17
Paulo yo Sailasi, Tesalonika Nuꞌuna yai
Paisowa 17:1-9
1 Paulo yo Sailasi sa lau Amfipoli yo Apoloniya duhu laꞌidi yai, be sa lau Tesalonika. Amainiya mate Diusi edi aba oiꞌoigogo lumana hesa. 2 Paulo in haꞌa ena kamani, ya lau Diusi edi aba oiꞌoigogo lumana. Sabati Lahaidi faihona dodoga ma afa haidadi Buka Tabuna libadi amainiya sa liba faneganegadi,*Paisowa edi fuya yai mate, Buka Beyabeyadi moho sa fafapaisowadi, paꞌana Yali Falifalihuna Bukana hola hige ti uli. 3 yo ya fawananaha bukana yai ni, mate Keliso bena ya ankamkamna yo ya mwahuli fuyo. Ya falibadi, iyen,
Yesu wasana E guguyaꞌen lisimiu yai te, mate In Keliso yo In Fasinabo Dogana.
4 Diusi hahaisa, yo wawahin fafahesadi yo Giliki dodogadi safalumadi Yaubada sa fafadebasae nuwadi ya abidi, be in yo Sailasi ma afa haidadi sa laoma esega.
5 In moho, Diusi dodogadi haisa sa nuwa elaꞌela, yo fede, dodoga inono heyaheyayadi maketi yai sa abi gogoidima, be maꞌedi adi sana na taon dodogadi sa eli fasifasinadi, be doga hesa hesana Deisen ena luma sa tulufi. Paulo yo Sailasi sa yoꞌoidi, bena sa aule fakalamahanodima dodoga lisidi. 6 Sa yoꞌo asahaidi, yo fede Deisen yo tau kawawananaha haisa sa solu kwakikwakidi be sa lawedi taon babaꞌisadi lisidi na sa sagasagali tiyen,
Dodogadi ni, pilipili sa laulau ginauli nuꞌu mahudoꞌina yai! Na aho ite, sa laoma amaiteꞌi, laulauna hinaga doha.
7 Deisen ya famiyadi ena luma yai na mahudoꞌidi mate Loma Nuꞌuna edi Kin, Sisa, ena laugagayo sa moꞌa peiyen, yo sa libaliba tiyen,
Kin hesa, mate hesana Yesu.
8 Liba te sa atahi mate dodoga boludi yo taon babadadi sa fanuwa halahaladi. 9 Babada wa sa liba be Deisen ma afa haidana sa sadidi, habahim sa biya afuledi.
Beleya Nuꞌuna yai
Paisowa 17:10-15
10 Ya iꞌipa lau yo fede tau kawawananaha Paulo yo Sailasi sa duidi sa lau Beleya. Sa mahano lau, mate sa lau Diusi edi aba oiꞌoigogo lumana yai. 11 Beleya dodogadi nuwadi sa tasoꞌe, hige doha Tesalonika dodogadi, paꞌana fuyanna yai ni liba sa atahi mate sa fanuha wananaha. Fuya ouꞌouli Uliꞌuli Tabudi sa laulau fadosinidi, be haba sa siba mate, wananaha. 12 Diusi boludi, Giliki wawahindi fafahesadi yo Giliki tataudi boludi, somo Paulo ya lauguguyaꞌen, sa kawawananahaꞌen. 13 In moho, Diusi dodogadi Tesalonika yai sa miyamiya, sa atahi mate Beleya nuꞌuna yai, Paulo Yaubada ena liba ya lauguguyaꞌen, be sa lau amainiya hinaga, be dodoga pwaludi sa eli fasifasinadi. 14 Tau kawawananaha, Paulo sa dui lawen gelegele, na Sailasi yo Timoti sa miya Beleya yai. 15 Amainiya, salumadi Paulo sa fatau saguwen, be sa lau Atensi. Habahim, Paulo ya fafalibadi, iyen,
Ami fuyo mate, Sailasi yo Timoti au falibadi, be feula ti laoma lisigu!
Paulo, Atensi Nuꞌuna yai
Paisowa 17:16-34
16 Paulo, Atensi nuꞌuna yai Sailasi yo Timoti ya bagibagiyedi. Taonna ya ita mate oitau sa mohafu, be nuwana hige i loholoho. 17 Yo fede, Paulo ma afa haidana Diusi dodogadi yo Giliki dodogadi salumadi Yaubada tau ꞌwasaꞌwasabuwenna ena liba sa fafadosidi, ai aba oiꞌoigogo lumana yo fuya haisadi saluma ya lobahidi ai maketi mate hinaga maidana sa libaliba. 18 Dodoga haisa, edi pele hesadi: Epikule yo Sitowiko, mate sibasiba tau lau faꞌataenna maꞌedi Paulo sa faibayaho. Haisa sa fafatiꞌo fuyoꞌidi, tiyen,
Doga ni, somo bena ya libaen? Ena liba mate, kufana!†Alinadi yai tiyen, Doga ni doha ataiꞌa hesa hesana “tau gagagali gaibu.”
Haisa tiyen,
Nuwana, taꞌowawa edi yaubada hahaisa i libalibaedi.
