12
Isalaela Dodogadi maꞌedi Kin Lehebowam sa Lulu
1 Kin 12:1-20
1 Isalaela dodogadi sa faꞌoigogo Sekem yai na Solomon natuna, Lehebowam ya lau amainiya bena sa faꞌobiyo edi kin. 2-3 Nebati natuna Delebowam ya lau Idipi paꞌana Kin Solomon ya ꞌwasabuwen. Fuyanna Idipi yai wasa ya atahiyen mate Solomon ya peꞌi, yo natuna sa faꞌobiyo kin, mate ya fuyoma. Yo fede, Delebowam ana liba sa fatamali be maidana Isalaela mahudoꞌidi sa lau Kin Lehebowam lisina be Delebowam iyen,
4 Tamam, Solomon paisowa mwahumwahudi ya felemai, na um tabu em abiꞌabimai doha. Haba em ita wata ganahewana yai ꞌe miya.
5 Alinadi Kin Lehebowam ya bui iyen,
Au lau lahai faihona habahim ami fuyoma lebegu.
Yo fede dodoga, sa lau.
6 Mulidi yai, Kin Lehebowam tamana tau sagusaguhina, iti Solomon ena tau paisowa lalaꞌi ya faꞌoilibadi iyen,
Dodoga haba somo E falibadi?
7 Ena liba sa bui tiyen,
Yena wa fanuha dodoga wa saguhidi, edi nuwatuhu bena wa lau watan, haba em ita wata ganahewana yai sa miyamiya.
8 In moho Lehebowam edi nuwatuhu ya ꞌwaiyoꞌoꞌen na ana hiti tataudi, enehena sa paipaisowa, ya faꞌoilibadi. 9 Ya fatiꞌoidi iyen,
Emi nuwatuhu somo? Dodoga sa libaliba laoma lisigu tiyen, “Ema paisowa u famalahadi, tabu doha tamam ena fuya yai.” Haba somo E falibadi?
10 Ana hiti tataudi alinana sa bui tiyen,
Dodoga aho sa falibabam tiyen, “Ema paisowa u famalahadi, u falibadi uwe, ‘Yau doga nuwa poꞌipoꞌigu, hige doha tamagu! 11 In paisowa mwahumwahudi ya felemiu na yau haba mwahumwahu wananahadi E felemiu! In balawa yai ya talaimiu na yau haba seni yai E talaimiu.”
12 Lahai faihona mulidi yai Delebowam maꞌena dodoga mahudoꞌidi sa fuyo Kin Lehebowam lisina be edi fatiꞌo buina sa abi doha haꞌa Kin Lehebowam ya libaen iyen,
Lahai faihona mulidi yai au fuyoma lisigu.
13 Baꞌisa Lehebowam dodoga lalaꞌi hige edi liba i lau watan na ya liba siꞌosiꞌololo lau lisidi. 14 Ana hiti tataudi moho edi nuwatuhu ya lau watan. Ya liba iyen,
Yau doga nuwa poꞌipoꞌi wananahana, hige doha tamagu! Tamagu paisowa mwahumwahudi ya felemiu na yau haba mwahumwahu wananahadi E felemiu! In balawa yai ya talamiu na yau haba seni yai E talamiu!
15 Guyau ya fanuha bena doha ite ya tubu. Logena, Kin Lehebowam hige dodoga edi liba i lau watan be haba Guyau ena liba fasunuma Delebowam lisina yai, aniyona ya tubu doha Peloweta Ahaida ya libaen. (1 Kin 11:29-30)
Isalaela Nuꞌuna, sa Daili Luwagai
1 Kin 12:16-20
16 Isalaela dodogadi sa nuwatuhu lobahi kin hige i fanuha bena edi nuwatuhu i lau watan be sa faliba tiyen,
Ai hige Desi natuna ye Deiwidi ana boga tefana!
Ai hige ena sulu dodogadi!
Isalaela dodogada ta fuyo eda nuꞌu,
Deiwidi laulauwewena haba ena dodoga ya ita watanidi!* Fuyanna yai mate nuꞌuna sa faitamo daili, be ya famala nuꞌu luwaga: Hesa hesana Isalaela na hesa hesana Diuda.
Yo fede Isalaela dodogadi sa fuyo hasa edi nuʼu. 17 In moho, Isalaela dodogadi salumadi sa miyamiya Diuda taondi yai, Lehebowam hola ya itaꞌita watanidi.
18 Isalaela dodogadi, kin ya duidi be pele yai sa paipaisowa. Tau itaꞌita watanidi mate taumoho hudoꞌi hesana Adonilam. Kin Lehebowam taumoho te, ya fatamali lawen Isalaela lebedi bena sidohana haba ya fafuyodima ena ita wata ganahewana yai. In moho sa lau umeheꞌui be ya peꞌi. Lehebowam feula ya gelu ena saliyoti yai be ya fuyo Yelusalem. 19 Fuyanna yai ya laoma ee–, aho ite, Isalaela suludi tefa lidilidi yai yo Deiwidi laulauwewena sa faitole muli.
