34
A Nagi na Malala e Kenan
1 E BAKOVI DAGI i takia e Moses, 2 ge vakuku e huriki a Israel ge ta maea, “Na tahuna mu dili na malala e Kenan, a malala ni gi habi ne mua, bara ni nagi maea:
3 “A nagi i tubu tano liu na malala golea ne Sin i ramai a nagi ne Idom. Na nirikena haro, a nagi i tubu tano na ruperena Dari Mate. 4 Muri i polo tano na bala na lolo e Akrabim, i padi kudua a kurukuruna tabeke ne Sin i vano i harena na tabeke mule puru ne Kades-Barnea. A nagi i kaogo lakea na tanga e Hasar-Adar i harena na tanga e Asmon. 5 A nagi i kaogo vonga i ramaia a naru mara e Vadi o Egipto, i vano i lobo na Dari na Kurukuruna Malala.
6 “A lavu na Dari na Kurukuruna Malala, i tabuli manga a nagi ne mua na tabeke na nirolona haro.
7 “A nagi na tabeke mule sike i pe mulea a Dari na Kurukuruna Malala, i lakea maia a lolo e Hor. 8 Muri i pe mulea e Hor i lakea ne Lebo-Hamat. A nagi i vano i polo lakea na tanga e Sedad, 9 e Sipron i harena na tanga e Hasar-Enan. A nagi iea, a nagi ne mua na tabeke mule sike.
10 “A nagi na nirikena haro i tubu o Hasar-Enan i lakea maia a tanga e Sepam. 11 A nagi i pe mulea e Sepam i puru lakea na tanga e Ripla, na tabeke na nirikena haro na tanga e Ain, i puru lakea na maka kupona na dahana darilomu e Kineret*A darilomu e ‘Kineret’ a rana tara e ‘Galili.’ na tabeke na nirikena haro. 12 A nagi i puru i ramaia a naru e Iordan, i harena na Dari Mate. Ra nagi nga, a maka nagina harena malala ne mua, na tabeke lobo.”
13 *Ios 14:1-5Lakea e Moses i vakuku e huriki Israel i ta maea, “E BAKOVI DAGI i ru a nagi na malala ne mua a kabu i polova turana a kalavana kabu ne Manase. Mu rehi na rihiva na satu mu vulaki a tabekena malala ne mua. 14 A kabu ne Reuben, a kabu ne Gad, a kalavana kabu ne Manase to bole pali a malala ne tou. 15 To bole pali a malala na tabeke na nirikena haro, na gagana e Iordan, tabukoi o Ieriko.”
E Huriki a Nupesi Ri Gi Veru a Malala
16 E BAKOVI DAGI i takia e Moses i ta maea, 17 “E Eleasar a prister, e Iosua e tune Nun, ru gu verua a malala ne huriki. 18 O bole tala takutaku na maka kabu a bakovi ge tuhori rua. 19 A rane huriki a bakovi ra nga:
Na kabu ne Iuda, e Keleb, e tune Iepune. 20 Na kabu ne Simion, e Selumuel, e tune Amihud. 21 Na kabu ne Bensamin, e Elidat, e tune Kilson. 22 Na kabu ne Dan, a nupesi e Buki, e tune Iokli. 23 Na kabu ne Manase a hamone Iosep, a nupesi e Haniel, e tune Epod. 24 Na kabu ne Epraim, a nupesi e Kemuel, e tune Siptan. 25 Na kabu ne Sebulun, a nupesi e Elisapan, e tune Parnak. 26 Na kabu ne Isikar, a nupesi e Paltiel, e tune Asan. 27 Na kabu ne Aser, a nupesi e Ahihud, e tune Selomi. 28 Na kabu ne Naptali, a nupesi e Pedahel e tune Amihud.” 29 E huriki a nupesi nga, e BAKOVI DAGI i vakuku ria ri gi veru a malala ne Kenan ne huriki a Israel.