1 “Mua o huriki a tata mai, a turagu mai, mu longo valai, iau a hehe vona a naro mu rata virihi iau vona.”

2 Na tahuna ri longoa i ta na nita Hibru ri vulai liu.

Lakea e Paulus i ta maea, 3 *Apo 5:34“Iau a Iuda. Ni poda iau na tanga e Tarsus, na robo e Silisia. A koru rike koea na tanga dagi. E Gamaliel i tovo iau na vinara ne huriki a gare ne hita. A habi a hategu ni rata e leho na Vure, i manga mua. 4 *Apo 8:3Iau hosi a ratapile e huriki ri muri mai a dala ne Isu. I ranga ne ria ni rabalaki. A lakavu e huriki a bakovi a ngatavine, a voro dili ria na bavi. 5 Mu nanea ra prister dagi turana e huriki a gare ne huriki a Iuda, bara ri vakalongo mua. Ri habia nau a raukea ga habia ne huriki a kabu kabu na Iuda o Damaskus. A lokovonga ta ga lakavu e huriki a tara ne Kristo, ga turari valai ria o Ierusalem, ni gi vakamadihi.

6 “A rike na hos, a nunu sike o Damaskus. Na kuru haro, tabukoi ga bele, lakea a nipara dagi i para valai na hunu, i parai iau. 7 A boru puru, a longoa a lohona viri i ta valai nau, i ta maea, ‘Saulus, Saulus! I navai o vakamadihi iau?’

8 “Lakea a nana, ‘Bakovi Dagi, ioe e rei?’

“I koli, i ta maea, ‘Iau e Isu o Nasaret, ra o vakamadihi iau.’ 9 E huriki ri laho turagu ri masia a nipara, pali i uka ma ri longokilalea a lohona viri miri vata.

10 “Muri a nana tabua, ‘Bakovi Dagi, a ra ga ratea?’

“E Bakovi Dagi i koli i ta maea, ‘O pesi rike o lakea o Damaskus. I vonga bara ni taki ioe vona a maki a ngaru go ratea.’ 11 A kepa, a vuhuna a nipara i para dagi hateka, lakea e huriki a turagu ri nugua a limagu, ri tuli sike iau o Damaskus.

12 “A bakovi tara i made vonga, a rana e Ananias, i valai ge matai iau. A bakovi iea, a bakovi ni kavurikea a Vure, ni ramai a vinara ne Moses. E huriki a Iuda ri made vonga ri togoa. 13 I valai, i pesi na dahagu, i ta maea, ‘O turagu, o Saulus o matapara!’ Na tahuna iea kunana a matapara tabu.

14 “Muri i taki iau, i ta maea, ‘A Vure ne huriki a gare ne hita i vulaki ioe go lohoka vona a ningaru vona, go masia a Viri Malamala,*A Viri Malamala, a rana tara e Isu. go longo a nitana. 15 I ngaru mavonga, a vuhuna ioe go vakalongo e huriki lobo na maki o matai, o longo. 16 Pali ngane a ra o davea? O pesi rike, o luhoi torea a rana, ni gi vahilolo vuroki a naro hale vomu.’

17 “Muri, na tahuna a hamule lakea o Ierusalem, a vasileki na roho na Vure, a masia na vuregu tara maki. 18 *Apo 9:29-30A masia e Bakovi Dagi i ta turagu, i ta maea, ‘O malaviriri! Ngane kunana o pea e Ierusalem o vano, a vuhuna e huriki koea ri marikoi ni longo ioe go vakalongo a nitagu koea.’

19 *Apo 8:3; 26:9-11“Lakea a koli, a ta maea, ‘Bakovi Dagi, e huriki a bakovi nga ri lohoka vona iau a laho pagepolo vano na maka roho na vaponga, a lakavu, a ru dili na bavi, a ubi e huriki ri luhoi tora ioe. 20 *Apo 8:1Ri lohoka vona a do rike e huriki na tahuna ri rabalakia a vora vomu e Stepan, a matakari a maka varakia ne huriki ri padimatea na kedo.’

21 *Apo 9:15“Muri e Bakovi Dagi i taki iau i ta maea, ‘O vano ngane, ga rudu basi ioe, go lakea ne huriki a viri i uka ma ria a Iuda.’ ”

22 I muga e huriki a Iuda nga ri made madoru, ri longo a ngavane Paulus. Pali na tahuna i taki a Vure i rudua ge lakea ne huriki i uka ma ria a Iuda, ri magulu rike lobo, ri ta maea, “Mu rabalakia! A bakovi iea i uka ma i kara ge made na malala!”

23 Ri magulu taku, ri kali tala a varakia ne ria, ri voro lae, ri voro rike viliha a habulo. 24 Lakea a ubu i taki e huriki a nugumaheto ri gi turaria e Paulus ge lakea na roho ne ria. I taki ria ri gi lagua, ri gi nanea vona e huriki, i navai i madihi a hatene ria, ri ta hateka maia. 25 *Apo 16:37Pali e Paulus, na tahuna ri kolotatea ta ri gi lagua, i nanea a nugumaheto tara, i ta maea, “Iau a tahotanga ne Rom. I uka ma mu pelekado iau ma. Ra hini mu gu lagu iau vona, a vinara ne mua i ta navai?”

26 Na tahuna a nugumaheto i longoa a nitana, i lakea na ubu, i vakalongoa. Lakea i nana, “A ra go ratea ngane? A bakovi iea, ia a tahotanga o Rom.”

27 Lakea a ubu i lakea ne Paulus, i nanea, “O vakalongo iau ngane, i muholi ioe a tahotanga o Rom?”

E Paulus i koli i ta maea, “I muholi, iau a tahotanga.”

28 Lakea a matakari ne huriki a nugumaheto i ta maea, “Iau a voro a moni dagi ri longo nau, a made manga a tahotanga ngane.”

E Paulus i koli, i ta maea, “Pali iau, na tahuna e nana i poda iau, iau a tahotanga.”

29 *Apo 16:38Na tahuna e Paulus i ta mavonga e huriki a bakovi ta ri gi lagua, ri karuku hamule. A ubu tara i mangenge, a vuhuna i kolotatea na sen e Paulus, re Paulus, a tahotanga o Rom.

30 Na parava muri a ubu i ngaru ni lohoka vona a vuhuna a rongova, i navai e huriki a Iuda ri padi virihi e Paulus na ngava. Lakea i gale palupu e huriki a prister dagi, a tara na vaponga ne huriki a Iuda ri gi vapopo. Muri i puga vuroki a sen ni kolotata e Paulus vona, i turari talea, i vakapesia na matane huriki ri vapopo.