1 Dugup nugawa, Ayop nuga Iesu Keriso sia tauepi me den wainepen menan bongam nimanepi oisewa wadiaepena di anun. 2 Iesu wam mega gaseget taueni oisewa e anuyana, nop ame anu waramasene, bagu sisi ya anune. Anse, apan da eviwa noa namu wani gapan o opata da wani gapan o nu ok seatoni ap gapan oit ame ebo wat anune go? 3 Ame waenapan wam ame om mega menan aopan ya wababayan imaep. Iwa namu waenapan God wa tandayatain amba iup paina yamasini apanewa matagaeta ap ewap Iesu sia taueta. Wam ame ewap, iup paina yamasini apanewa merao arewa aeta. 4 Koewa Taini Apanewa ame god da da o waenapan da da wa atonat muminewa amba aigamup bawarewa mek wata. Me God mup paewa Ierusalem gapan gwanap ae wande aopan mek anega wata, “Ne God di,” anega wata. 5 Ne den tanae iningina wamewa gapan oit ap me wadiaingina sia anuiwanin go?

6 Koewa Taini Apanewa wam mega tauepi me venaseta go endi dim da wataniniwa e anuiwanin. 7-8 Koerage mega endi karaua ta aewan go Wataniniwa apanewa ame orup da wat nau aeta. Amba Koewa Tainiwa aroga taueta. Ap wamewa gapan me dim da tat anupi di tata. Amba Ayop Iesu taueta amba gaup upunepi gapan boeta. Iesu oya oya mega ganase den kimani visepi ganat ame gapan Koewa Tainiwa wat momageta.

9 Koewa Tainiwa Seitan aro mega ware taueta amba yo paua ugup ugup ebo aopan tata go tavewa uon. 10 Ebo aopan ugup ugup gapan waenapan wababayan mumep merao arewa amoin, iwa mu nop tavewa tandayasine menan inak ya warain. 11 Mu nop tavewa tandayat wane menan God nop eboewa anu warapen aroewa watu enen imumup taue bararaen. Imumup ap baraeni menan nop eboewa menan anuiwanum. 12 Waenapan ap anuiwanumampina nagirewa amba waenapan upinewa ame nop tavewa ya anu tumasene nagirewa amba koewa tat atonu den anune nagirewa God wanene mega gapan wa koeragam mumeta.

13 Dugup nugawa Iesu enan anuiniwa, tamanawa da ame nu wam wam enan God inap gaun waivin. Iwa wataget iragen me ganganat imae Guewa amun mega gapan potaya woup sep nop tavewa anu tumasene gapan inak ewakewa enat wan. 14 Nu opata gapan God No Oise Kakaewa wadidiaetoni menan God ganganat imaen. Me ap tani iwa Ayop nuga Iesu Keriso kakae guragut oya oya mega den e warapen menan tan. 15 Ap menan, dugup nugawa, kaimakaet wanien ok ge nop wadiaetoni den anu wariwanian.

16-17 Endi Mamanu God nunan anu wat aipakam nimanini gapan wam wam pot pot imunu anu dao den naonagasiwan nunan taini menan gop ya anuivin. Mamanu God amba Iesu Keriso den imuya wat kaimagamep amba aro enepi gapan wat ge tat kakaewa ta aisiwanian.