1 Niŋgeb, diriŋne yago, asaŋ gabe mata buluŋ ma teŋ hinayiŋ yeŋ gago kaŋ hime. Goyenbe kurare soŋ heŋ mata buluŋ titekbe mata buluŋniniŋ halde duneŋ duneŋ niŋ Adoniniŋ Al Kuruŋ gusuŋaŋ irtek al kura hi. Yeŋbe Yesu Kristu, Al Huwak wor po. 2 Yeŋbe mata buluŋniniŋ Al Kuruŋ beleŋ halde dunwoŋ yeŋ nurdeb neŋ ge teŋ kamyiŋ. Kamyiŋ gobe neŋ ge po moŋ, alya bereya kuruŋ megen ga hike kwa goyen goke manaŋ kamyiŋ.

3 Be, neŋbe Al Kuruŋ beleŋ gwaha gwaha teŋ hinayiŋ dintiŋ goyen teŋ hitekbe fudinde Al Kuruŋ nurde uneŋ hite yeŋ nurde hitek. 4 Goyenbe al kura beleŋ, “Nebe Al Kuruŋ keŋkela nurde uneŋ hime,” yiyyeŋ gega, mata gwaha gwaha teŋ hinayiŋ yitiŋ goyen ma teŋ hiyeŋ al gobe usi al. Al gobe Al Kuruŋyen mere fudinde goyen biŋde ma hiyeŋ geb, gogo gwaha teŋ hiyeŋ. 5 Munaŋ al kura Al Kuruŋyen mere gama irde hiyeŋ al gobe fudinde wor po Al Kuruŋ niŋ amaŋeŋ nurde hiyeŋ geb, gogo gwaha teŋ hiyeŋ. Neŋbe mata gwahade teŋ hitek gab fudinde Al Kuruŋya hite yeŋ bebak teŋ hitek. 6 Niŋgeb al kura, “Nebe Al Kuruŋya har,” yiyyeŋ al gobe Yesu beleŋ mata igiŋ teŋ hinhin gwahade po teŋ hiyeŋ.

7 Be, kadne yago, nebe saba gergeŋ kura ma kaŋ duneŋ hime. Haŋkapya ne beleŋ saba dirmeke nuramiŋ goyen po sopte kaŋ duneŋ tihim. 8 Goyenbe saba gobe haŋka saba direŋ tihim goya tuŋande. Saba gote igineŋ fudindebe Yesu beleŋ mata teŋ hinhin bana goŋ mat kawan forok yeŋ hinhin. Irde matatiŋde wor kawan forok yeŋ hi. Gwaha teŋ hi gobe kidomare niŋ mata buluŋbe hubu heŋ hikeb hulsire niŋ mata igiŋ fudinde goyen bikkeŋ kawan heŋ kuruŋ heŋ hi geb, gogo gwaha teŋ hi.

9 Niŋgeb al kura, “Nebe hulsire hime,” yeŋ hi gega, kadom kura goke igiŋ ma nurde haram irde hi al gobe kidoma bana po hi. 10 Munaŋ al kura kadom niŋ amaŋeŋ nurde hi al gobe hulsire hi. Irkeb dufay buluŋ kura biŋde ma hi geb, epte ma soŋ heŋ mata buluŋde katyeŋ. 11 Goyenbe al kura kadom kura goke igiŋ ma nurde haram irde hi al gobe mata buluŋyen kidoma bana po heŋ gor niŋ mata po teŋ hi. Al gobe mata buluŋyen kidoma bana hi geb, kidoma gore diliŋ pet tike beleŋ ma keneŋ kuŋ hiyeŋ go gwahade goyen po, mata buluŋ po teŋ hi.

15-16 Niŋgeb deŋbe megen niŋ marte mata buluŋya dufay buluŋya kurayen kurayen kuruŋ goke amaŋeŋ ma nurde hinayiŋ. Mata megen niŋ mar beleŋ teŋ haŋyen gobe gahade: uliŋde po amaŋ hetek beleŋ niŋ naŋkeneŋ haŋ, irde det kura keneŋ tetek po yeŋ goke po nurde haŋ, irde detmiŋya matamiŋya goke yiŋgeŋ turuŋ turuŋ teŋ haŋ gobe megen niŋ marte mata. Mata gwahade teŋ haŋ kuruŋ gobe Al Kuruŋ hitte mat ma watiŋ. Mata gobe megen gar niŋ po. Niŋgeb al kura megen niŋ marte mata buluŋ goke amaŋeŋ nurde hi al gobe epte ma biŋde mat Adoniniŋ ge amaŋeŋ nuryeŋ geb. 17 Megen niŋ marbe hubu henayiŋ, irde mata buluŋ titek dufay go manaŋ hubu hiyyeŋ. Goyenbe Al Kuruŋyen dufay gama irde haŋ marbe yeŋya hugiŋeŋ hinayiŋ.

