17
Hoꞌowa Umeꞌehu yai
Auꞌaulaha 17:1-7
Isalaela mahudoꞌidi Sin Nuꞌuna Pitapitalina sa lau afulen. Guyau ena liba yai sa lau nuꞌu hesa - hesa. Lefidim yai edi palai sa peidi,* Edi palai mate yosiyosi ꞌwapidi yai sa ginaulidi. in moho amainiya hige hoꞌowa be haba adi ti nom.
Sa fatalapili Mose lisina yai, tiyen,
Hoꞌowa u felemai be ai nom.
 
Mose alinadi ya bui iyen,
Sidohana be Guyau ami lauꞌita? Emi nuwatuhu bena Guyau ibege i saguhida?
 
Na dodoga mate sa gadomagu be hola sa fafatalapili Mose lebena yai, tiyen,
Paꞌana somo Idipi yai wa foya fahimai be te laoma? Bena ma nanatumai yo ema yosiyosi gadomagu ya kamfunuhimai?
 
Yo fede Mose ya lauꞌuꞌula lau Guyau lisina iyen,
Somo haba dodoga te ai lisidi E ginauli? Begana haba sa lau umeꞌehuigu.
 
Guyau, Mose ya faliba iyen,
Isalaela babadadi haisa ma afa haidam au bwaꞌi. Em tuꞌe haꞌa wa fapaisowa be Naili Hoꞌowana wa lubi daili, u abi hinaga. (Auꞌaulaha 7:17)
 
Haba ai matam E obiyo umeꞌehu ai hewana, Sainai Tuꞌana yai. Tuꞌe u faꞌoiyen ai umeꞌehu, haba hoꞌowa ya didima be dodoga sa nom. Buka haisa ganahewana yai mate, tuꞌa hesana hesa ti uli: Holebi.
Yo fede, Mose doha ya ginauli Isalaela babada matadi yai.
Nuꞌuna hesana ya tole, “Masa yo Meliba,” paꞌana Isalaela sa fatalapili yo paꞌana Guyau sa lauꞌita fuyana tiyen,
Guyau maꞌeda, e higeꞌe? Hebelu Alinadi yai Masa aniyona mate lauꞌita yo Meliba aniyona mate fatalapili.
Amaleki sa Lei Hafihafitidi
Auꞌaulaha 17:8-13
Amaleki sa laoma be Isalaela sa tulufi lawedi Lefidim yai.
Mose ya libalau Diyesuwa lisina, iyen,
Dodoga haisa u abidi be Amaleki au hiyalaidi. Bobon haba tuꞌe Yaubada ya felegu E abi, na ai uduhuli hewana E obiyo.
10 Yo fede, Diyesuwa, Mose alinana ya lau watan, be sa lau Amaleki sa hiyalaidi, na Mose, Elon yo Hula mate, sa hasai uduhuli hewana yai. 11 Yena Mose nimana ya lau hitin mate, Isalaela edi adidili sa abi. In moho yena nimana ya tole lidiyen, Amaleki edi adidili sa abi. 12 Yena Mose nimana sa yahayaha, Elon yo Hula, umeꞌehu sa leyama be hewana yai ya taꞌai, na iti sadaina yai sa obiyo be nimana sa laulau hitin, sa toha didin yee–, maihala ya bulu.
13 Yo fede Diyesuwa, Amaleki ya lei hafihafitidi baineti yai.

*17:1 Edi palai mate yosiyosi ꞌwapidi yai sa ginaulidi.

17:6 Buka haisa ganahewana yai mate, tuꞌa hesana hesa ti uli: Holebi.

17:7 Hebelu Alinadi yai Masa aniyona mate lauꞌita yo Meliba aniyona mate fatalapili.