1 A ngava nga e BAKOVI DAGI i taki e Moses vona ge vakalongo e huriki a Israel na robo e Moab. I hudoa a ngava dagi i ratea ne ria na lolo e Sinai.

2 E Moses i gale palupu e huriki a Israel i taki maea ria, “Mu matai pali a maka maki e BAKOVI DAGI i rata virihi ne Parao, a hariki o Egipto, turana e huriki a bolekori vona, a robo vona. 3 Mu matai a maka nitoni dagi, a nivakasiri, a niturutu dagi i rata. 4 Pali e BAKOVI DAGI i uka ma i rata mua mu gu lohoka vona a vuhuna a maka naro nga, i uka ma i rata mua mu gu matapara, i uka ma i rata mua mu gu longokilala a ngava, mu made mavonga i valai i harena mona. 5 E BAKOVI DAGI i ta maea, ‘Na pida i ravulu va a tuli polo mua na tabeke i ngeki, a maka varakia a vahapolo ne mua i uka ma ri matutu. 6 Mu bala a bret, a vain, a naru vagole, pali a matakari kamumu mua, mu gu matakilaka vona iau kunana e BAKOVI DAGI, a Vure ne mua.’

7 *Gi 21:21-35 “Na tahuna si bele vona a tanga iea, a hariki e Sihon o Hesbon, a hariki e Og o Basan, ru valai ru gu vaubi turane hita. Pali si rangi ria na vabinga, 8 *Gi 32:33si bolea a malala ne ria, si veru ne huriki a kabu ne Reuben, a kabu ne Gad, a kalavana kabu ne Manase. 9 I mavonga mu ramaia a nita na ngava dagi iea, a maki mu rata bara ri bele kamumu.

10 “Ngane mu pesi na matane BAKOVI DAGI a Vure ne mua. Mua o huriki a matakari, a gare, a bolekori, a bakovi 11 turane huriki e girihine mua e tune mua, e huriki a viri basi ri made koea ri popo a maka kai, ri kiru a naru ne mua, 12 ngane mu made koea mu gu bolea a ngava dagi karaba, e BAKOVI DAGI a Vure ne mua i ratea ne mua. Mu ta muholi mu gu ramaia a ngava dagi iea. 13 Bara i mavonga e BAKOVI DAGI bara i rata mua, mua e huriki a tara vona, ia ge ia a Vure ne mua, i manga a ngava i ta muholi vona ne mua, ne huriki a gare ne mua e Abraham, e Isak, e Iakop. 14-15 Ra hita si pesi mona koea, a Vure i uka ma i rata virihi kunana hita vona ra ngava dagi iea. I uka, e huriki a hamone hita muri ma ranga i rata virihi ria vona. Hita lobo si gi ta muholi ni ramaia a ngava dagi iea.

16 “Mu luhoi mule mua, mu made navai hosi o Egipto. Mu luhoi mule a maka maki mu matai na tahuna mu polokudu a malala ne huriki a bakovi. 17 Mu matai a maka vure ni kau na kai, na kedo, na gol, na silva. Ra maka vure nga, a maki hale hateka. 18 *Hib 12:15Mu matadoko, nahea tara bakovi, a ngatavine, a kabu ge ngalahere ne BAKOVI DAGI a Vure ne hita, ge kavurike a maka vure ne huriki na robo basi. Naha ni ratea a naro iea. Ra naro iea i manga a kana lubo i tuvu rike vona a tuvuna, muri bara i ratapile e huriki.

19 “Mua lobo mu matadoko, nahea tara viri i pesi mona koea ge longoa a nita tora a vakalongo mua vona, i luhoi ge kara ni polo lele vona ra ngava dagi a vakalongo, ra naro maea bara i rata mua mu bole a vuranga, turane huriki a viri kamumu, e huriki a viri hale. 20 E BAKOVI DAGI i uka ma ge puga vuroki a naro hale na bakovi maea. A Vure bara i madihi a hatena vona, i manga a kanono i nono i kara hateka. Ra maki hale a puhu iea i taki, bara ri bele vona, i vano i harena na tahuna e BAKOVI DAGI i vakalobo liu ia. 21 E BAKOVI DAGI bara i bole talea na kabu ne Israel a bakovi iea i ratapilea, i muri mai a ngava i taki na puhu na vinara, ne huriki ri longotaro a ngava dagi vona.

22 “Muri e huriki a hamone mua turane huriki na robo basi, ri matai a maka maki hale, a maregoa dagi e BAKOVI DAGI i rata i bele na robo ne mua. 23 *Vuh 19:24-25A maka hania bara ri hale ri tabuli tavula. A maka maki ni kani bara i dili ne ria a mami a bega, i uka ma ri gi koru. A maka varili ranga i uka ma ri gi gaga vona a malala iea. A robo ne mua bara i manga e Sodoma, e Gomora, e Adma, e Seboim. Ra tanga nga e BAKOVI DAGI i ratapile hosi na tahuna i madihi a hatena ne huriki ri rata a naro hale. 24 E huriki na tabeke lobo na malala bara ri nana viliha ri ta maea, ‘I navai e BAKOVI DAGI i rata maea a robo ne ria? I navai i madihi hateka a hatena?’

25 “E huriki bara ri koli ri ta maea, ‘A vuhuna ri ngalahere vona a ngava dagi e BAKOVI DAGI a Vure i ratea ne huriki a gare ne ria, na tahuna i bole tala ria o Egipto i tuli valai ria koea.’ 26 Ri kavurike a maka vure ranga. Ra maka vure i uka ma ri kavurike hosi, e BAKOVI DAGI i hatekakari ria nahea ri gi kavurike a maka maki maea. 27 I mavonga, lakea e BAKOVI DAGI i madihi a hatena, i rata a maka maki hale i tabuli na puhu, i bele na robo ne ria. 28 E BAKOVI DAGI i tahoka a rongova dagi ne ria, lakea i lili tala ria na malala ne ria, i rudu ria lakea na tanga tebi. Mona ranga ri made maea kunana.

29 “A maki kapiloho ne vona kunana e BAKOVI DAGI a Vure ne hita, pali a maki i puka talea ne hita ra vinara, lakea hita lobo turane huriki a hamone hita si gi ramai a nitana vinara vakaroro.”