7
Hitihalo Lau Faꞌatana
Maleko 7:1-13
(Matiu 15:1-9)
1 Falesiya yo laugagayo tau lau faꞌataenna hahaisa Yelusalem yai sa laoma be sa faꞌoigogo Yesu lisina yai. 2 Yesu tau famuli watanina haisa sa kalakalahe ma nima bidabidadi. Falesiya sa ita faheyayadi paꞌana edi laulau hige ti falau watan. 3 Falesiya yo Diusi mahudoꞌidi ibege ti kalahe gaibu, yena afa wahawahadi edi laulau sa laulauwedi be nimadi sa kaisudi, mate haba sa kalahe. 4 Yena ai maketi sa fuyoma edi abiꞌabi sa falau watan be nimadi sa kaisudi, haba sa kalahe. Yo kaputi, gulewa, gaeba yo aba kalakalahe ginaulidi bena sa kaisudi.*Uliꞌuli haisa yai, “aba eno” sa tole hinaga.
5 Yo fede Falesiya yo laugagayo tau lau faꞌataenidi Yesu sa fatiꞌoi tiyen,
Sidohana be tau famuli watanim hige wahawahada edi laulau ti lau watanidi na ma nima bidabidadi sa kalahe?
6 Yesu alinadi ya bui iyen,
Umi dodoga bwalabwalamiu! Isaiya ya liba dudulai fuyana ya libaemiu, ena uliꞌuli yai iyebom, “Yaubada, iyen,
‘Nuwa maitimiu yai Guyau ami fadebasae.
7 Yo ita eda laugagayo moho dodoga ami fatalahadi!” (Isaiya 29:13)
8 Yaubada ena laugagayo ami tole hudoꞌiyedi na dodoga edi lau faꞌata ami lau watanidi.
9 Yesu ya falibadi iyen,
Yaubada ena laugagayo ami ꞌwaiyoꞌoꞌen, na emi lau faꞌata bena ami lau watanidi. Hige i loholoho!
10 Yo fede Mose ya falaugagayodi iyen, “Tamam yo tinam u faꞌatitiyedi. Yena sai tinana e tamana ya liba faheyayadi dogana bena sa wunui.”
11-12 In moho emi lau faꞌata yai auwen, “Yena sai hige i fanuha bena tinana e tamana i saguhidi haba ena aba anfale ya libaen iyen, ‘Ite Koban (aniyona mate Yaubada ena ainauya), be tamana yo tinana ibege i saguhidi.”
13 Laulaudi te debadi yai Yaubada ena liba ami kaiwegowegogoꞌen paꞌana abiꞌabi ouꞌouli ami ginaulidi doha itete, be emi lau faꞌata ami fapaisowadi dodoga lisidi yai.
Somo Haba Doga ya Fabida Ginaulina.
Maleko 7:14-23
(Matiu 15:10-20)
14 Yesu, baiwa ya yoga fafuyodima lisina be iyen,
Mahudoꞌimiu, au ataꞌatahi haba ami sibai, 15 kalahe ami an, ibege i fabidahemiu. Na liba heyaheyayadi moꞌamiu yai ami libalibaedi mate iti logedidi haba sa fabidahemiu. 16 Au ataꞌatahi komakoman!†Uliꞌuli haisa yai mate, lausoisoi te hige ti uli.
17 Baiwa ya lau afulen, na ya lau luma ganahewana habahim tau famuli watanina heyaheyasonna te aniyona sa fatiꞌoi.
18 Yesu alinadi ya bui iyen,
Umi hola ma nuwa supusupumiu! Sidohana be hige au nuwatuhu lobahi? Hige somo ganamuli yai i luhulau doga ganahewana haba i fabida, 19 paꞌana ya lau boga yai moho be ya kalamahano fuyo. Hige i luhulau nuwanuwana.
