1 *Nim 25:31-40; 37:17-24E BAKOVI DAGI i takia e Moses i ta maea, 2 “O takia e Aron na tahuna i ru a lam i polorua na maka butu ne ria pololilo na Tabeke Nitaba, ge ru kamumu ri gi paraia a kurukuruna a hini pololilo.”

3 Lakea e Aron i ramaia a nita e BAKOVI DAGI i vakuku e Moses vona, i ru a maka lam na rahana butu ri paraia a kurukuruna Tabeke Nitaba. 4 A maka butu na lam ni rata maea. Ni bole a gol, ni ubi na ama ni rata a butu, a maka rahana, a maka bagetua vona ri manga a keke. Ri rata manga a hini e BAKOVI DAGI i taki e Moses vona.

5 Muri e BAKOVI DAGI i takia e Moses i ta maea, 6 “O gale tala ne huriki a Israel, e huriki a Levi, o rata ria ri gi matapado na matagu. 7 O rata maea: O bole ranga naru ne vona ni rata a bakovi ge matapado na matagu, o voro tamali langa ne ria. Ri gi ali lobo a vune ria, a vungane ria, ri gi loi pasi a maka kala ne ria. Bara ri rata lobo ri matapado. 8 Muri ri gi bolea tara bulmakau karaba a toga, turana ranga plaoa ni vuli turana namona oliv, ne vona a nihabi na vit, ni gi habi turana bulmakau. Ri gi bolea tara bulmakau a toga, ne vona a nihabi na naro hale. 9 O taki e huriki a Levi ri gi pesi tabukoi na mataroho na Kape na Vaponga, turana e huriki a Israel lobo. 10 Na tahuna e huriki a Levi ri pesi na matagu, mua e huriki a Israel mu ru langa a limane mua na gine ria. 11 E Aron ge bole a murine huriki a Israel, ge habi nau e huriki a Levi, ge a nihabi na nitabari. Na naro iea kunana e huriki a Levi bara ri kara ni rata a leho nau.

12 “Muri e huriki a Levi ri gi ru langa a limane ria na gina bulmakau nga i rua. Ri gi habia tara, ge a nihabi na naro hale, a bulmakau tara, ge a nihabi gutu-vuro. Ra nihabi nga i rua, ne vona ni kavitagu a naro hale ne huriki a Levi. 13 E huriki a Levi ri gi pesi na matane Aron turane huriki e tuna. O habi ria nau ge manga a nihabi na nitabari. 14 Na naro iea kunana e huriki a Levi ri tebi ne huriki a tara ranga ne Israel, ge ne nau kunana.

15 “Na tahuna o rata ria ri matapado pali, o habi ria ne nau ri gi manga a nihabi na nitabari, ngane ri kara ni rata a leho na Kape na Vaponga. 16 A bole e huriki a Levi ge ne nau, a vuhuna ri bole a murine huriki a tabua ne huriki a Israel. 17 *Nim 13:2O longo kamumu. E huriki a tabua ne huriki a Israel, a tabua na maka bulmakau a sipsip ne nau kunana. A ru here ria pali na tahuna a rabalaki e huriki a tabua bakovi ne huriki a Egipto. 18 I mavonga a bole e huriki a Levi ri gi kuloi e huriki a tabua bakovi ne huriki a Israel. 19 A bole tala ne huriki a Israel e huriki a Levi. A habi ne Aron turane huriki e tuna a bakovi, ri gi rata a leho a taki e huriki a Israel vona ri gi rata pololilo na Kape na Vaponga, ri gi kavitagu e huriki a Israel, i uka ma mu gu lakea tabukoi na Tabeke Nitaba, ma mu gu lokovonga tabukoi bara ratapile mua.”

20 E Moses e Aron turane huriki a Israel lobo, ri rata ne huriki a Levi a maki e BAKOVI DAGI i vakuku e Moses vona. 21 E huriki a Levi ri muri mai a naro ni matapado na matane BAKOVI DAGI, ri loi pasi a varakia ne ria. Lakea e Aron i habi ria ne BAKOVI DAGI ri manga a nihabi na nitabari. I rata a nihabi ni kavitagu a naro hale ne ria ri gi matapado. 22 E huriki ri rata a maki lobo ne huriki a Levi, i manga a ngava e BAKOVI DAGI i vakuku e Moses vona. I mavonga e huriki a Levi ri kara ni rata a leho pololilo na Kape na Vaponga. E Aron turane huriki e tuna ri matakari ria.

23 E BAKOVI DAGI i takia e Moses i ta maea, 24 “E huriki a Levi ri tahoka a pida ne ria i ravulu rua a polona i lima i rike, ri kara ni rata a leho pololilo na Kape na Vaponga. 25 Ri kara ni ratea a leho iea ge harena na tahuna ri tahoka a pida i ravulu lima, muri bara ri malo. 26 Muri nahea ri gi nugu tabua a leho iea, pali bara ri tuhori kunana e huriki ri leho na Kape na Vaponga. O habia a ngava iea ne huriki a Levi ri gi rata maea.”