20
Ngictau kerec nadzicmiec
Yegecgareng yearu. Dawidingo mitiyegec yofi heiec.
1 KEBUNGO ebicnasou yoacgaac turunga merenggembeso. Yakoboac Anutu, yeac kpac kunengngo ge onggonggubeso. 2 Yeng womongaunac memefic suegenu Siong tikiunac heimefic anggema mang anggembeso. 3 Ge sese mema faiannec, yeng imoc sasawa negenu febeso nga sesegerecga ohoannec, imocac negenu ngereebeso. Selac
4 Ge wiac monggac heresongoga anu ye wiac imoc gembeso nga geng areng sasawa faina yeng imocac fora meficgegembeso. 5 Ge firang andanggac ubangerecac arohoma sogac sogai ambisina. Nenang Anutuninaac kpacfu firanggac ma kpedzini embeso. KEBUNGO kpesi kpesiga sasawa negemma foraya meficgebeso.
6 KEBUNGO ngictau meisinggema kerec nadzicmiec, ye ebicfunac mesiude, imoc yaguc negenduae. Ye kpetiac kurumengaunac yeac nunumuac turunga meremmima marifoiango faka kucgoc mema ye ebicfunac mesiu firang anude.
7 Ngic goa yeni dzikacac keretac negenggec wiac engena anu yoac homac osogecde. Nga goa yeni becosiac negenggec wiac engena anu yoac homac osogecde. Nga nenang KEBU Anutuninaac kpac kuneng negenserima negenni wiac engena ande. 8 Yeni kucngina kpac anu fafocnginango heima mayunuude. Nga nenang yacma hongngoc serima nannide.
9 O KEBU, ge ngictau meficgena firang ambeso. Neni kpacguni geng turunga merennemmena.