48
Manase yo Ifelaim
Aba Fatubu 48:1-6, 13-21
1 Fuya fisa mulidi yai, Diyosepa ena sa liba tiyen,
Tamam ya asiyebo.
Yo fede nanatuna tatau Manase, yo Ifelaim maidana sa lau. 2 Iyakobo sa faliba tiyen,
Natum Diyosepa ya laoma lisim.
Yo fede ya faꞌadidili fuyoi be ya taꞌai ena aba eno yai.*Guyau mate, Iyakobo hesana hesa ya tole hinaga: be ai muli, hesa luwaga ya fapaisowaidi: Iyakobo yo Isalaela. (Aba Fatubu 32:28)
3 Iyakobo ya libalau Diyosepa lebena iyen,
Lusi nuꞌuna yai Yaubada Hewa Wananaha yai ya taumahata lebegu yai Kanana tanohina yai be amainiya ena faloholoho ya felegu, 4 na ya falibagu iyen, “Nanatum boludi haba E felem, na am hiti mulita haba sa famala boga yalayalaga. Yo tanohina haba E duwai wahawaham mulim yai edi tanohi otaꞌota fahina.”
5 Lahaina yai, hola hige ya laowa Idipi na nanatum luwaga tatau, Ifelaim yo Manase haꞌa sa tubu haba aiꞌegu; doha nanatugu tatau Leubena yo Simiyon. 6 Yena nanatum hahaisa sa tubu mulidi yai, mate um enehem; Na ai muli tanohina sa soiyen mate Ifelaim yo Manase ai hesadi haba nanatum hahaisa edi tefa sa feledi.
13 Diyosepa ya abilau wawaya luwaga nimadi yai, Ifelaim ya sana lau Iyakobo seuseulina yai, na Manase ya sana lau Iyakobo sibana yai, habahim ya lawedi tamana fadidina yai. 14 In moho Isalaela nimana ya lau fabaladi be sibana yai ya abilau tau mulita Ifelaim boluboluna yai, na seuseulina yai ya abilau tau tuwaha Manase boluboluna yai.
15 Habahim ena faloholoho Diyosepa ya felen na iyen,†Lausoisoi 15 yo 16 yai, Iyakobo ena loholoho ya fele lawen Efalaim yo Manase lebedi. Iti mate Diyosepa nanatuna luwaga. Yo fede, fuyana ena loholoho ya feledi, Diyosepa ena loholoho ya felen hinaga.
Haba Yaubada, In logenana beyabeyana
afa tamagu Abelaham yo Isako sa famuli watan,
Yaubadana, in tau ita watanigu egu mwahuli mahudoꞌina
fuyandi yai ya laoma ee–, lahai te,
16 aneluna, in ya fofofahigu heyaheyaya mahudoꞌina yai,
In, logena, haba ena faloholoho wawaya te ya feledi.
Haba hesagu yo afa tamagu Abelaham yo Isako hesadi sa libalibaedi,
yo haba sa tadada ai tanoꞌubu hewana.
17 Maihalana yai Diyosepa ya ita mate tamana sibana ya tole Ifelaim boluboluna yai, be nuwana ya heyaya; yo fede ya abilau tamana nimana Ifelaim boluboluna yai, ya tohai na bena ya tole lawen Manase ai boluboluna.‡Edi nuwanuwa tuhu yai mate sibana ya hasai wananaha habahim seulina be gwama Iyakobo sibana ya tole boluboluna yai haba loholoho laꞌilaꞌina ya abi. Logena be Diyosepa ya tau hiti fuyanna Iyakobo sibana ya tole tau mulita boluboluna yai.
18 Yo fede, Diyosepa iyen,
Tamagu, Itete tau tuwaha. Ai sibam u abilau ai boluboluna.
19 In moho tamana ya ꞌwaiyoꞌo, be iyen,
E siba, natugu! In hinaga haba ya famala boga yalayalaga. In moho tasina haba ya laꞌi, habahim in, yo wahawahana haba sa tadada.
20 Lahaina yai ena faloholoho ya feledi, iyen,
Ai hesamiu haba Isalaela faloholoho sa fapaisowa be tiyen: “Haba Yaubada ya ginaulimiu doha Ifelaim yo Manase.”
Yo fede, Ifelaim ya tole bwaꞌiyen, na Manase muli yai.
21 Habahim Iyakobo ya libalau Diyosepa lisina iyen,
Egu foꞌo hanahanau haba ya nanau. In moho Yaubada haba maꞌem yo ya fafuyom afa tamam edi tanohi.
*48:2 Guyau mate, Iyakobo hesana hesa ya tole hinaga: be ai muli, hesa luwaga ya fapaisowaidi: Iyakobo yo Isalaela. (Aba Fatubu 32:28)
†48:15 Lausoisoi 15 yo 16 yai, Iyakobo ena loholoho ya fele lawen Efalaim yo Manase lebedi. Iti mate Diyosepa nanatuna luwaga. Yo fede, fuyana ena loholoho ya feledi, Diyosepa ena loholoho ya felen hinaga.
‡48:17 Edi nuwanuwa tuhu yai mate sibana ya hasai wananaha habahim seulina be gwama Iyakobo sibana ya tole boluboluna yai haba loholoho laꞌilaꞌina ya abi. Logena be Diyosepa ya tau hiti fuyanna Iyakobo sibana ya tole tau mulita boluboluna yai.