18 Be, diriŋne yago, nalu gayenterbe megeŋ gayen hubu hetek gobe binde heŋ hi. Nalu funaŋ binde hekeb Yesuyen asogo wayyeŋ yeke nurde haŋyen gwahade po, asogomiŋbe bikkeŋ budam forok yaŋ. Niŋgeb go mar goyen yeneŋbe nalu funaŋbe binde heŋ hi yeŋ bebak teŋ hite. 19 Mel gobe Yesu gama irhet irhet tikeb neŋya tumŋaŋ hinhet gega, dubul diraŋ. Mel gobe neŋya tumŋaŋ hitek moŋ. Munaŋ tumŋaŋ hitek manhan neŋya awalikde hitewoŋ. Goyenbe mel gobe neŋ dubul teŋ kuŋ Yesu asogo irde haŋ geb, matamiŋ goreb, “Neŋbe dende moŋ,” yeŋ dikala dirde haŋ.

20 Deŋbe Yesu beleŋ Holi Spirit duntiŋ haŋ geb, deŋ tumŋaŋ mere damiŋbe Al Kuruŋyen mere fudinde goyen bebakkeŋ nurde haŋ. 21 Niŋgeb asaŋ kaŋ hime gabe mere fudinde goyen ma nurde haŋ yeŋ gago asaŋ kaŋ duneŋ hime? Moŋ. Deŋbe mere fudindebe damiŋ goyen nurde haŋ, irde usi merebe saba fudinde goyenter mat ma forok yeŋ hi yeŋ nurde hime geb, asaŋ gago kaŋ duneŋ hime. 22 Niŋgeb deŋbe usi albe ganuŋ yeŋ nurde haŋ? Usi al gobe, “Yesube Mesaia moŋ,” yeŋ hi al gogo. Al gwahade gobe Yesu Kristuyen asogo wor po. Al goreb Al Kuruŋbe Yesu Kristu Naniŋ, irde Yesu Kristube Al Kuruŋ Urmiŋ goyen fudinde yeŋ ma nurde hi. 23 Niŋgeb al kura Al Kuruŋ Urmiŋ pel irde haŋ marbe Naniŋ wor pel irde haŋ. Munaŋ al kura Al Kuruŋ Urmiŋ nurd uneŋ haŋ marbe Naniŋ wor nurd uneŋ haŋ. 24 Niŋgeb saba haŋkapya dirmeke nuramiŋ gobe bitiŋde kerde keŋkela po gama irde hinayiŋ. Gwaha teŋ hinayiŋbe Al Kuruŋya Urmiŋ Yesuya irde hinayiŋ. 25 Irde gwaha teŋ haŋ marbe Al Kuruŋya hugiŋeŋ hinayiŋ yeŋ Yesu beleŋ biŋa tiyyiŋ goyen dunyeŋ.

26 Be, nebe mata buluŋde katnayiŋ yeŋ bitiŋ yawarniŋ kurut yeŋ haŋ mar goke hayhay dire yeŋ asaŋ gago kaŋ duneŋ hime. 27 Deŋbe Yesu beleŋ Holi Spirit dunyiŋ goyen deŋ bana hi. Niŋgeb al kura beleŋ epte ma saba dirtek haŋ. Holi Spirit yiŋgeŋ beleŋ damiŋbe fudinde goyen tumŋaŋ saba dirde hi. Irde sabamiŋbe fudinde usi moŋ geb, Holi Spirit beleŋ dineŋ hiyen gwahade po, Yesu Kristuya po hinayiŋ.

28 Be, diriŋne yago, hugiŋeŋ yeŋya hinayiŋ. Gogab yeŋ mulgaŋ heŋ megen gar waŋ waŋ nalureb keneŋ keneŋ niŋ kafura ma henayiŋ, irde memya ma henayiŋ. 29 Deŋbe Yesu gob al huwak wor po yeŋ nurde haŋ kenem alya bereya Al Kuruŋ diliŋde mata huwak teŋ haŋ mar gobe Al Kuruŋ dirŋeŋ weŋ yeŋ nurde hinayiŋ.