29
Anutuac kpakpac didiu fingecde
Dawidingo yegec yofi heiec.
O, anutu hania hania yeneac medacfocngina kucnginagoc kurumennu kecdae, ngeni KEBU eriendzong memibisia. Amma ngeni KEBUAC kuc kibikperagiagoc negensima eweheihei ammibisia. Ngeni KEBUAC kpara eweheiheigoc heiwayong memibisia. KEBU ye kpetiac, imocac ngeni ngonducnema numumibisia.
KEBUAC ubaudumeng imoc doku witinginau fingerude. Anutu kuc nga kibikperagia minginango kondungtoa witiau gbururung amma heiude. KEBUAC ubaudumeng imoc kuhagoc yombong. KEBUAC ubaudumeng imoc ngictauac ubaudumeng ande. KEBUAC ubaudumengngo yomondzoc ic kpetackeude. KEBUNGO Rebanong bangecac yomondzoc ic kpedzameyunuude. Yeng Rebanong bangec yoac edeu ye burumaka medaha isoc yuude nga Siriong bangec ye burumaka ngiwa isoc yuude.
KEBUAC ubaudumengngo gerecborang meficgema ukuyunuu singsararang kpegecde. KEBUAC ubaudumengngo bangec kisiu fingeru imocngo dzonoma fedeude. KEBUNGO Kadesi bangec kisi kpemindzaheude. KEBUAC ubaudumengngo kateburumaka yoac edeyunuu medacfocngina fingecgecde. Yeng ic maria kpemoronggedarude. Yeac womonnu yofi dema arohodacgecde, “KEBU eweheiheiagoc dengereni.”
10  KEBUNGO ngictau tatahau dokutunggbaung witiau tacde. Ye ngictau tatacfu tacma ngictau nasosoc kecengkefude. 11  KEBUNGO ngicngacfora kuc nemmema kenecnunuu ruaegoc kecbisina.