1 Muri ria lobo ri pesi rike, ri tulia e Isu ge lakea ne Pilato. 2 Na tahuna ri bele, ri vakatubu ni padi virihia na ngava, ri ta maea, “Mi masia a bakovi iea i tami hita e huriki a Iuda, i taki hita nahea si gi habi a takis ne Kaiser. I taki ta ia a hariki, ta ia e Kristo, ra viri a Vure i vulakia.”

3 Lakea e Pilato i nanea e Isu, i ta maea, “Ra ioe, ioe a hariki ne huriki a Iuda?”

E Isu i koli i ta maea, “A ngava o takia pali.”

4 Lakea e Pilato i taki e huriki a prister dagi, a bakovi a ngatavine i ta maea, “Iau i uka ma a matavisia vona tara rabu hale ge ratea.”

5 Pali ri hinituhana, ri ta maea, “Ra bakovi iea i laho viliha na tabeke ne Iudea, i vakarike a hatene huriki, ri rata tuhare, i vakatubu o Galili, i valai liu koea.”

6 Na tahuna e Pilato i longoa a ngava iea, i nana ria ne Isu a bakovi o Galili, o i uka. 7 *Luk 3:1Ri vakalongoa ne Isu a bakovi o Galili, lakea i rudua e Isu ge masia e Herod, a vuhuna e Herod i matakari a tabeke ne Galili. Na tahuna iea e Herod i made vonga o Ierusalem.

8 Na tahuna e Herod i masia e Isu, i vivi hateka, a vuhuna i longoa pali a nuverei ne Isu, i pasimata ni masia, ge rata a nivakasiri. 9 Lakea e Herod i nanea e Isu na ninana i kupo, pali e Isu i uka ma i kolia tara ngava. 10 E huriki a prister dagi, a mari na vinara ra ri pepesi vonga, ri ta hinituhana ni padi virihi tavulea na ngava. 11 E Herod turana e huriki a nugumaheto ri padikede loboa e Isu, muri ri vakarodoa na varakia na hariki, ri rudu mulea ne Pilato. 12 Muga e Pilato e Herod ru vagima. Pali na parava iea ru vamule mai.

13 Muri e Pilato i gale palupu e huriki a prister dagi, a matakari, e huriki a bakovi a ngatavine. 14 Lakea i taki ria i ta maea, “Ra bakovi iea, mu turari vilia nau, mu takia ta i tami e huriki. Pali iau a nanea na matane mua lobo, i uka ma a matai ranga naro hale ge manga a hini mu taki. 15 E Herod tara i uka ma i masia vona tara naro hale, lakea i rudu mule vilia ne hita. Mu longo! Ra bakovi iea i uka ma i ratea tara maki ge hale ge mate vona. 16 Pali ngane ga lagu kunanea, muri ga tonoa ge vano.”

17-18 Pali e huriki lobo ri gale dagi ri ta maea, “Ge mate a bakovi iea! E Barabas a viri ge pagitala!” Ri ta maea, a vuhuna na pida lobo na Habu na Nipagepolo e Pilato bara i bole talea na bavi a bakovi tara, ge vano. 19 E Barabas ni ru dili na bavi, a vuhuna i vakatubu a vaubinga turana e huriki a Rom, i rabalaki a viri.

20 E Pilato i taki tabu e huriki vona e Isu ge pagitala. 21 Pali ri gale dagi tabu ri ta maea, “O paditatea na kai tavalavala! O paditatea na kai tavalavala!”

22 Balaka tolu ngane i taki ria nahea ge mate, i ta maea, “I navai ge mate? A ra naro hale i ratea? Iau i uka ma masia vona tara maki ge hale ge ratea ge mate vona. Pali ngane ga lagu kunanea, muri ge vano.”

23 Pali ri gale hinituhana vona e Isu ni gi paditata malaviriri. Ri gale dagi hateka, 24 lakea e Pilato i longo mai ria. 25 I vakapagetalea e Barabas ra ni ru dili na bavi na hini i vaubi i rabalaki a viri, pali i ramai a ningaru ne ria, i rudua e Isu ni gi rabalaki.

26 Na tahuna e huriki a nugumaheto ri turari lokovongea e Isu, ri masia e Simon, a bakovi o Sirene, i valai basi ge dili na tanga. Lakea ri vakukua ge kalohoa a kai tavalavala ne Isu, ge laho muri vona.