20 Fuyanna Isalaela dodogadi sa atahiyen mate Delebowam Idipi yai ya fuyoma be sa yoga lawen edi aba faꞌoigogo yai be sa faꞌobiyo Isalaela suludi mahudoꞌidi edi kin. Sulu Diuda moho ya miya esegahi Deiwidi laulauwewena ena ita wata ganahewana yai.† Muli yai, Sula Beniyamin yo Diuda sa falau esegahidi.
Delebowam, Yaubada ena Liba Hige i Lau Watan
1 Kin 12:25-31
25 Nuꞌu piupiu hitidi Efalaim nuꞌuna yai, Kin Delebowam, Sekem taonna ganana ya faꞌobiyo na amainiya ya miya. Habahim ya aulaha ya lau be nuꞌu hesa hesana Penuweli ganana ya faꞌobiyodi. 26-27 Fuya hesa Delebowam ya nuwanuwatuhu iyen,
Isalaela dodogadi sa hasahasai Yelusalem edi ainauya sa anꞌantalasamedi Guyau ena Luma Tabuna yai na ibe sa fuyo Diuda dogana, Kin Lehebowam lisina, haba sidohana? Haba sa wunuigu na egu nuꞌu yai te, Lehebowam haba sa faꞌobiyo edi kin.
28 Delebowam ena nuwatuhu ena tatau sibasibadi ya falibadi be sa ehe watawatan. Yo fede bulumakau nanatuna oitaudi luwaga gole yai ya ginaulidi. Habahim Isalaela ya falibadi, iyen,
Ami laulau Yelusalem, fadebasae ana halulu mate edaꞌedana ya lofa. Aee–, Isalaela! Emi yaubada E ginaulidi, au laoma au fadebasaedi. Iti logedidi, Idipi yai sa foyahimiu.
29 Bulumakau oitauna gole Beteli yai ya tole na hesa Dan yai, 30 be ginaulidi te, sa famala heyaya, paꞌana dodoga sa laulauꞌuꞌula lau lisidi. Edaꞌeda ya lofa in moho sa lau Dan be sa lauꞌuꞌula lau hesa lebena.
31 Delebowam piu yai aba lauꞌuꞌula ya lau ginauli hinaga na dodoga gaibu ya fasinabodi tau antalasam. In moho iti hige sulu Lewi.
Fuyandi yai Delebowam mate Isalaela edi kin na Lehebowam mate Diuda edi kin. Lehebowam ya kin boliman 17. Ena fuya kin mate Diuda dodogadi sa laulauꞌuꞌula lau yaubada oitau lebedi na Idipi sa laoma Diuda sa hiyalaidi be Yaubada ena Luma Tabuna ginaulidi yo kin ena luma ginaulidi hinaga sa lawedi. Lehebowam yo Delebowam fuya ouꞌouli sa lululu fuyoꞌidi.
Fuyanna Lehebowam ya peꞌi, natuna Abaidiya ya famala kin be Diuda nuꞌuna ya ita watan boliman faihona. In hinaga Delebowam maꞌena sa lululu. Ya peꞌi mate natuna Asa ya famala Diuda edi kin. Asa ya kin bolima 41. Asa mate kin loholohona yo ya laulauꞌuꞌula lau Yaubada lisina. Diuda dodogadi edi yaubada bwalabwaladi ya hiyalaidi. Isalaela edi kin Baꞌasa maꞌena sa hiyahiyala fuya ouꞌouli. Asa ya peꞌi mate natuna Diyosafati ya famala Diuda edi kin.
Isalaela ganahewana yai Delebowam natuna Nadaba mate kin heyaheyayana. Yo kin hahaisa mulina yai sa heyaya hinaga.
Nadaba ya kin bolima luwaga. Habahim Baꞌasa ya wunui, yo Nadaba yo ana boga mahudoꞌidi hinaga ya wunuidi. Baꞌasa ya kin bolima 24 habahim ya peꞌi.
Natuna Ela ya kin be Isalaela ya ita watandi bolima luwaga. Habahim ena hiyala tau lau kulukuluwenna hesana Simili mate Kin Ela ya wunui, habahim ibona ya faꞌobiyo fuyoi be ya kin.
In moho hiyala tau lau kulukuluna Omili sa fa-kin. Habahim, Simili ibona ya wunu fuyoi, na Omili ya kin boliman 12, habahim natuna Ahaba ya kin, Isalaela yai, bolima 22.