Mak
1
Jon Naan Igunẽdiya Tamo Naab Dodok Fenen
(Matyu 3:1-12; Luk 3:1-18; Jon 1:19-28)
Jesus Kristus, Negur Naal nigin, biya od gariya inoya.
Profet Asaia nẽ itotoya bun ibodok:
“Aya neu arũ tamo ĩ ket sur afe di, ĩ uyu ilauf,
ogon naab dodok fouf.”* Malakai 3:1
“Ait taka gerere tuan iweig irok,
‘Odug nẽ naab dodok ge fen,
madur wenẽg.’ ” Asaia 40:3
Age fiya nigin, Jon isin, tamo kayau gerere tuan od irokenẽdi di, waud falei del, nedi mosor yaleleya nigin naan igunẽdin. Judia kalilĩ fiya, Jerusalem tamo kayau ganan, ĩ garan dilen. Idi neid mosor kurõ difesi di, idi im Jordan naanũ naan igunẽdin. Jon kamel siwi nem gabar diwan anĩ ifonũdig. Agef fen, gaar gabar nem lũ diwan anim luwa gu fedig. Ĩ totobi nin te ado yõdig. Eĩ enĩ yogon od iron, “Taka ĩ aya dumeun dõ fiyauf, anĩ ere, in megeir neu wal fiya. Aya to biya nigin, iborou bobou fe fen, in ye su nẽ malũ biru fiya kisi feleya sã. Juda neid tobonunã anĩ, sain tamo yana ado isi di, idi neid kabĩ tamo in ye su nẽ malũ biru difedig. Aya naan nem aguneik, anĩ ere, ĩ Awa Uur Fateulem iguneĩf.”
Jesus Naan Igun Ado Ĩ Bun Kisi Fiya Wõ Yen
(Matyu 3:13-4:11; Luk 3:21, 22; 4:1-13)
Sain anĩ bun, Jesus Nasaret taun oun Galili nediwom isi, Jonem Jordan naan igunen. 10 Jesus naanum fã yale fen, ĩ lof mog, saa tano kãf fen, Awa Uur kuburir gen, ĩ bun isi mog, ilen. 11 Age fe di, ait taka saa ilunem isin, “Õ neu Kesu, õ nigin aya wau laa fedig, õ nigin aya wau kulĩ yedig.”
12 Kaisã bagai, Awa Uurem sur fiyẽ di, gerere tuan ilen. 13 Ĩ gerere tuan an, naa foti ibod mog, Satanem kisi fiyen. Ĩ gaar kuĩ geid difar mog, engel idim anĩ ĩ disennen.
Jesus Nẽ Dõ Fiya Tar Uyulil Iweignẽdin
(Matyu 4:12-22; Luk 4:14, 15; 5:1-11)
14 Jon kalabus bun dinenen ibod mog, Jesus Galili ile, Negur nẽ biya od anĩ kurõ feis iron. 15 Ĩ iron, “Sain mogo isil. Negur nẽ tano mogo melsak. Wauĩ falei wog fen, biya od enĩ nigin wauĩ momoi gei!”
16 Jesus Galili maaĩ yeri iyo ken, ĩ Simon, ne tura Endru ado, daliyou bun kakãg dirã mog, iledin, ere nigin, idi gau yaleya tamo. 17 Jesus iron, “Usig, dõ wiyag, aya ã tamo gei fiya nigin aneyeĩf.” 18 Sain anĩ bun bai, nedi kakãg ditor ken, ĩ dõ difiyen.
19 Sain ĩ naal iyok ile fen, ĩ Sebedi naal Jems, tura Jon ado, waag namen, idi neid kakãg dodok dife mog, iledin. 20 Kaisã bagai, ĩ iweignẽdin. Age fe di, idi temeid Sebedi, in kabĩ tamo oroi yaledin anidi geid waag bun ditorneĩd fen, Jesus dõ difiyen.
Jesus Kaa Sane Irun
(Luk 4:31-37)
21 Idi Kapenaum taun dilen. Sain Juda neid uub naa Sabat wõ ye di, Jesus Juda neid uub fõ namen ile fen, od ifelnẽdiya gariya inon. 22 Tamo kayau in od nigin terẽ den, ere nigin, ĩ tamo yana adom gen ifelnẽdin, ĩ lo ifelnẽdiya tamo gen sã. 23 Agef mog bai, tamo taka kaa sanem irounen anĩ, nedi uub fõ namen an kaĩ ye iron, 24 “Õ amã ere naig wamã fenẽ, Jesus Nasaret tamal? Õ amã daig wamã fenẽ nigin usil de? Aya õ nigin keleĩ, Negur nẽ Fateul bagai!”
