15
Pa Ierusalem gapan Iesu dugup kansoro nagirewa tat mugawa
Wam ameme at Diudia Iesu anu tumat tane nagirewa upi at Antiok vit onamon amba at Antiok Iesu dugup mega nagirewa anega diamon, “Mosis iup God inap wareni ame menan apan epiwa paua tum ya tapiwa God inak ewakewa ya waneta.” Pol ge Banabas ap mepe den. Ap menan mu yone Diudia nagirewa den notatae aritavet wane. Ap wane menan Antiok Iesu dugup mega nagirewa Pol, ge Banabas amba upi den om enumone pa Ierusalem dot amopen menan. Ierusalem gapan mu Iesu watu enamot megawa ge Ierusalem Iesu dugup mega kwayup tamuine nagirewa den epiwa tum arini noa wayawamopen menan amoin.
Iesu dugup mega nagirewa watu enamone. Amba mu pa Ierusalem amuinewa neginaet at Ponisia ge at Sameria tau ge tau amon. Diu uon go ian ugupe nagirewa imumu God inap entanene oisewa Iesu dugup mega nagirewa ap mepe wanumuine wadidiam amon. Gutut mame wane gapan Iesu dugup mega nagirewa iravi aton aigap di anun. Mu pa Ierusalem tauane gapan, Iesu dugup mega nagirewa, Iesu watu enamot mega nagirewa amba kwayup tamuine nagirewa den waupamon. Pol ge Banabas God dim dim iragi mu gamumup tani oisewa wadidiamon. Go Parisi dugup muga upi Iesu anu tumasine nagirewa yonan anega wane, “Ian ugupe nagirewa epimu tum di tap amba Mosis iup namu se wani ayamase tap.” Ame wane menan Iesu watu enamot mega nagirewa ge dugup kwayup tamuine nagirewa iamen.
Pita opata wan
Nop nonongataet wayao seyao taiwanumune ewap, Pita ao yon wande amba nop anega wadiamon, “Tatan gwanin, e anuyan watagentuk di God e yaumakayap om enunegen ame ian ugupe ne non utap Iesu Oise Kakaewa anupi amba anu tumat tain. God waenapan iravi imumu anuitamini apanewa menan ian ugupe nagirewa, Diu uoni, evenan tat anun. Ap menan Guewa Woup Seniwa nu nuneni ap umap den munen. Me yamap nu iravi gine daiton ap menan ian ugupe nagirewa Iesu anu tumat tane menan God mu koewa muga anu ae ven.
10 Ap menan endi iwa dimen God pusip warup yaviwanin? Iup nuga itaniwa nu omayan baewa amba nu den kwayupe ya taintoni iwa itan baware iragen. Iwa dimen Iesu anu tumat taine nagirewa itan ame onemup seait? 11 Ame umap uon, ya seait iwa nu God Ayop Iesu garaet nuneni gapan wat inakam nimanen, ap mini ian ugupe nagirewa mu den ap anega.” 12 Ap wani, Pol ge Banabas yonane God ian ugupe munan yo ge kiman paua baware ugup ugup anenen mu gamumup taiwandini oisewa wadidiamon, menan to iamene nagirewa iravi no uon wanumon, neman guran anuiwanumun.
Diemis opata wan
13 Mu nop wane uon tani ewap, apan Diemis anega wadiamon, “Tatan gwanin, nop wapena anun. 14 Oit ameme Saimon Pita gaset wadianen anenen da God namu anut mega to ewamoni ame ian ugupe nagirewa yaumakamup upi tambumop waenapan megawa entanamon. 15 Saimon wani ame tavewa di iwa wataget God no oise waiwanumune nagirewa nop mame den anega seane, God anega wan,
16 Mame ewap ne sia tauain,
amba Devit toemu mega ta koeragamene,
ne to bongamep inak munain.
Pa sewa wabenagene, ne sia tuin.
17 Ap tapena gapan, waenapan iravi, piup gapan,
inanap tauain, Diu uoni ian ugupe nagirewa den tauain,
iwa mu ne waenapan negawa gaset diamona menan.
18 Ne ayop di, namu wadiaena evi taueta.
God ap anega wan.”
