1 Tamo qudei naŋgi na e endegsib merbeb, “Ni au. Iga Tamo Koba Qotei aqa atra talq gilqom.” Naŋgi e degsib merbonabqa e tulaŋ areboleboleibej. 2 Deqa e naŋgi ti koba na walwelosim gilsim Jerusalem qureq di brantosim marem, “O Jerusalem, bini iga ino siraŋ miligiq di tigelejunum.”

3 Nami tal gereiyo tamo naŋgi na Jerusalem qure gereiyosib aqa utru siŋgilateb deqa a tulaŋ bole unu. 4 Bini Israel naŋgo moma utru 12 naŋgo leŋ naŋgi Tamo Koba Qotei aqa dal anjam dauryqajqa are qaloqnsib Jerusalem qureq giloqnsib Qotei aqa ñam biŋiyeqnub. 5 Jerusalem dia mandor naŋgo awo jaram unub. Naŋgi awo jaramq di awooqnsib tamo uŋgasari naŋgo une qa naŋgi peginjreqnub. Mandor naŋgi di Devit aqa leŋ.

6 Niŋgi endegsib Qotei pailyoqniy, “Tamo uŋgasari Jerusalem qalaqalaiyeqnub qaji naŋgi bole soqnebe. Jerusalem a qoto saiqoji lawo soqneme. 7 Jerusalem a dadaŋ ti unu. Aqa tal kokba miligiq dia tamo uŋgasari naŋgi qoto saiqoji lawo soqnebe.” Niŋgi degsib Qotei pailyoqniy. 8 Od, e ijo was naŋgi qa ti ijo kadoi naŋgi qa ti are qaloqnsim endegsi Jerusalem minjeqnum, “Ni qoto saiqoji lawo soqne.” 9 E gago Tamo Koba Qotei aqa atra tal qa are qaloqnsim endegsi Jerusalem minjeqnum, “Ni bole soqnime.”