1-4 A kabu ne Manase ne Epraim rua a hamone Iosep. A nagi na malala ni habi ne huriki a hamone Iosep i tubu na tabeke na nirikena haro na lomu ne Ieriko tabukoi na naru e Iordan. Muri i vano i polotaroa a tabeke i ngeki i lokovonga na maka lolo i harena na tanga e Betel. I tubu o Betel, re Lus, a nagi i lakea na tanga e Atarot-Adar, ra tanga i made vona e huriki a Arka. Muri a nagi i lakea na nirolona haro i bele na tabeke ne huriki a Iaplet, i lokovonga liu na tanga e Bet-Horon na maloku. Muri a nagi i lakea mai a tanga e Geser, i vano i bele na Dari na Kurukuruna Malala.

5 A nagi na malala na kabu ne Epraim i tubu na tanga e Atarot-Adar na tabeke na nirikena haro, i vano i harena na tanga e Bet-Horon. 6 A nagi i vano i bele na Dari na Kurukuruna Malala. A tanga e Mikmeta i pesi mule sike na malala ne ria. Na tabeke na nirikena haro a nagi i kaogo na tanga e Tanat-Silo, i lakea mai a nirikena haro i harena na tanga e Ianoa. 7 Muri a nagi i puru lakea na tanga e Atarot e Nara, i vano i bele na tanga e Ieriko. Muri i lokovonga liu i harena na naru e Iordan. 8 A nagi i tubu tabu na tanga e Tapua, i lakea mai a nirolona haro i bele na naru e Kana, i vano i harena na Dari na Kurukuruna Malala, ni veru na kabu takutaku ne Epraim. 9 Ra malala iea turana a maka tanga dagi, a tanga kiroko ri pesi tabukoi ne ria ni habi na kabu ne Epraim. I ranga Epraim ri made turana a kabu ne Manase na tanga dagi, na tanga kiroko ne ria. 10 *Het 1:29Pali e huriki a Epraim i uka ma ri lili tala e huriki a Kenan ri made na tanga e Geser. Ngane e huriki a Kenan ri tababana ni made turane ria, lakea e huriki a Epraim ri vakavora ria na leho.