11
Yelusalem yai, Dodoga Yesu sa Fadebasae
Maleko 11:1-11
(Matiu 21:1-11; Luka 19:28-40; Diyon 12:12-19)
1 Sa mahano lau Betifegi yo Betani, Oliwe Piuna sadaina yai, na Yelusalem sa hanahanaui be Yesu ana hewahewali luwaga ya fatamalidi.
2 Na iyen,
Au lau nuꞌu hesa matamiu yai. Yena ami mahano lau haba donki natuna ami ita. Amainiya sa fadaꞌi na hola hige sai i awai. Au tatafahi be au leyama. 3 Yena sai iyen, “Somo ami ginaginauli?”
Mate au faliba auwe, “Guyau ya fanuha. Na haba ꞌe fatamali fafuyoyama.”
4 Yo fede sa lau be donki natuna sa ita edaꞌeda yai, na sa auꞌaui luma hafohafona yai. Sa tata 5 na dodoga haisa amainiya sa obiꞌobiyo tiyen,
Hei! Ami tata be?
6 Na Yesu somo ya falibadi, enehedi sa liba be donki wa sa nuwaꞌen.
7 Sa lawen Yesu lebena. Adi luhuluhu donki taulina yai sa hesedi, habahim Yesu ya taꞌai hiti. 8 Dodoga boludi adi luhuluhu sa hesedi edaꞌeda yai na haisa oyagi lagadi ma lugulugudi gabu yai sa talafahidi, be edaꞌeda yai sa hesedi. 9 Tau bwaꞌi yo haisa tau lau wata sa laulau yogayoga, tiyen,
Hosana, Yaubada te fadebasae!
In, Guyau hesana yai ya laoma - Yaubada ena loholoho i felen!
10 Yaubada ena loholoho ya feleda paꞌana aho te ada ulutubu Deiwidi ena tanuwaga laulaudi haba Yesu ya abi hitin fuyoi! Hosana, hewa wananahana yai! Yaubada te fadebasae!
11 Yesu ya mahano lau Yelusalem, be ya luhulau Dubu Tabuna dobidobina yai, be ginauli mahudoꞌidi ya ita sipoidi. Maihala ya ofi, yo fede maꞌana hewahewali safuhudohudoꞌi luwaga sa lau Betani.*Diusi Duba Tabuna o Antalasam Lumana mate esega dumaduma, Yelusalem yai. Nuꞌu hahaisa yai mate Diusi edi aba oigogo lumadi moho sa faꞌobiyodi.
Yesu Oyagi Doha Kuhou ya Kaumananai.
Maleko 11:12-14
(Matiu 21:18-19)
12 Bobonna Betani yai sa fuyo Yelusalem na Yesu ya guliyam. 13 Manamanaꞌa yai ya itaꞌita lau be oyagi hesa doha kuhou luguna ya ita, yo fede ya lau be ya ita mate lugu afaꞌafana paꞌana hige ana fuya. 14 Habahim Yesu ya libalau oyagi ni lisina iyen,
Tabu u fuwa! Tabu sai hesa anꞌanim i an!
Na tau famuli watanina somo ya libaen, sa ataꞌatahi.
Yesu ya Lau Dubu Tabuna
Maleko 11:15-19
(Matiu 21:12-17; Luka 19:45-48; Diyon 2:13-22)
15 Sa mahano lau Yelusalem yai na Yesu ya lau Dubu Tabuna dobidobina yai. Tau uneꞌune yo tau maketi mahudoꞌidi ya fadabalaladi. Nuꞌu hahaisa edi moni tau laulau senisi edi tebolo ya buidi,†Loma edi moni sa senisidi, be Diusi edi moni sa fapaisowa Dubu Tabuna yai. yo ataiꞌa doha waliliya tau uneꞌuneidi edi aba taꞌai hinaga ya buidi. 16 Yo Yesu iyen,
Tabu sai hesa somo laꞌi u leyama ai Dubu Tabuna dobidobina.
