19
Isalaela Dodogadi Sainai Tuꞌana yai
Auꞌaulaha 19:1-21
1-2 Isalaela dodogadi Idipi sa lau afulen. Lefidim Nuꞌuna yai sa aulaha mate nawalahi luwaga sa ofi habahim sa mahano Sainai nuꞌuna pitapitalina yai be amainiya edi palai sa faꞌobiyodi, tuꞌa paꞌana yai. 3 Habahim Mose ya hasai Yaubada lebena na tuꞌa yai Guyau ya yoga lau lisina be ya faliba iyen,
Isalaela dodogadi iti Iyakobo laulauwewena u falibadi doha ite:* Guyau mate, Iyakobo hesana hesa ya tole Isalaela. Doga esega moho, na hesana luwaga. Aba Fatubu 32:28. 4 Somo E ginauli Idipi lisina yai haꞌa ami ita yo ami sibai sidohana E baheimiu be E leyamamiu lisigu, doha magesubu, natuna gubugubufwauna ya bahei mabena yai. 5 Be egu liba ibe ma nuwa ofi fahimiu ami lau watan yo egu yali nuwamiu yai ami abi didini, haba dodoga nuꞌu mahudoꞌidi ganahewadi yai E fasinabomiu, egu fatabu dodogadi paꞌana tanoꞌubu mahudoꞌina, Yau, enehegu. 6 Mahudoꞌimiu haba egu tau anꞌantalasam yo egu dodoga fafatabudi.
7 Yo fede, Mose ya fuyo lidi be babada ya yoga gogonidi. Habahim Guyau somo ya faliba, mahudoꞌina ya falibadi. 8 Na dodoga mahudoꞌidi ena liba sa bui tiyen,
Guyau somo ya falibam haba mahudoꞌina ꞌe ginauli.
Yo fede somo sa faliba wa, ya fuyo be Guyau ya faliba.
9 Guyau ya libalau Mose lisina iyen,
Haba yada dubadubana ai ganahewana E laoma lisim, be te libaliba. Haba dodoga sa atahi na haba um sa kawawananahaꞌem.
Habahim dodoga somo sa libaen mate, Mose ya lau be Guyau ena ya liba.
10 Na Guyau alinana ya bui iyen,
U lau dodoga lebedi be u falibadi mate aho yo bobon fadebasae enehena ti abi nonoha be edi nuwanuwatuhu yo laulau ti fadudulaidi yo edi kaleko ti kaisudi. 11 Na ai lahai fafaihonana bena haꞌa sa nonoha, paꞌana lahaina ni haba ai Sainai Tuꞌana E leta lidiwa na dodoga mahudoꞌidi haba sa itagu 12 Dodoga adi sigasiga tuꞌa paꞌana yai au tole fataiꞌilidi haba ibege sigasigadi ti diꞌoidi, na u falibadi tabu tuꞌa ni ti finahei e ti sigilau sadaina yai. Yena sai ya diꞌo, haba ami tala funuhi. 13 Bena ami lau umeꞌehui e ai kukupidu ami gwali, na tabu au abiꞌina. Dodoga yo yosiyosi ami ginaulidi doha. In moho, yena bwagigi sa yufi mate, dodoga tuꞌa ti finahe.
14 Habahim, Mose ya fuyo lidi dodoga ya falibadi be sa abi nonoha. Edi ginauli sa kaisudi, 15 na Mose ya falibadi, iyen,
Asubena au nonoha, tabu au luma gwaꞌu.
16 Lahai fafaihonana hwalahwalalana, namanamali yo palepalele na yada piꞌana laꞌilaꞌi, tuꞌa hewana yai ya taumahata, yo fede, bwagigi alinana laꞌilaꞌi sa atahi. Dodoga mahudoꞌidi ꞌwasabu ya kam fafatabubudi. 17 Mose dodoga edi palai yai ya auledi be sa lau tuꞌa paꞌana yai, Amainiya Yaubada sa failobahi. 18 Sainai tuꞌana mate gafu laꞌilaꞌi ya fakou buluhi, paꞌana Yaubada ya lidima doha oyagi alaꞌalana. Gafu afaꞌafa gigigibwalina. Nuꞌuna mahudoꞌina mate ya tuhutuhu.
19 Bwagigi alinana mate ya laꞌi wananaha, na Mose ya libalau Yaubada lisina, na palele luhana yai, Mose alinana Yaubada ya bui, iyen.
20 Yaubada ya lidima Sainai tuꞌana hewana yai, be Mose ya yogai hasaen. 21 Habahim Guyau ya libalau lisina iyen,
U fuyo lidi be dodoga u liba fanuwa tagudi tabu adi sigasiga ti diꞌoidi be ti laoma ti itagu; yena sa dudu be sa laoma, boludi haba sa peꞌi.
*19:3 Guyau mate, Iyakobo hesana hesa ya tole Isalaela. Doga esega moho, na hesana luwaga. Aba Fatubu 32:28.