Diutelonomi
Laugagayo Bukana Fafaluwagana
Liba Bwaꞌibwaꞌina yo Fafamahatana:
Buka ganahewana yai te, mate Isalaela dodogadi bena sa lau Kanana Nuꞌuna be tanohina sa abi. Mose mate, Yaubada haꞌa ya laugagayoꞌen tabu i luhulau Kanana nuꞌuna ganahewana. Isalaela dodogadi ya fatalaha nonohaidi, bena haba sa lau. Yaubada ya fanuwa hitinidi sidohana Idipi yai haꞌa ya foyahidim yo sidohana nuꞌu pitapitalina yai ya ita watandi. Ya faliba fuyoꞌidi sidohana haba sa lau Nuꞌuna ni mate bena ena liba sa awa abiyen komakoman. Giliki alinadi yai Buka te hesana mate “Diutelonomi” na aniyona mate “Laugagayo Fafaluwagana” paꞌana Mose, Yaubada ena laugagayo ya uli bodaidi. Yo dede haisa buka yai te mate fafalihu, in moho laugagayo mate haꞌa Auꞌaulaha yo Lewitikusi yai Mose haꞌa ya ulidi. Ite hige laugagayo falifalihudi e laugagayo hahaisa.
4
Mose, Isalaela ya Falibadi bena sa Awaꞌabi
Diutelonomi 4:1-2, 6-8
1 Habahim Mose Isalaela dodogadi ya falibadi, iyen,
Au ataꞌatahi komakoman! Laugagayo mahudoꞌidi E fatalahamiu, bena ami lau watanidi haba ami miya lofalofa yo ami lau somo yai tanohi Guyau afa wahamiu edi Yaubada ya feledi, aiꞌedi, ami abi, enehemiu. 2 Laugagayo, yau haꞌa E felemiu, tabu hagahagana au tole lawen, o laꞌi au kam fahi. Guyau ena Laugagayo E felemiu moho, au lau watanidi.
6 Laugagayo te au lau watan komakomanidi, be haba nuꞌu hahaisa dodogadi, emi nuwatuhu loholohona yo emi sibasiba sa ita lobahidi. Yena laugagayodi sa atahiyedi, haba tiyen, “Moꞌisa, Isalaela mate nuꞌu laꞌilaꞌi yo dodogadi sa sibasiba yo edi nuwatuhu sa loholoho.” 7 Hige nuꞌu hesa laꞌilaꞌi ena yaubada sadaidi doha ita. In moho, Guyau eda Yaubada mate sadaida yai, na yena te anꞌetai haba ya saguhida. 8 Laugagayodi, aho te, E felemiu mate, sa dudulai yo sa loholoho. Hige nuꞌu hesa laꞌina doha somo, ena laugagayo doha ite.
Guyau mate Yaubada
Diutelonomi 4:32-34, 39-40
Mose ya liba hinaga iyen,
32-34 Guyau emi Yaubada hige doha yaubada hahaisa. Idipi yai ena adidili yai ya foyahimiu, be ya lau itamiu. Noꞌo ginaulidi yo fafaꞌilala ya lau ginauli matamiu yai.
Debamiu yai, Idipi ya hiyalaidi be kamkamna laꞌilaꞌi sa fahoina. Ya abimiu, be ami famala ena dodoga, be fuyana Sainai Tuꞌana yai oyagi ya ala balebalelem ganahewana yai ya falibamiu. Haꞌa ami atahi, na hige au peꞌi!
Ginauli doha ite, beyabeyana ya tubu, e higeꞌe? Higeꞌe! Fuyana Guyau ena fuya bwaꞌibwaꞌina dodoga ya ginaulidi tanoꞌubu yai, haga au nuwatuhui. Tanoꞌubu mahudoꞌina au yoꞌoi! Hige yaubada hesa, ginaulidi doha ite i ginaulidi.
39 Aho te, bena wa nuwatuhui mate, Guyau in Yaubada galewa hewa wananahana yai yo tanoꞌubu yai. Hige Yaubada hesa. 40 Ena laugagayo E felemiu, aho te, bena ami lau watanidi, be haba umi yo laulauwewemiu ami miya loholoho yo emi miya ya lofa, nuꞌu, Guyau emi Yaubada ya felemiu ai lisina ee–, hige anadan.