25 Jesus totol ado iron, “Foro wol! Ĩ namen tamal ulõ weis!” 26 Kaa sane, tamo anĩ totol bagai yokũ fiyẽ, sur fiyẽ, ira ken, kaĩ ye, ulõ yesin.
27 Tamo kayau ganan terẽ de fen, abob toti difen, “Eĩ ere? Keleĩ mata, agef fen, totol ado! Ĩ irõ di, kaa seseneg dõ difedig.” 28 Ĩ age fen anĩ nẽ od kaisã bagai, Galili kalilĩ fiya fonõ anĩ adok iyokelen.
Jesus Musei El Fedin
(Matyu 8:14-17; Luk 4:38-41)
29 Sain Juda neid uub fõ ditor ken, kututũ desin, idi Jems Jon ado weim, Simon Endru ado neid fõ bun dilen. 30 Simon nẽ mam, ĩ bouwa uruwa odug ado nigin fatarẽ yenen, anĩ idi ĩ nigin Jesus dirokenen. 31 Anĩ nigin, Jesus kayau wagen ile, kayau ima yales irou isennẽ di, fã yen. Age fe di, bouwa uruwa anĩ kayau folo fiye kele di, kayau ĩ aruneid yalen.
32 Aragau anĩ bun gaa kuru kel mog, tamo kayau dagi adodo, kaa sesen adodo ganan, Jesus wagen guri difeid, disin. 33 Taun anĩ nẽ tamo kayau ganan, fofomala anĩ bun guru difen. 34 Anĩ bun, Jesus, tamo kayau dagi fire fire adodo musei el fiyẽdin, kaa sesen musei irudi di, diyawon. Anĩ ere, kaa sesen idi ĩ nigin kelein. Anĩ nigin, idi to wogõ douf nigin sigoreid ifofan.
Jesus Moilin Negur Kosẽ Fiyen
(Luk 4:42-44)
35 Bonimei bagai mumurei ado, Jesus fã yale, fõ itor, moilin ile, an Negur kosẽ fiyen. 36 Simon ĩ, ne tã tar geid dimirne ken, dilen. 37 An fotou difiye ken, idi dirokenen, “Tamo kayau ganan õ dimirnok!”
38 Jesus aitedin yale iron, “Ada uyu takã talauf, fonõ melsã anĩ bun. Aya aneg od arõf, anĩ nigin aya asin.” 39 Age ye fen, Jesus Galili kalilĩ fiya ganan bun iyo ken, nedi uub fõ fõ bun od iro ken, kaa sesen irudi di, diyawon.
Tamo Taka Lepra Dagi Ado
(Matyu 8:1-4; Luk 5:12-16)
40 Tamo taka lepra dagi ado, ĩ wagen isi, ibor bobou fe fen, igon, “Õ oroyõf are, el wiyauf.”
41 Jesus wau gudũf fen, ima irã, kobũ fiye ken, ĩ iron, “Aya wau irok, õ bouwã biyaf!” 42 Age ye di, kaisã bagai lepra guruma ĩ itornẽ di, bouwa biya len.
43 Jesus kaisã bagai totol bagai weder irou fen, sur fiyẽ di, ilen: 44 “Karĩ welei, enĩ aib taka to urokenẽf, anĩ ere, õ pris wagen ule, õ bouwã ufelnẽf, õ bouwã biyal anĩ nigin Moses nẽ od irok anĩ dõ fen, sesewi fiya wenẽf, anĩ bunem yaore di, tamo kayau dilouf.” 45 Anĩ ere, ĩ iyok ile fen, kurõ feis irõ di, od anĩ iyokelen. Anĩ nigin, Jesus mal atun taun taka bun to iledig, ĩ moilin ibodon. Anĩ ere, tamo kayau firen firen temeleid fau fau ĩ wagen disidig.

*1:2: Malakai 3:1

1:3: Asaia 40:3

1:7: Juda neid tobonunã anĩ, sain tamo yana ado isi di, idi neid kabĩ tamo in ye su nẽ malũ biru difedig.