27 E huriki ala kupo hateka ri laho muri ne Isu. E huriki a ngatavine ranga, ri dua muri vona. 28 Pali e Isu i matagege, i taki ria, i ta maea, “Mua o huriki a ngatavine o Ierusalem, naha ni taringi iau. Mu taringi mule mua, mu taringi e tune mua, 29 *Luk 21:23a vuhuna a parava popote ge valai e huriki ri gi ta maea, ‘Ri gi vivi e huriki a ngatavine ri lame, i uka ma ri vakaruru a koma.’ 30 *Hos 10:8; Kap 6:16Muri e huriki bara ri taki a maka lolo a kupona ge kavitagu ria. 31 E huriki ri rata mavonga na kai gareka, bara ri rata hale hatekea a kai munae.”

32 A bakovi hale ala rua ranga ni turari turane Isu ni gi rabalaki. 33 Na tahuna ri bele na tanga ni gale e Tuha-Gigi, e huriki a nugumaheto ri paditatea e Isu vonga na kai tavalavala. A bakovi hale ala rua, rua ranga ni paditata na kai tavalavala. I tavore na kanena tara, i tavore na maurina tara.

34 *Sng 22:18; Ais 53:12Muri e Isu i ta maea, “Tata, o puga a naro hale ne ria, a vuhuna i uka ma ri lohoka vona a maki ri rata.”

E huriki a nugumaheto ri rehi vona tara rihiva. A viri bara i mulangi bara i bole a varakia ne Isu. 35 *Sng 22:7-8E huriki a bakovi a ngatavine ri pesi, ri matanono. E huriki a matakari ri padikedea e Isu, ri ta maea, “I korimule e huriki ranga. Pali ge ia e Kristo, a Viri a Vure i Vulakia, ge korimulea.”

36 *Sng 69:21E huriki a nugumaheto, ria ranga ri padikedea, ri valai ne Isu, ri habi vona a vain vagole ge ninu. 37 Lakea ri ta maea, “Ge ioe a hariki ne huriki a Iuda o korimule ioe.” 38 Ni here polo meli na kai tavalavala a ngava nga:

39 A bakovi hale tara i tavore na kai tavalavala i ta hale ne Isu, i ta maea, “Ge ioe e Kristo, o vakakori ioe, muri o kori maria.”

40 Pali a bakovi hale tara i tahatea, i ta maea, “I navai o uka ma o mangenge na Vure? Ioe tara o bole a nimadihi manga ia. 41 Pali tarua ni vakamadihi na naro hale tu rata. Pali ra bakovi iea i uka ma i ratea tara naro hale.”

42 Muri i takia e Isu, i ta maea, “Isu, na tahuna o lakea na harikianga vomu, o luhoi iau.”

43 E Isu i koli i ta maea, “A taki muholi ioe, mona bara o made turagu na paradiso.”

44 Na kuru haro a uvo i kavitagua a malala, i vano i harena na kilala i tolu na malunga, 45 *Hib 6:19-20; 10:19-20a vuhuna a haro i uka ma i para. A lavalava dagi na roho na Vure i mavida i bale rua. 46 Muri e Isu i ta dagi, i ta maea, “O Tata a habia na limamu a hanugu.” Muri i mate.

47 Na tahuna a ubu na tara na nugu­maheto i masia a maki i bele, i kavurikea a Vure, i ta maea, “Muholi hateka, a bakovi iea i uka ma i ratea tara naro hale!”

48 Na tahuna e huriki ri vapopo ri matanono, ri matai a maki i bele, ri dodo hateka, ri hamule lakea na tanga. 49 E huriki a turane Isu, e huriki a ngatavine ra ri valai o Galili turana, ri pesi basi popote ri matai a maki lobo nga.

50 A Iuda tara, a rane Iosep, a tanga vona ni gale e Arimatea. Ia a tara ni kado a ngava. Ia a bakovi kamumu, a bakovi kiripiripi. 51 I pasimata ni matai a harikianga na Vure. I uka ma i ngaru a vilo ne huriki i leho turane ria, ri rabalakia e Isu. 52 E Iosep i lakea ne Pilato i takia vona a podane Isu, ge tanua. 53 E Pilato i longo, lakea i vano, i paru talea na kai tavalavala, i bunua na lavalava, i rua na babe ni keli na dahana kedo. Ra babe iea i uka ma ni tanu a viri vona ma. 54 Ra parava iea a parava ni kisi puru a maki na Parava Nimalo. I popote ngane bara i tubu a Parava Nimalo.

55 E huriki a ngatavine, ra ri valai o Galili turane Isu, ri muri ne Iosep ri masia a babe, ri masia ni vakatabuli navai a podane Isu. 56 *Nim 20:10; Vin 5:14Muri ri vano ri gi rata puru a nibiri, a mangisipa.

Pali ri malo taro na Parava Nimalo, ri muri mai a vinara ne Moses.