2
Luta ya Paisowa Bowasi ena Gabu yai
Luta 2:1-23
1 Naomi hwabuna Elimileka efana hesa hesana Bowasi. In ya bada yo ya mahula.
2 Fuya esega, Luta ya libalau Naomi lisina, iyen,
Ibe wa liba afulegu, E lau dodoga edi gabu yai, be tau paisowa kalahe somo yai sa lau afuledi E tanoꞌidi. Egu siba gonowana nuwana, doga hesa haba ya itagu, yo haba ya fanuhagu, be ai lisina E paisowa.
Luta alinana Naomi ya bui, iyen,
Natugu, u lau!
3 Yo fede, Luta ya lau gabu hesa yai, be tau paisowa mulidi yai ya lau, be kalahe sa lau afuledi, ya tano gogoidi. Nuwa supu yai ya lau Bowasi ena gabu yai.
4 Hige walolona Bowasi, Betelehem yai ya mahano fuyoma, be tau paisowa ya lautoꞌiyedi, iye,
Yaubada maꞌemiu.
Na iti, alinana sa fafuyo, tiyen,
Yaubada i saguhim.
5 Bowasi ya fatiꞌo lau tau paisowa edi baꞌisa lebena, iyen,
Waihin hasahasalana ni, sai?
6 Tau paisowa tau ita watandi alinana ya bui,
Waihin te, laolaoma. Mowabi yai maꞌena Naomi sa fiyoma.
7 Na ya anꞌetaigu, iyen,
U abigu be tau paisowa ai mulidi, anꞌan ya tano. Haꞌa ya paisowa fatubu hwalahwalala yai, be atabahim, logulogu yai ya anyawasi.
8 Yo fede, Bowasi ya libalau Luta lebena yai, iyen,
Hola ya fatalaham. Tabu kalahe ai gabu hesa u tano. Aiteꞌi moho, egu tau paisowa ma afa haidam. 9 U itaꞌita lau somo yai sa paisowa, bena ma afa haidam, Haꞌa egu tau paisowa tatau E falibadi yo E laugagayoꞌedi, ibege ti fasinam. Na yena gadom ya magu, u lau be hoꞌowa sa yahi kaulidi, am u nom.
10 Luta ya dulu lidi ena faꞌatiti ya ginauli, na ya libalau Bowasi lebena, iyen,
Yau taꞌowawa. Sidohana be wa modeꞌegu? Yo paꞌana somo wa abi loholohoꞌigu?
11 Bowasi alinana ya bui iyen,
Haꞌa E siba, lawam ena ginauli mahudoꞌidi wa ginaulidi, lahum ena fuya peꞌi mulina yai. E siba sidohana tamam, tinam yo em nuꞌu wa lau afuledi, na wa laoma, beyabeyana dodoga hige u sibaidi, lisimai yai wa miya. 12 Somo wa ginauli, haba Yaubada ya famaisam, be maisam mahudoꞌina haba wa abi Isalaela eda Yaubada lebena yai, haba loguloguna yai ya bobodiyem. In lebena yai wa laoma, mwahuli wa abi.
13 Bowasi alinana Luta ya bui, iyen,
Baꞌisa, um wa loholoho wananaha lebegu yai. Nuwagu wa faꞌadidili, paꞌana wa abi komakomanigu. In moho, E nuwatuhui mate, yau hige em tau paisowa laꞌi maꞌegu gonogonowamai.
14 Kalahe fuyana yai Bowasi ya libalau Luta lisina, iyen,
U laoma, be fwalawa tefana u abi, na u bwalui ai liꞌu.
Yo fede, ma afa haidana tau paisowa sa taꞌai, na Bowasi kalahe gabugabudi haisa ya fatamali lawen lisina. Ya anꞌan ee–, bogana ya yahayaha. In moho, ana kalahe ya antole; hige i faꞌofidi. 15-16 Habahim, ya aulaha be ya fuyo gabu. Ana ya tano boda. Muli yai Bowasi ena tau paisowa ya falibadi, iyen,
Au ita afulen, tabu somo au libaen ai lebena. In moho, gabu anꞌandi pilidi yai, haisa au solu fahidi be au lau afuledi, haba ai ana ya tanoꞌidi.
17 Amainiya Luta ana kalahe ya tano gogo ee–, ya mailafi. Na ya abi lisi mate, begana haba 10 kilograms ya lobahi. 18 In kalahe ya tanoꞌidi, na ya fuyo edi nuꞌu be lawana ya faꞌita, oulina fisa, yo hinaga anꞌan antoledi ya felen.
19 Naomi ya fatiꞌo lau Luta lisina, iyen,
Somo yai wa tanoꞌidi? Sai ena gabu yai wa paisowa? Haba taumoho ni Yaubada ya fanuwa loholoho, paꞌana ya abim be wa paisowa.
Yo fede, Luta, Naomi ya faliba mate Bowasi ena gabu yai ya paipaisowa.
20 Naomi ya libalau lawana lebena, iyen,
Guyau ena faloholoho Bowasi ai lisina! Ena liba fasunuma tau mwahuli yo tau peꞌi lisidi yai hige ofina!
Yo ya liba fiyo, iyen,
Taumoho ni ama hwahwayasa hesa wananahana. In tau ita watanimai.* hwahwayasaaniyona mate tau peꞌi afa efana haba edi hwabu sa fai.
21 Luta Bowasi alinana ya libaen, Hinaga iye,
Bena ma afa haidagu, ena tau paisowa, ꞌe paisowa ee–, ꞌe lau gabu faꞌofi.
22 Na Naomi ya libalau Luta lebena, iyen,
Ihi–, Natugu, loholohona mate wawahin ni ma afa haidam au paisowa Bowasi ena ai gabu. Yena doga hesa ena ai gabu wa paisowa ibe ti iwalaim.
23 Yo fede, maꞌedi Luta bali yo witi gabudi luwaga sa lau gabu ofinidi. Na amainiya ma lawana sa miya esega.