Rom. ta ga vakalongo e huriki vonga na Velenga Kamumu ne Kristo, a masia e Bakovi Dagi i ratea pali a dalagu, ga ratea a leho vona. 13 *Apo 20:1Pali i uka ma a hataki kamumu, a vuhuna i uka ma a matavisia vonga a turagu, e Titus.†E Titus i leho turane Paulus, i manga e Timoti tara i leho turana. Ni here vona na buk nga: 2 Korin, Galesia, 2 Timoti, Titus. A buk ne Titus, e Paulus i herea i lakea ne Titus. Lakea a pe e huriki a Troas, a valai koea o Masedonia.

14 Pali iau a kavurike hatekea a Vure. Mi rihi e Kristo, a Vure i tuli mia na matane huriki lobo, mi manga a vora­kato vona i lakavu na vabinga.‡E Paulus i taki virihi a narone huriki a ubu ne Rom. Na tahuna ri mulangi na vabinga dagi, bara ri hamule o Rom, ri dili na tanga. A ubu bara i muga ne huriki a nugumaheto vona, turana e huriki a vorakato ri lakavu na vabinga. I rudu tala mia, mi vakalongo lae a Velenga Kamumu, i manga a pokona havu mangisipa i huli lae. 15 Si manga a havu mangisipa e Kristo i habi lakea na Vure. A mangine hita i huli lae ne huriki a Vure i korimule ria, i huli lae ne huriki ri velu. 16 *Luk 2:34; 2Ko 3:5-6Na tahuna e huriki a Vure i korimule ria ri burongi, i manginoro, a vuhuna i vakasiri ria ri gi mahuri vakaroro. Pali na tahuna e huriki ri velu ri burongi, i mavuru, a vuhuna i vakasiri ria bara ri vurua. E rei i kara ni ratea a leho iea? 17 E huriki ranga ri vara e huriki na nitana Vure, ri ngaru ri gi bole a moni vona. Pali i uka ma a rata mavonga. A Vure i rudu iau, lakea a vara e huriki na naro muholi na matana Vure, manga a vora ne Kristo.