1 E Iosep e tamane Manase, e Manase e tamane Makir, e Makir e tamane Gilead. Na parava tara e huriki a hamone Gilead ri lakea ne Moses, ne huriki a nupesi ne Israel, 2 *Gi 27:7ri ta maea, “E BAKOVI DAGI i taki mua, mu gu rehi na rihiva na satu, mu gu veru a malala ne mia e huriki a Israel. Pali i taki tabu mua, mu gu habi a malala na turane mia e Selopehad ge lakea ne huriki e tuna ngatavine. 3 Pali ria bara ri parangi a bakovi na kabu ranga, a tabekena malala ne ria bara i lakea na kabu ne girihine ria, i uka ma ge ne mia tabu. A malala mu habia ne mia bara i kiroko liu. 4 *Levi 25:10Na pida Nihabimule a Maki, na tahuna ri bole mule a malala ni habi ne huriki ranga, a tabekena malala ne huriki e tune Selopehad, ra tara ne huriki e girihine ria, bara ri bole i dili turana a malala ne ria. Ra malala iea bara ni bole tala na malala na kabu ne mia.”

5 Lakea e BAKOVI DAGI i vakukua e Moses ge vakuku e huriki a Israel maea, “A nitane huriki a kabu ne Manase i kamumu. 6 E huriki e tune Selopehad ngatavine takutaku ri gi parangi a bakovi na ningaru ne ria, pali ri gi parangi mule a bakovi na kabu ne tamane ria kunana. 7 I mavonga a maka tabekena malala na kabu takutaku ne Israel, bara ri tabuli mule na kabu ne mua kunana. A kabu ranga i uka ma ri gi bole. 8 E huriki a ngatavine ri gi bole a maki ne tamane ria i mate, pali ri gi parangi mule kunana a bakovi na kabu ne tamane ria. Mua bara mu rata mavonga, mua e huriki a Israel takutaku bara mu bole a tabekena malala a mahala ne tubune mua kunana. 9 Naha ni longo mai a kabu ranga ri gi bole a malala ne mua. A kabu takutaku ge tangotatea a malala vona.”

10 Lakea e huriki e tune Selopehad ngatavine, ri ramai a nitane BAKOVI DAGI i vakuku e Moses vona. 11 E huriki e tune Selopehad e Mala, e Tirsah, e Hoglah, e Milka, e Noa, ri parangi mule a bakovi na kabu ne tamane ria. 12 Ri parangi e huriki a bakovi na kabu ne Manase, e tune Iosep, lakea a tabekena malala ne ria i tabuli mule na kabu ne tamane ria.

13 Ra vinara lobo nga e BAKOVI DAGI i habi ne huriki a Israel, na limane Moses, na bilane Moab, na tabeke mule lokovonga na naru e Iordan tabukoi o Ieriko.