1 E Moses i ta tabu i ta maea, “Na tahuna mu masia a podana viri ni rabalaki, i tabuli na malala e BAKOVI DAGI ta ge habia ne mua, i uka ma mu lohoka vona e rei a viri i rabalakia, 2 a naro mu ratea ge maea. E huriki a gare, a mari ni pelekado a ngava, ri gi vano ri gi masia a maravana a hini i tabuli vona, i basi o i tabukoi na tanga. 3 Muri e huriki a gare na tanga iea a poda i tabuli tabukoi vona, ri gi vulakia tara bulmakau a kinana karaba i uka ma ni rata a leho vona ma. 4 Ri gi bole puru na naru i uka ma i mara kilala. Na tabekena malala i uka ma ni rata a hania vona ma, ni gi ubiputu vonga a lohona bulmakau. 5 E huriki a prister na kabu ne Levi, ria ranga ri gi puru vona a hini nga, a vuhuna ria ranga ri tahoka a leho ni longo a nivapelekado na tahuna a bakovi tara i ubia a bakovi tara. E BAKOVI DAGI a Vure ne mua i ru ria ri gi rata a leho vona, ri gi gamai e huriki. 6 E huriki a gare na tanga i pesi tabukoi hateka na hini i tabuli vona a poda, ri gi vahilolo a limane ria polomeli na bulmakau, 7 ri gi ta maea, ‘Mia i uka ma mi rabalakia a bakovi iea. I uka ma mi lohoka vona e rei i ratea a rabu iea. 8 O BAKOVI DAGI, o puga vuroki a naro hale ne mia a Israel, ra mia e huriki o korimule. Ra bakovi iea i uka ngava. Ni rabalaki tavula i mate. Naha ni kau virihi mia, ma mi gi rare vona a marego na bakovi ni rabalaki tavula.’ 9 Mua bara mu rata mavonga, e BAKOVI DAGI i uka ma ge kau virihi mua, ma mu gu rare vona a maregoa na bakovi ni rabalaki.

10 “Na tahuna e BAKOVI DAGI a Vure ne mua i tuhori mua, mu mulangi na vabinga, mu lakavu ranga pile, 11 muri a bakovi tara ne mua ge ngarua tara ngatavine i mata kamumu ne ria ge parangi vona, ge rata maea. 12 A bakovi iea ge bolea a ngatavine ge lakea na ruma vona, ge pali vuroki lobo a vuna, ge pisi a tagulana limana, 13 ge kuloi a maka varakia vona. A ngatavine ge made na ruma vona ge taringi e tamana e kinana na keva ge taku, muri ge parangi vona. 14 Muri na tahuna i uka ma i ngaru tabua, ge tonoa ge vano, i uka ma ge ia a vorakato tabu, a vuhuna i turaria i mahita turana. Nahea ge luhoia a ngatavine iea ga vorakato ge matataroa tara bakovi ge konea.

15 “Na tahuna a bakovi i parangi na ngatavine i rua, bara i ngaru hatekea tara, pali a viri tara i uka ma ge ngaru hatekea. Muri ru singou ru poda, pali ra ngatavine i uka ma i ngaru hatekea i poda mugea a bakovi a tabua vona, muri e girihina tara i podea a koma bakovi. 16 Na tahuna a bakovi i ngaru ni veru a maka mahala vona, nahea ge habi a mahala vona lakea na tuna ngatavine i ngaru hatekea. 17 Ge habi balaka rua ne tuna a tabua a maka mahala, ge manga ne huriki a tabua ri bole bala. I muholi ngi e kinana a koma a tabua, i uka ma a ngatavine i ngaru hatekea, pali ra koma iea a tabua, a bakovi iea i vakabelea, bara i bole a maka mahala na tabua.

18 “Na tahuna a bakovi i tahoka e tuna a bakovi, pali a koma iea i tagege i longotaro vakaroro a ngava ne tamana, ne kinana, lakea ru lagua, pali i uka ma i hataki, 19 e tamana e kinana ru gu lakea na tanga, ru gu taki tala ne huriki a gare. 20 Ru gu taki e huriki a gare ru gu ta maea, ‘E tune maria i putungingi, i longotaro a ngava, i uka ma i longo mai a ngava miri taki. I ninu hateka, i vuroki tavula a maka moni maria.’ 21 Muri e huriki na tanga ri gi padia na kedo ge mate. Ge vakasiri e huriki, nahea ri gi ratea a naro hale maea na kurukurune ria. E huriki a Israel bara ri longoa a velenga na maki i bele, bara ri mangenge.

22 “Na tahuna a bakovi tara i rata a naro hale dagi, muri ni rabalaki, ni vakatavore na kai a podana, 23 *Gal 3:13a podana nahea ge tavore mavonga na rodo ge palala tahoa a hini. A podana ni gi tanu na parava iea kunana, a vuhuna a Vure i rudurahea a bakovi ni vakatavore na kai. Mua i uka ma mu tanu malaviriria a podana, a malala e BAKOVI DAGI a Vure ne mua i habia ne mua bara i muto.”