1 Muri e BAKOVI DAGI i takia e Moses, 2 “O taki e huriki a Israel ri gi hamule, ri gi rata a mada tabukoi na tanga e Pihahirot. Ra tanga iea i pesi na kurukuruna tanga e Migdol, a Dari Vururu, tabukoi na tanga e Balsepon. 3 E Parao bara i luhoi e huriki a Israel ri ruru na tabeke i ngeki, i uka hini ri gi lakea vona. 4 Iau ga ratea e Parao ge madihi a hatena ge lili ria. Pali iau bara ratapilea turana a tara na vabinga vona, ga vakadagia a ragu na maki a ratea vona. Muri e huriki a Egipto bara ri lohoka vona, iau kunana e BAKOVI DAGI.” E huriki a Israel ri longototoa a nitane Bakovi Dagi, ri hamule.

5 Na tahuna e Parao ni vakalongo ne huriki a Israel ri ha, e Parao turane huriki a bolekori vona ri pulo a niluhoi ne ria, ri deke, ri ta maea, “I navai si matataro e huriki a Israel ri vano? Ngane i uka viri ge leho ne hita.” 6 Lakea e Parao i bolea a karis vona, i gale palupu a tara na vabinga vona. 7 I vulaki a maka vagana karis i 600 ne Egipto, turane huriki ri vakanunu ria. 8 E BAKOVI DAGI i ratea e Parao a hariki o Egipto i gigitora, i nunu muri ne huriki a Israel, i matakana ria. Pali e huriki a Israel ri lohoka vona pali, ri mulangi, ri vivi ri vano. 9 A tara na vabinga ne Egipto turana a maka hos a karis, ri nunu muri ne huriki a Israel. Ri pakarau ria na tahuna ri malo na dahana Dari Vururu, tabukoi na tanga e Pihahirot e Balsepon.

10 Na tahuna e Parao turana a tara na vabinga vona ri valai tabukoi, e huriki a Israel ri matai ria, ri mangenge hateka, ri galea e BAKOVI DAGI ge tuhori ria. 11 Lakea ri tahatea e Moses, “I navai o tuli valai mia koea na tabeke i ngeki? O luhoi e huriki a Egipto ri uka a hini ri gi tanu e huriki ri mate vona, o bole valai mia koea na tabeke i ngeki mi gi mate? I kamumu hateka mi gi made o Egipto mi gi mate vonga. 12 Na tahuna si tababana o Egipto, mi taki ioe nahea si gi ha, si gi made vonga ge hita a vorakato ne ria. Ngane i hale hateka si gi mate tavula koea na tabeke i ngeki.”

13 Lakea e Moses i taki ria, “Naha ni mangenge. Mu hatenono, bara mu matai a maki e BAKOVI DAGI ge rata ge korimule mua. E huriki a Egipto mu matai mona, muri i uka ma mu gu matai tabu ria. 14 E BAKOVI DAGI bara i vaubi ni tuhori mua. Pali mua i uka ma mu gu ratea tara maki, bara mu matanono kunana.”

15 Muri e BAKOVI DAGI i takia e Moses, “I navai o tangi valai nau? O taki e huriki a Israel ri gi malaga ri gi laho. 16 O toto rikea a kodo vomu o toto langa na dari, ge vakalipida na tabeke ge rua, ge lahopolo na mahasi e huriki. 17 Iau ga rata e huriki a Egipto ge madihi a hatene ria, ri gi valili ne mua a Israel. Muri ga ratapilea e Parao turana a tara na vabinga vona ra ri rike na karis a hos. A maki ga ratea bara vakadagi a ragu vona. 18 Ga ratapilea e Parao, muri e huriki a Egipto bara ri matakilaka nau, iau kunana e BAKOVI DAGI.”

19 Muri a agelo na Vure ra i muga a tara na vabinga ne Israel, i pe a hini muga i lukumuri na bitone ria. A bubu tara i pe a hini muga i pesi muri. 20 Na rodo malaku, a bubu i pesi mavonga na kurukuruna tara ne Israel, a tara ne Egipto. Ra bubu i ratea a tabeke i pesi vona e huriki a Egipto i uvo hateka, pali a tabeke i pesi vona e huriki a Israel i palala. Lakea e huriki a Egipto i uka ma ri lakea tabukoi ne huriki a Israel.

21 Muri e Moses i toto langa na dari a limana. Na rodo e BAKOVI DAGI i ratea a vilu dagi i pori valai na nirikena haro, i tugu mulea a dari i vakalipida na tete i rua. 22 *1Ko 10:1-2; Hib 11:29Lakea e huriki a Israel ri laho polo na tabeke i mahasi na kurukuruna. A dari i pesi manga a nure na kanene ria, na maurine ria.

23 E huriki a Egipto ri nunu muri ne ria, turane huriki ri rike na hos a karis, ri dili na kurukuruna dari. 24 Na malabeonga e BAKOVI DAGI i made na bubu a kanono, i matapuru na tara na vabinga ne Egipto i vakaviliha a niluhoi ne ria, ri varoru. 25 I rata a maka parere na karis i koro vona a kokota, ri keri ni nunu. Lakea ri ta maea, “Si hamule! E BAKOVI DAGI i tuhori e huriki a Israel ri vaubi ne hita. Si ha malaviriri, si pe mule ria.”

26 Muri e BAKOVI DAGI i takia e Moses, “O toto langa na dari a limamu ge hamule mai a murina a dari, ge kavitagu e huriki a Egipto turana a maka karis a hos ne ria.” 27 Lakea e Moses i toto langa na dari a limana. Na hatelanga a dari i hamule mai a murina. E huriki a Egipto ri toni ni ha, pali ri keri, lakea e BAKOVI DAGI i vakapasiri ria, ri mate. 28 A dari i hamule mai a murina i kavitagu e huriki a tara na vabinga ne Parao, turana a maka karis a hos ne ria, ra ri nunu muri ne huriki a Israel, i uka tara viri ge mahuri. 29 Pali e huriki a Israel ri laho polo na hini i mahasi, ri bele na tabeke tara. A dari i pesi manga a nure na kanene ria, a maurine ria.

30 Na parava iea kunana e BAKOVI DAGI i korimule e huriki a Israel na limane huriki a Egipto. E huriki a Israel ri matai a maka podane huriki a Egipto ri vatabulihi na lavu na Dari Vururu. 31 Na tahuna e huriki a Israel ri masia a nitora dagi ne BAKOVI DAGI i rata virihi e huriki a Egipto vona, ri mangenge ne BAKOVI DAGI ri longototoa turana a vora vona e Moses.