1-3 O Tamo Koba Qotei, ni na gaigai iga qalaqalaigeqnum. Ni kumbra bole tiŋtiŋ na tamo uŋgasari naŋgi peginjreqnum. E ino kumbra deqa are qaloqnsiy ni qa louoqnsiy kumbra bole segi dauryoqnqai. E areqalo bole tiŋtiŋ na ijo tal ti ijo aŋgro naŋgi ti taqatnjrqai. E kumbra uge qa arearetbqasai. Sai bole sai. E tamo uŋgasari Qotei qoreiyeqnub qaji naŋgi koba na sqasai. E naŋgo kumbra tulaŋ urateqnum. O Tamo Koba, bati gembu ni bosim e aqaryaibqam? 4 Tamo qudei naŋgo are miligi tulaŋ uge. E na tamo naŋgi di winjritqa naŋgi isaq gilqab. E kumbra uge kalil torei uratqai.

5 Tamo bei na tamo bei lumu na misiliŋyimqa e aqa medabu getentetqai. E na tamo uŋgasari diqeqnub qaji naŋgi saidnjrqai.

6 Gago mandamq endia e na tamo uŋgasari Qotei dauryeqnub qaji naŋgi qalaqalainjrqai. Deqa naŋgi e koba na ijo talq di sqa kere. Tamo uŋgasari kumbra bole yeqnub qaji naŋgi na e wauetbqa kere.

7 Tamo uŋgasari gisaŋ kumbra yeqnub qaji naŋgi ijo talq di sqa keresai. Tamo uŋgasari gisaŋ anjam mareqnub qaji naŋgi e koba na sqa keresai. Sai bole sai. 8 Gago mandamq endia e na bati gaigai tamo uge naŋgi ugeugeinjroqnqai. Od, e na tamo uŋgasari kalil kumbra uge yeqnub qaji naŋgi winjroqnqai. Deqa naŋgi olo Tamo Koba Qotei aqa qure koba Jerusalem dia sqa keresai.