42
Diyobi ena Liba Ofiꞌofina
Diyobi 42:1-6
1 Habahim Guyau, Diyobi, alinana ya bui iyebom,
2 E siba mate um gonowana
ginauli mahudoꞌidi wa ginaulidi.
Em nuwatuhu hige aba guduna hesa.
3 Wa fatiꞌoigu uwe, “Sidohana ma nuwa afaꞌafam wa libaliba? Sidohana be egu nuwatuhu wa fafadosi fuyoꞌidi?”
Wananaha, E libaliba gaibu, doha tawa, “Ya siba.”
Ginaulidi sa loholoho wananaha, in moho hige egu sibasiba haba ya sai tawatawanim.
4 Guyau uwe, “Aho ite u ataꞌatahi! Haba E libaliba.
Haba E fatiꞌoim na egu bui wa felegu!”
5 Beyabeyana wasam E atahi,
na aho te, E ita, tau wananahaim.
6 Egu liba mahudoꞌina debana yai E taumayamaya be E taꞌai lidi gegebula yo afusa yai, egu nuwa bui fafaꞌilalana.
Liba Ofiꞌofina
Diyobi 42:7-17
7-8 Guyau, Diyobi ya faliba mulina yai, habahim ya libalau Teman dogana, Elifasi lisina, iyebom,
Um yo afa haidam luwaga E manabalaꞌemiu paꞌana liba dudulaidi E falibamiu hige au libaedi, na ami lau bwalabwala, hige doha egu tau paisowa Diyobi, in ya libaliba dudulai.
Emi yauyaule debana yai, aho te bulumakau tamoꞌanadi faligigi luwaga yo sipi tamoꞌanadi faligigi luwaga au abidi be au lau Diyobi lebena emi antalasam au gabudi. Haba emi ya lauꞌuꞌula na E atahi, be ibege ya fataumayamayamiu.
9 Habahim Elifasi, in Tema dogana, Bilidada, Suhu dogana yo Sofala, Namati dogana Guyau somo ya falibadi mate sa ginauli watan be Diyobi ena lauꞌuꞌula Guyau ya atahi.
10 Afa haidana faihona enehedi ya lauꞌuꞌula; mulina yai habahim, Guyau, Diyobi ya fagogo fuyoi. Ena ginauli asiꞌasinadi ya lau fadamahi fuyoꞌidi, yo hewadi yai hinaga ya falau tawa fuyoi. 11 Guyau pilipili mahudoꞌidi ya leyama lisina yai. Debana yai afa haidana, afa lolofuna yo safalumadi Diyobi sa sibai sa laoma ena luma be maꞌedi sa anꞌangogo. Ena kamkamna ganahewana yai maꞌedi amainiya yo nuwana sa liba fatalu. Edi ainauya hesa - hesa ena siluba yo beya adi salusalu gole yai sa ginaulidi, sa felen.* Hebelu alinadi tiyen “Him kesitah” mate siluba monina hesa na mwahuna yo maisana sa fakau.
12 Fuya mulimulitadi yai Guyau, Diyobi ya ainauya diꞌoi, habahim fuya bwaꞌibwaꞌina yai. Be aho te,
ena sipi 14 tausan,
kamela 6 tausan,
bulumakau 2 tausan,
yo ena donki 1 tausan.
13 Yo nanatuna sa peꞌi tatau faligigi luwaga yo wawahin faihona, ya falau damahidi.
14 Natuna waihin bwaꞌibwaꞌina hesana ya tole Demaima, fafaluwagana hesana Kesiya na fafaihonana hesana Kelen-Hapuka.† Hebelu alinadi yai hesa te, ataꞌatahidi sa loholoho na esega - esega ma aniyona. Demaima aniyona mate waliliya, Kesiya aniyona mate Cassia - itete mate Sinamon, ginauli hesa panepanena yo hahahana. Taudi ya fafapane loholoho na Sinamon hinaga sa fapaisowa fwalawa gabugabu yai yo lau buꞌa yai. Na Kelen-Hapuka aniyona mate dona, na ganahewana yai mata adi penta ya otaꞌota. 15 Diyobi nanatuna hasaladi sa loholoho wananaha habahim wawahin hahaisa nuꞌu mahudoꞌina yai. Tamadi ena ginauli ya daili be nanatuna hesa - hesa ena ya felen, nanatuna tatau yo wawahin mahudoꞌidi ya fagonafidi.
16 Mulina yai Diyobi ya miya lofalofa ee–, boliman 140, be afa wahawahana yo nanatudi sa tubu hinaga ya itadi. 17 Ya tautaulaꞌi wananaha, habahim ya peꞌi.
*42:11 Hebelu alinadi tiyen “Him kesitah” mate siluba monina hesa na mwahuna yo maisana sa fakau.
†42:14 Hebelu alinadi yai hesa te, ataꞌatahidi sa loholoho na esega - esega ma aniyona. Demaima aniyona mate waliliya, Kesiya aniyona mate Cassia - itete mate Sinamon, ginauli hesa panepanena yo hahahana. Taudi ya fafapane loholoho na Sinamon hinaga sa fapaisowa fwalawa gabugabu yai yo lau buꞌa yai. Na Kelen-Hapuka aniyona mate dona, na ganahewana yai mata adi penta ya otaꞌota.