17 Na habahim dodoga ya fatalahadi iyen,
Buka Tabuna yai sa uli mate Yaubada iyen,
“Egu Dubu Tabuna mate nuꞌu mahudoꞌina edi aba lauꞌuꞌula.
Na umi ami fapaisowa be ya famala tau angafu edi aba alasimo.” (Isaiya 56:7; Delamaiya 7:11)
18 Tau antalasam babaꞌisadi yo laugagayo tau lau faꞌataena liba ni sa atahiyen yo fede edaꞌeda sa yoꞌo bena Yesu sa wunui. Sa ꞌwasabuwen paꞌana baiwa mahudoꞌina ena lau faꞌata sa noꞌoꞌen. 19 Maimailafina Yesu maꞌana hewahewali taonna sa lau afulen.
Oyagi Doha Kuhou Lau Faꞌatana
Maleko 11:20-26
(Matiu 21:20-22)
20 Bobonna ma hwalahwalalana edaꞌeda yai sa laulau na oyagi doha kuhou sa ita ya peꞌi. (Diyobi 18:16)
21 Pita ya nuwatuhui yo fede Yesu ya faliba iyen,
Tanuwaga, oyagi wa kaumananai wa, u ita, ya peꞌi!
22 Yesu iyebom,
Yaubada au kawawananahaꞌen. 23 E faliba dudulaimiu mate sai yena ya kawawananaha na tabu i nuwa luwaluwaga na ya libalau tuꞌa lisina iyen, “U lau, u lofe lidiyem ai gabogabo.” Mate somo ya libaen haba ya tubu.
24 Logena, E falibamiu yawa, “Lauꞌuꞌula yai, somo ami anꞌetai, bena ami kawawananaha mate haꞌa ami abi, haba Yaubada ya felemiu. 25 Somo ami ita faheyaya haidamiu lisadi yai fuyana ami mwaito be ami lauꞌuꞌula mate au nuwatuhu afuledi. Haba Tamamiu Galewa yai emi heyaya ya nuwatuhu afuledi.
26 “Yena dodoga edi heyaya hige au nuwatuhu afuledi mate Tamamiu galewa yai emi heyaya ibege i nuwatuhu afuledi.”‡Uliꞌuli beyabeyana hahaisa, lausoisoi te, hige ti uli.
Yesu ena Dudulai Fatiꞌona
Maleko 11:27-33
(Matiu 21:23-27; Luka 20:1-8)
27 Sa mahano fuyoma Yelusalem, be Yesu ya lau Dubu Tabuna dobidobina ya laulau tiga na tau antalasam babaꞌisadi, laugagayo tau lau faꞌataena, yo babada hahaisa sa laoma lisina. 28 Sa fatiꞌoi tiyen,
Dudulai somo wa fapaisowa be ginaulidi te wa ginaulidi? Yo sai dudulai te ya felem be wa ginauli doha?
29 Yesu alinadi ya bui, iyebom,
Fatiꞌo esega haba E fatiꞌoimiu, na buina au felegu. Habahim dudulai somo E fapaisowa be laulau te E ginaulidi emi E liba.
30 Au falibagu! Diyon ena fafababasito somo yai ya laoma? Galewa yai e dodoga lisidi yai?
31 Yo fede tau antalasam babaꞌisadi yo laugagayo tau lau faꞌataena ibodi sa fadosi tiyen,
Yena tawa, “Galewa yai,” haba iyen, “Sidohana Diyon hige au kawawananahaꞌen?” 32 Na yena tawa, “Dodoga lisidi yai–, mate sa ꞌwasabuwedi paꞌana dodoga mahudoꞌidi edi nuwatuhu mate Diyon in peloweta wananaha.”
33 Yo fede Yesu alinana sa bui tiyen,
Hige ai siba.
Yesu ya falibadi iyen,
Yau hinaga dudulai somo E fapaisowa be laulau te E ginaulidi ibege ya falibamiu.