8
Iup ewakewa iup namua yamasen
1 Nop nuga ibariwa mame. Pirisi nuga aigap iragenawa inanup wandini ame Iesu. Me paina kiman dot aen God Paina Iragenawa mainewa nutup gapan ae wandia. 2 God Paewa kimaniwa ame woup am seni ge woup am seni arewa di ame gapan Iesu nunan taiwan. God Paewa kimaniwa apan naniwa gapan ya tun go God mek tun.
3 Pirisi aigap iragena iravi God dim dim garaet wanapen man gure irapen menan om enumon. Ap menan Iesu den dim dim garaet da God wanapen. 4 Iesu piupa wandepo pirisi nave ya tapo iwa pirisi upi wanumamun Mosis iup mega namua gapan yan garaeta God waniwanum. 5 Mu nao piupa taine kiman guegue mega piupa taiwanum. Ame iwa Mosis God pa mega namdat tupen tani God anega wadien, “Gende tunupa wainetoni pa nega tutu guegue ewagena ap gapan di tu.” Ap anega wan. 6 Go endi God Iesu om enuni gapan Iesu Pirisi Nuga Aigap Iragena nao mega kakaevet di taiwan menan iup namua paina yamasen. Mosis waenapan iup namua muneni umap di go Keriso iup mega nuneni kakae iragen. Iwa Mosis iup mega dim wa agiat mumeni umap di go God ewake wa agiat nimaneni kakae iragen.
7 God Mosis waenapan munan iup namua wadieni kakae iragen tapo iup eviwa da ya tauapo. 8 Go God waenapan mega koewa tane yaveni menan iup namua om ya inen ap anuni gapan anega wan,
Ne Ayop, wam da oniwan amba ne Isurero ge Diuda nagirewa,
iup ewakewa munain.
9 Iup ame isimurae wai iup namua munana ap umap sia ya munain.
Wam ap gapan ne naninap isimurae wai tam naumo,
at Idip ae vean angen.
Mu iup namua ayamase ya tane menan munan ya anuingina.
Ne Ayop apanewa anega waivin.
10 Menan ian Isurero nagirewa iup ewakewa munapen taivin,
Iup ame iamup barain amba bumagamup ok seain.
Ne God muga di tain amba mu waenapan nega entan mumain.
11 Ap menan tase gwani,
evene wai den gare gare anega ya wadidiamoin, God anu awan.
Ap anega ya wapi,
iwa waenapan iravi bawarewa ontotua den anu nimanegain.
12 Koewa muga munan baguna sisi wap sia ya anu mumain.
God ap anega wan.
13 God iup ewakewa nunat wani gapan iup namua nutu bigaren. Bigareni wande aen uon tapen taiwan.