99
Anutu ye kpetiac
KEBU ye ngictau amma ye ngiha ngiha garengyunuu yeni dzonong fede fedegoc kecbisia. Ye kerobing botucnginau ngictau tatahau taru usocngo bangecfu mebeso.
KEBU ye Siong manau kunennina kecde. Ye engena amma ngiha ngiha sasawa feracyunuude. Geac kpacga imoc damu damuyagoc. Yeneng imoc dengerebisia. Kebu ye kpetiac.
Ngictau ye kuctoayagoc. Ye faka dindingac fingerudeac ammide. Geng faka mongang mongangga kpac, imoc faina seria fede. Ge Yakoboac areng yeneac botucfu faka angammemengina isinggema yoacfu desima sing dindingac modacma yoacngina desinec.
KEBU Anutunina ye kpetiac. Ngeni afehema yeac haniaac tatacfu ngonducnema numumibisia.
Mose nga Arong yereng yeac womong gareng habugoc kefoc nga Samue ye yeac kpac kuneng kpacma nunumu ua mekefec. Yeni desambic ammigec yeng negengyemmema turunga merengyemmekefec.
KEBUNGO hoeng mong hereatoaac manau tacma yoac edeyunuu yeni yeac dedekperagiyoac nga singyoac tofohoma kecgec. O KEBU Anutunina, geng ngicngac nunumunginaac turunga merengyemmenec. Ge kopocsic wawa Anutungina amma kopocsicnginaac turunga ifingoc merengyemmenec.
KEBU Anutunina ye kpetiac. Ngeni imocac amma afehema tiki kpetiacfu emma fafoc heimima numumibisia.