1 Ngane a pago i bele na robo e Kenan i manga a hini muga na tahuna ne Abraham. E Isak i vano, i lakea ne Abimelek, a hariki ne huriki a Palestina, na tanga e Gerar. 2 Na parava tara, e BAKOVI DAGI i bele ne Isak, i ta maea, “Naha ni puru o Egipto, o made vona a malala ga vakasiri ioe vona. 3 *Vuh 22:16-18O made popote vona a malala iea. Iau ga made turamu, ga gamai ioe. Ra malala iea ga habia vomu turane huriki a hamomu, bara vakatorea ra nita dagi a ta muholi vona ne tamamu, e Abraham. 4 Ga rata e huriki a hamomu ri gi kupo manga a hada na hunu. Ga habia ne ria a robo iea. Na hamomu kunana, ga gamai e huriki lobo na malala, 5 a vuhuna e Abraham i ramai tora a nitagu a vinara nau.” 6 Lakea e Isak i made vonga na tanga e Gerar.

7 *Vuh 12:13; 20:2E huriki na tanga ri nanea vona e girihina, lakea e Isak i ta maea, “Ia e kurabagu.” I koi ni taki ria vona e Rebeka ge girihina, a vuhuna i mangenge. I luhoi maea, “E huriki a bakovi na tanga bara ri rabalaki iau, ri bolea e Rebeka, a vuhuna i mata kamumu hateka.”

8 Ngane e Isak i made tabaka pali na tanga iea. Na parava tara, e Abimelek, a hariki ne huriki a Palestina, i mata tala na mataruma, i masia e Isak i kakoa e girihina, e Rebeka. 9 Lakea, e Abimelek i galea e Isak, i nanea, “Ra ngatavine iea, e girihimu! I navai o takia ta ia e kurabamu?”

Lakea e Isak i koli mulea, i ta maea, “A vuhuna a luhoi maea, bara takia e girihigu, e huriki a bakovi bara ri rabalaki iau, ri bolea e Rebeka.”

10 Muri e Abimelek i ta maea, “A ra o ratea ne mia? A bakovi tara bara i mahita turane girihimu, bara mi tahoka a ngava!”

11 Lakea, e Abimelek i vara e huriki a tahotanga, i ta maea, “E rei a viri i rata hale a bakovi iea turane girihina, bara ni rabalaki.”

12 E Isak i rata a hania, i varo a maki ni kani vona a robo iea. Na pida iea kunana i vona hateka a maki ni kani a hania, a vuhuna e BAKOVI DAGI i gamaia. 13 E Isak i tahoka a mahala i kupo. A mahala vona i bele kupo, i rata ia a viri na mahala. 14 E Isak i tahoka a maka kabuna sipsip, a kabuna bulmakau, a vora ni leho, i rata ngane e huriki a Palestina ri masigoro na mahala vona. 15 Lakea e huriki a Palestina ri bole a malala, ri kavitagu a lovo na naru e huriki a vora ne tamana, e Abraham, ri keli hosi.

16 Muri, e Abimelek i takia e Isak, “O pe mia, o vano, a vuhuna o tuhaka hateka ne mia.”

17 Lakea e Isak i pe a hini nga i vano i made na maloku ne Gerar. 18 I keli tabu a maka lomu, ra ri kavitagu e huriki a Palestina na tahuna e Abraham i mate. Lakea i gale tabu ria vona a rane ria, i vunu ria vona e Abraham.

19 E huriki a vora ne Isak ri keli lae na maloku, ri matavisia a narubele. 20 Lakea e huriki a vora na ni matakari a sipsip o Gerar, ri tahate e huriki a vora na ni matakari a sipsip ne Isak, ri ta maea, “Ra lomu iea ne mia.” Lakea e Isak i vunua a lomu iea e Esek*‘Esek’ na nita Hibru i manga ‘nigege. a vuhuna ri vagege turana. 21 Muri ri kelia a lomu tara, pali ri vatahate tabu maia, lakea i vunua e Sitna.†‘Sitna’ na nita Hibru i manga ‘vagege.’ 22 I pe a hini ngi, i lakea i keli tabua a lomu tara, pali i uka viri ge tahate vona. I vunua e Rehobot,‡‘Rehobot’ na nita Hibru i manga e ‘Koropala.’ lakea i ta maea, “Ngane e BAKOVI DAGI i habia ne hita a tabeke iea bara si leho vona, si tahoka a maki kupogala.”

23 Muri, i pe a hini nga, i lakea o Bersiba. 24 Na rodo tara e BAKOVI DAGI i bele vona, i takia, “Iau a Vure ne tamamu e Abraham. Naha ni mangenge. Iau a made turamu. Iau ga gamai ioe, ga vakabele kupo e huriki a hamomu, a vuhuna e Abraham ia a vora nau.”

25 E Isak i haea vonga a dede-kedo i kavurikea a rane BAKOVI DAGI. Muri i vakapesia vonga a kape vona, lakea e huriki a vora vona ri kelia a naru.

26 *Vuh 21:22E Abimelek i pea a tanga e Gerar, i valai mai e Isak turana e Ahusat, ra bakovi ni habi a niluhoi vona, e Pikol, ra ubu na tara na vabinga vona. 27 Lakea e Isak i nana tou, “I navai moto valai nau? I uka ma i hosi hateka moto tahate iau, moto tono tala iau.”

28 Lakea to takia, “Mete matakilaka vona e BAKOVI DAGI i turamu, lakea mete ngaru si gi valongo mai a ngava. A ngava ge maea, 29 ‘Ioe i uka ma go rata hale mateu. I manga mateu hosi, i uka ma mete rata hale ioe. Mete rata kamumu ioe, muri mete rudu ioe o vano na ni valemu. Ra ngane e BAKOVI DAGI i gamai ioe.’ ”

30 E Isak i ratea a habu ne tou, to kani, to ninu. 31 Na hatelanga pokopoko to kaba takutaku vona a nita muholi. Muri to tarulu purua e Isak, to vano.

32 Na parava iea kunana, e huriki a vora ne Isak ri valai ri vakalongoa vona a naru ri kelia pali. Ri ta maea, “Mi matavisia a naru!” 33 Lakea i vunua e Siba.§Siba na nita Hibru i manga ‘a ngava dagi.’ Mona ni gale liu a tanga iea e Bersiba.**Ber na nita Hibru i manga ‘a lomu.’

34 E Esau i tahoka a pida i ravulu va, i parangi vona e Iudit, e tune Biri, a kabu ne Hiti. E girihina tara, e Basemat, e tune Elon, ia tara a kabu ne Hiti. 35 Ngane e Isak e Rebeka ru loho lege lae vona e tune rua i parangi na ngatavine o Hiti.