19 Ap menan, Diemis aigap sia wadiamon, “Ne anuingina mam, ian ugupe imumu God inap entanene nagirewa nu kaimakaet wat itan da ya munat. 20 Go manega ok inamup enu wadiamoit, ame nanimup god eboewa guewa kaitane ameme antaba irine god muga munapen ame tabaewa ya nap. Amba waen ge apan wainan gogo ya tap. Amba man mege wat imokaminewa ya nap. Amba deniwa da ya nap. 21 Iup mame ian ugupe nagirewa asik tane iwa en arugataet gapan Mosis iup mega Diu pura bawarewa gapan batnaginewa amba pa da da gapan wadidiamuinewa menan mu anune.” Diemis ap anega wadiamon.
Wat tamanam mumane ogewa watu enan
22 Ap menan Iesu watu enamot mega nagirewa, dugup kwayup tamuine nagirewa amba Iesu anu tumasine nagirewa iragi den nop panane apan mugawa wa watu enamop, Pol ge Banabas tanamo pa Antiok amot wan. Ap wane apan Diudes, yaua da Basabas amba apan Sailas mu den watu enamon. Iesu anu tumat nagirewa apan dere mame virimu tainewa. 23 Mu den ok manega watu enan,
Kaewa kaewa tatan gwaninua ian ugupe Iesu anut tumasiana nagirewa,
pa Antiok, Siria amba at Silisia gapan iniwanin.
Nu Iesu watu enamot megawa amba Ierusalem dugup mega,
kwayup taintoni nagirewa den gaun inayap waivin.
24 Nu anuton apan ame upi mapa inanup tau onamone aro da ya munaton,
amba am dauro taen, opata muga wane iae guine wa koeamene.
25 Ap menan nu iragi iametoni amba imunu daiton manega anuton.
Apan dere nu potanup watu enamoton. Apan dere,
ame evenan wainu kakaewa, ame Banabas ge Pol,
tanam inayap onamot waton. 26 Banabas ge Pol,
nu ayop nuga Iesu menan, nao taine ge bop tawa ya anuine,
apane waiwa.
27 Potanup amuine apan dere ame Diudes ge Sailas,
mu nu dim da ok gapan seatoniwa nop gapan,
sia aigap di wadiain.
28 God Guewa Woup Seniwa nu den imunu daiton gapan,
iup itan mega da e oneyap ya seapen menan anutoni,
go nop mame megenat ayamase tapen,
29 Waenapan nanimup god eboewa guewa kaitane,
ameme antaba irine god muga munapen ame tabaewa ya nane.
Amba man deniwa ya nane.
Amba man mege wat imokaminewa ya nane.
Amba waen ge apan wainan gogo ya tane.
Koewa mame iragi ya taiwaniampinawa ame e kakae di tai.
Nop otu nuga mame uon tan. Gaun inayap waianit.
Mu ok ap anega watu enan.
30 Oit wat amone nagire pa Antiok tauane. Amba Antiok Iesu dugup mega nagirewa ok ame munan. 31 Dadak nopewa ame ok gwanap wane waenapan iravi nop bibigawa anune aton baware tan. 32 Diudes ge Sailas mu den God oise wainewa, menan tase gwani dadak munep aritavet amun imumu to kimepen menan wam nononga wadidiamon wanumun.
33 Wam nononga wanumone amba pa Antiok Iesu dugup mega nagirewa baigane den watu enamone ewagai Ierusalem sia amon. 34 Go apan Sailas ya aet anuni menan ap mepe wanden. 35 Amba Pol ge Banabas pa Antiok gapan di wanumon, ap mepe mu upinamu aruga den ayop nopewa gapan di wadidiam wanumun.
Pol ge Banabas dum marimen amon
36 Wam da Pol Banabas anega wadien, “Pa sewa sewa daio nu namu ane wadidiamotoni mu anenen taiwanumune anupen menan ewagai sia daio inamup ane yawamopen.” 37 Banabas apan Dion Mak den aet anun. 38 Go Pol Dion Mak ya aet anun iwa wata pa Pampilia tauane gapan me yone ae vemo ewagai pa Antiok aeni menan.
39 Ame menan Pol ge Banabas Dion Mak aigap noyam notatae warane amba dum marimen amon. Banabas Dion Mak den kabum gagap at Saiparas amon. 40 Amba Pol apan Sailas om enu. Amba Antiok Iesu dugup mega nagirewa Pol ge Sailas munan mup wane, God kwayupe gapan wat aipakam mumane amba Pol ge Sailas tau amon. 41 Amone at Siria ge Silisia tau ge tau amone, Iesu dugup megawa wadidiamone anun imumu wat kaimagamepen aroewa muniwanumun.