1 *Gi 35:9-34; Vin 4:41-43; 19:1-13Muri e BAKOVI DAGI i takia e Iosua, 2 “O taki e huriki a Israel o ta maea, ‘Mu vulaki ranga tanga ne huriki a bakovi ri gi vano ri gi kapiloho vona, ge manga a ngava a taki e Moses ge taki mua vona. 3 Na tahuna a bakovi tara i rabalaki rurua tara bakovi, ra bakovi iea ge ha lakea vona tara tanga nga ge kapiloho vona, ne vona ni korimule ia. A tahona bakovi i mate bara i varoru ni dili vona a tanga iea, ge koli ge rabalakia a bakovi iea.

4 “ ‘Na tahuna a bakovi tara i ha, i bele vona a tanga iea, ge lakea na hini ni kado a maregoa vona na dilidala na tanga, ge vakalongo e huriki a gare na maki i ratea. Muri e huriki a gare ri gi takia ge dili na tanga, ge made turane ria. 5 A bakovi i ngaru ni koli a bakovi i mate i bele vona a tanga iea, e huriki a gare i uka ma ri gi longo ri gi habia vona a bakovi iea, a vuhuna i uka ma i ngaru ni rabalakia a bakovi, i rabalaki rurua. I mavonga e huriki a tahotanga bara ri koria a bakovi iea. 6 A bakovi i ha ge made vona a tanga iea, ge harena ne huriki ri gi pelekadoa a maregoa vona na matane huriki a tahotanga. Na tahuna ni longo i uka maregoa, bara i made vona a tanga iea, ge harena na prister dagi i rata a leho vona a tahuna iea ge mate. Muri ge hamule mai a tanga vona.’ ”

7 Lakea ri ru herea a tanga e Kedes na tabeke ne Galili na kupona na malala ne huriki a Naptali, e Sekem i pesi na kupona na malala ne huriki a Epraim, e Kiriat-Araba re Hebron na kupona na malala ne huriki a Iuda. 8 Tabukoi o Iordan na kupona na tabeke na nirikena haro ne Ieriko, na tabeke i ngeki, ni ru here a tanga e Beser na malala ne huriki a Reuben, a tanga e Ramot na robo e Gilead na malala ne huriki a kabu ne Gad, a tanga e Golan na robo e Basan na malala na kabu ne Manase. 9 Ra maka tanga nga ni ru here ne vona e huriki a Israel turane huriki basi ri gi kapiloho vona ri gi korimule ria. I mavonga na tahuna a bakovi tara i rabalaki rurua tara bakovi, ge ha lakea vona tara tanga nga. A bakovi i nunu muri vona ge koli, i uka ma ge rabalakia ra bakovi iea, bara ni pelekado taro a maregoa vona.