Sa liba doha paꞌana Paulo mate, Yesu yo ena obiyo fuyo wasana loholohona ya lauguguyaꞌen. 19 Paulo sa foya lawen, Alepagusi Piuna yai be amainiya edi oigogo ganahewana yai, sa faliba, tiyen,
Lau faꞌata fwaufwauna wa lau faꞌataen te, somo? ꞌE fanuha bena ꞌe siba. 20 Ginauli haisa wa libaedi mate ꞌe fakaudi be ꞌe fanuha bena aniyodi ꞌe sibaidi.
21 (Atensi yo taꞌowawa dodogadi amainiya sa gogogogo mate, ginauli fwaufwaudi moho, sa atahiyedi yo sa libalibaedi. Ginaulidi te, lebedi yai edi fuya sa pei na hige somo hesa lisina yai.)
22 Habahim, Paulo ya obiyo be Alepagusi Konisela nuwanuwadi yai, iyen,
Umi Atensi dodogamiu! E itamiu mate ma nuwa ofifahimiu emi yaubada ami fadebasaedi, laulau hudohudoꞌi yai. 23 Emi nuꞌu E fafataꞌiꞌili, na emi aba fafadebasae nuꞌudi E mainene komakomanidi, na aba antalasam hudoꞌi E ita, sa uli tiyen, “Yaubada Hesa Hige ta Sibai, Enehena.”
Logena, somo ami fafadebasae, na hige au sibai mate, haba E falibamiu: 24 Yaubada, tanohi tau ginaulina yo ginauli mahudoꞌina ganahewana yai ya ginaulidi, mate In Galewa yo Tanoꞌubu Guyauna. In moho, dubu dodoga nimadi yai sa ginaulidi mate, hige lisidi yai i gogogo. 25 Dodoga hige gonowana somo Yaubada enehena ti ginauli e ti felen paꞌana ibege i kuꞌu. In iyabona mwahuli, yawasi yo ginauli mahudoꞌina, dodoga mahudoꞌidi ya feledi. 26 Doga esega debana yai,‡Dogana mate Adam doga nene hesa - hesa ya ginaulidi, be tanoꞌubu mahudoꞌina sa miyai. Edi lahai ya nonohai§Nuwana aniyona mate: haiꞌin, haibeꞌu, siuhwalo fuyadi, usaꞌusa fuyadi, e aniyona hesa dodoga edi boliman oulina. yo edi tanohi sigasigadi ya toledi. (Aba Fatubu 2) 27 Yaubada ya ginauli doha ite, be haba dodoga sa yoꞌoi yo sa anpate adidili be gonowana haba ti lobahi. Paꞌana Yaubada hige edaꞌeda lofalofa yai, ita esega - esega sadaida yai. 28 Doha uliꞌuli hesa ya libaen iyen,
“In lisina yai te mwahumwahuli,
te mwahiu yo te famala tau wananaha.”
Doha hinaga lili tau laulau uli haisa sa uli tiyen,
“Ita hinaga laulauwewena.”*Paulo lili ya fatifatili te mate, Giliki dogana hesana Epimenedesi bolima nuwana 550 b.c. yai ya uli.
29 Logena, ibe ita Yaubada laulauwewena. Tabu Yaubada ta nuwatuhui bena In doha oitau dodoga edi sonoga yai sa ginauli: gole, siluba e umeꞌehu yai. 30 Fuyanna dodoga Yaubada sa fakafakau mate, hige i fagiludi, Na aho te, iyebom,
“Dodoga mahudoꞌimiu nuꞌu ouꞌouli yai te, bena ami nuwabui!” (Paisowa 14:16; Loma 2:14-16)
31 Yaubada lahai haꞌa ya nonohai ai lisina haba ena Fasinabo Dogana tanoꞌubu mahudoꞌina ya fakasa ma dudulaina. Yesu peꞌi yai ya faꞌobiyo fuyoi mate, in ena fawananaha, dodoga mahudoꞌidi lebedi yai.
32 Fuyana mwahuli fuyo libana sa atahi mate, haisa sa liuliuhwaꞌen. Na haisa tiyen,
Ai ꞌe fanuha bena em liba ni ꞌe atahi fuyoi.
33 Yo fede pwaludi yai Paulo ya lau afuledi. 34 Tatau fisa sa famala Paulo tau famuli watanina yo Yesu sa kawawananahaꞌen. Ganahewadi yai mate: Daiyonisi, in mate Alepagusi dogana hesa laꞌilaꞌina, yo hinaga waihin hesa hesana Damalisi, yo dodoga haisa.
*17:2 Paisowa edi fuya yai mate, Buka Beyabeyadi moho sa fafapaisowadi, paꞌana Yali Falifalihuna Bukana hola hige ti uli.
†17:18 Alinadi yai tiyen, Doga ni doha ataiꞌa hesa hesana “tau gagagali gaibu.”
‡17:26 Dogana mate Adam
§17:26 Nuwana aniyona mate: haiꞌin, haibeꞌu, siuhwalo fuyadi, usaꞌusa fuyadi, e aniyona hesa dodoga edi boliman oulina.
*17:28 Paulo lili ya fatifatili te mate, Giliki dogana hesana Epimenedesi bolima nuwana 550 b.c. yai ya uli.