Hibru
1
Negur Naal Engel Wal Fedif
Kulu Negur, profet bunem, sain musei ado naab fire fire bun, tubuda tar wogõ fiyẽdin, anĩ ere, gama idikeleya naa enidi bun, ĩ Naal bunem wogõ fadan, Naal ĩ ereb ereb ganan akorouf nigin Negurem igirnen, ĩ bunem saa teneub ado inon. Naal ĩ Negur nẽ fula fiya medeĩya nẽ so fiya, ĩ Negur yogo gen bagai, in od totol ado bunem ereb ereb ganan megeir irou ifaref. Ĩ mosor lilik fiya anĩ age fel fen, saa ilun Negur Megeir Bagai ima biyalẽ ibodon. Negur, Naal yana ifenen are engel yeneid wal fiya, age fiya bagai, Naal ĩ engel wal fediya.
Ere nigin, Negur ĩ yogon engel taka to eig ye irokenen,
“Õ neu Kesu,
gama aya õ Tamã wõ aul.”* Sam 2:7
Takag, Negur ĩ engel taka nigin to eig ye iron,
“Aya yogon Tama abodõf,
ĩ neu Kesu ibodõf.” 2 Samuel 7:14, 1 Stori 17:13
Takag, Negur ĩ yogon kesu matu tenebur ein irou isif sain bun, ĩ baban irok,
“Negur nẽ engel ganan ĩ seli dalouf.” Diuteronomi 32:43
Negur ĩ engel nigin irok,
“Ĩ yogon engel yau gen wowã douf nigin inodif,
ĩ yogon kabĩ tamo yã bale gen wowã douf nigin inodif.”§ Sam 104:4
Anĩ ere, Negur ĩ Naal nigin irok,
“O Negur, ogon tano gai gai ibodkalauf,
õ ogon tano tobonunã madur bagai bun lo wouf.
Õ tobonunã madur bagai nigin waũ laaf fen, tobonunã sane anĩ sese wedig,
anĩ nigin, Negur, ogon Negur kulĩya nẽ moul õ bun fi felen,
anĩ bunem, nẽ tã tar wal feid fen, ilun inenon.”* Sam 45:6, 7
10 Takag, ĩ irok,
“O Odug, gariya bun õ teneub nẽ gariya kare won,
õ imam saa unon.
11 Idi fau inanakalauf, anĩ ere, õ fau ubodõf,
idi ganan kolos gen sanef ilauf.
12 Õ idi saket gen kori wediyouf,
idi kolos gen falei wediyouf.
Anĩ ere, õ ubodok gen ago ubodõf,
ogon sain to idikalauf.” Sam 102:25-27
13 Negur ĩ yogon engel taka to eig ye irokenen,
“Imau biyalẽ ubod mog,
ogon kiwai tar
õ yẽ inoya nẽ sawa anouf.” Sam 110:1
14 Age fiyauf are, engel idi ere? Idi uur Negur nẽ kabĩ daledig, tamo kayau isennẽya dalouf anidi disennẽdiyouf nigin Negurem idi sur fedidig.

*1:5: Sam 2:7

1:5: 2 Samuel 7:14, 1 Stori 17:13

1:6: Diuteronomi 32:43

§1:7: Sam 104:4

*1:9: Sam 45:6, 7

1:12: Sam 102:25-27

1:13: Sam 110:1