(Liba te debana yai Yesu iyen, “Kalahe mahudoꞌidi ibege ti fabidaheda.”) (Paisowa 10:15)
20 Na hinaga ya liba iyen,
Somo doga ganahewana yai ya hala liwaꞌen mate logena ya fabida. 21 Paꞌana doga nuwana ganahewana yai, be nuwatuhu heyaheyayadi sa kalamahano doha:
nuwatuhu heyaheyayadi,
luma gwaꞌu hudoꞌi - hudoꞌi,
angafu,
aiyunu,
doga hesa lahuna maꞌena sa luma gwaꞌu, (Lewitikusi 20)
22 anduma,
laulau heyaheyaya,
laulau bwalabwala,
luma gwaꞌu nuwanuwatuhudi,
nuwa elaꞌela,
lau mwanunu,
nuwa saesae,
yo nuwatuhu yauyaule–, 23 Ginauli heyaheyayadi mahudoꞌidi te, mate ganahewadi yai sa laoma be sa fabidaheda.
Waihin Hesa ena Sunuma
Maleko 7:24-30
(Matiu 15:21-28)
24 Galili nuꞌuna Yesu ya lau afulen na ya leu Taya nuꞌuna. Ya mahano lau mate ya lau luma hesa ganahewana paꞌana hige i fanuha bena sai i sibai mate in amainiya. In moho hige gonowana i miya alasimo. 25 Yaluwa heyaheyayana mate waihin hesa, natuna waihin ganahewana yai. Waihin wasa ya atahiyen mate Yesu ya laoma, yo fede ya lau be ya hoba lidi ahena yai. 26 In mate Giliki Waihinina Fonika Nuꞌuna yai ya tubu, Siliya ganahewana yai. Yesu ya anꞌetai bena yaluwa heyaheyayana natuna ganahewana yai ya liba dui.
27 Yo fede Yesu iyen,
Hola wawaya ti kalahe bwaꞌi! Hige i loholoho bena wawaya adi kalahe ta peidi be ꞌwayowa ti anidi. (Paisowa 10:28-29 yo 15:8-9)
28 Waihin Yesu alinana ya bui, iyen,
Baꞌisa, wawaya adi mapula tebolo ubuna yai haba ꞌwayowa sa anidi!
29 Yo fede Yesu ya libalau waihin lisina iyen,
Em bui ni debana yai u fuyo em luma, haba wa fawananaha mate yaluwa heyaheyayana natum ganahewana yai haꞌa ya kalamahano.
30 Ya mahano fuyo mate natuna ena aba laulau eno yai Yaluwa heyayana haꞌa ya lau afulen.
Taumoho Doꞌodoꞌona
Maleko 7:31-37
31 Taya Nuꞌuna Yesu ya lau afulen na ya lau Sidon be Dekapolisi ‡Dekapolisi aniyona mate “Taon Safuhudohudoꞌi” Giliki alinadi yai. edaꞌedana ya lau watan ya lau Galili Gabogabona. 32 Amainiya taumoho hudoꞌi beya tuituina yo libaliba gesana dodoga sa leyama lisina. Yesu sa anꞌetai bena nimana ya tole lawen ai hewana. 33 Yo fede dodoga pwaludi yai, ya foya hudoꞌiyen be nimana gigidi ya tole lawedi beya sogona yai. Habahim ya kaniso na ya abilau lelona yai. 34 Na Yesu ya itaꞌita hasa galewa yo fede ya nahasi iyen,
Haa–, Efata!
(Diusi alinadi yai, aniyona mate “Beyam ti taꞌafasi!”)
35 Yo fede taumoho wa beyana sa taꞌafasi yo liba ya libaedi mate sa dudulai. 36 Muliyai Yesu dodoga ya falibadi iyen,
Tabu au fatala libalibaen.
In moho sa fatala libalibaen.
37 Salumadi sa atahiyen sa noꞌo wananaha tiyen,
Somo mahudoꞌina ya ginauli sa loholoho! In gonowana tau beya tuitui ya faloholohodi be beyadi sa taꞌafasi yo tau libaliba gesa sa libaliba!