10
Iup namua kwayup tata ya umap
1 God iup mega namua ame gueguewa megenat, tavewa mega kakae kiman gapan evi tauen. Iup namua gapan taiwanumune ame God yamap kakae tapen menan en gapan gapan man guran iriwanumun go ame gapan imumu kakae ya tan. 2 Kakae iragen tapo man sia ya gut irapo. Waenapan ame God wa taragasene koewa muga bigi warep anupo koewa muga umame sia ya anupo. 3 Go iup namua gapan koewa muga garewa en en man guran iriwanumune iwa koewa muga uon ya tani men anu awapen menan. 4 Iwa koewa muga man kao ge man gout deniwa viseni gapan daiton da ya wat museta.
5 Ap menan Keriso piupa vitapen tani God inap anega wan,
Maman, koewa muga garewa man guran irane puraput genan seane,
ge ap menan ya anuingi go ne etuna nenaan,
ge yan gega entanepen menan anuingi.
6 Mu genan man iriwanumun koewa muga garewa,
taba ugup ugup genan ta siwanumun go ap menan aton ya anuingi.
7 Amba ne anega wan, God, ne mam.
Anenen anuana ne di tain,
ame iup namua ogewa oitana ap anega di seane.
8 Iesu nop ame namu anega wani, “Waenapan man ugup ugup genan guriwanumun upi watara iriwanumun upi den taba ugup ugup genan ta siwanumun koewa muga garewa go ge ap menan mup ya waan aton ya anuingi.” Iesu ap anega wan. Iup namua wadiamoni gapan taiwanumun. 9 Amba sia anega wan, “God, ne mam. Anenen anuana ne di tain.” Ap menan guegue namua taiwanumune God wani gapan endi uon tan iwa Iesu arok ame waren. 10 Iwa God anuiniwa ame Iesu Keriso etua wam daiton yan tan nunan barapen sia ya baraeta. Ap baraeni gapan God yamap potanu woup sen koewa nuga sia ya anuta.
Keriso boeni nu garanu ta kakayasen
11 Pirisi nagirewa yonan wam wam God menan man guran iriwanumune da ugup uon ap uap uap pot poraet di taiwanum. Ap taine gapan waenapan koewa muga da ya wat musen. 12 Go Keriso koewa nuga garewa wam daiton etua yan garaet tan ap tani aroewa wande aiwandata. Amba God mainewa nutup gapan ae wanden. 13 Ap mepe di wandiwandapina God anavi mega tambu pusiwa gauarap seapen men amat taiwan. 14 Menan wam daiton ame gapan me etua yan garaet kakaevet tan. Ap gapan nu koewa nuga anu ae veni nagirewa me yamap kakae iragen waninan.
15 God Guewa Woup Seniwa nop ma den wadianiwan. Me namu anega wan,
16 Menan ian Isurero nagirewa iup ewakewa munapen taivin.
Ne Ayop di, iup ame iamup barain amba bumagamup ok seain.
17 Wani amba evi sia anega wan,
Koewa muga ugup ugup sia ya anu avingain.
18 God koewa nuga iravi anu ae veni menan koewa nuga garewa da sia ya tait.
God nunan tani garewa pot pot menan anuinan
19 Dugup negawa, Iesu nunan boeni menan God pa mega kiman gapan woup am seni woup am seni arewa anet anuitoni gop da uon di anait. 20 Etua mek yan garaet tani menan God pa mega tonanewa negin ewake inak neginewa ame nunan watapen. Wanup tonan toboreni wandeni ame endi ase watapen ame Keriso mek etua di. 21 Pirisi nuga aigap iragena Iesu God pa mega kwayup taiwan. God pa mega ame nu di. 22 Ap menan imunu nenengawa gapan anu tumat nuga kin kin taitoni amba nuk imunu koewa ya anuitoni amba etunu kaum kakaewa gapan bigi wareni God inap anet. 23 God wa agiat nimaneni di tata gego da uon menan anu dao nuga me inap wat natait. 24 Baigan gare gare tainampen ap gapan ago tat amba gare gare anu gurinampen. 25 Iam iam pot poraet tainampen upi ae vine mini ae ya veapen. Ayop Iesu wam mega tauapen taiwan menan aigap sia gare gare wawa nisinampen.
26 Nu God nop mega tavewa wadianen anutoni go orup da da mek anuini gapan koewa sia aigap aigap taiwandapinawa ame anenen? Koewa mega sia muta muta neginewa da uon. 27 Ap tapiwa garewa mega daiton megenat wandia ame tap anuiwandapina gapan God wam uiwa tandayasine nagire den wanene tamota amba merao amun iragenawa arewa gapan uatameta. 28 Mosis iup namua seni anega waiwan, “Waenapan da da iup ame paina yamasepi upi dere o yampo magua ware wapi menan koeragewa nagire munan bagu sisi ya anuin go guramop borit wain.” 29 Koewa ame tane garewa baware go baware iragena mam. Da da God Otua wa koeragamene waiwanum. Amba munan denip viseni denip ewakewa ap gapan God koewa muga wat museni noa wa otutamiwanum. Guewa garaet wat aipakam muminiwa nipep diwanum. Ap menan waenapan ameme wanene baware iragenawa warain. 30 Ame nu asiginup God anega wan,
Koewa muga garewa ne wanene di tain.
Amba sia me wani nu asiginup ame,
Ne Ayop di waenapan nega wanene tamoin.
31 Kaiwan, God inak wandiniwa nani bagup waramopi nagirewa nenen yangwan baware anuin.
Epara ta wanin aninait
32 Namu waineana aigap sia anu awai. Wam ame gapan God ganat mega imuyap tauen e warayan amba itan bagu sisi aruga inayap tauen go anu tumat ega ae ya veayan. 33 Wam da da waenapan yamap nipep diaen wawa koko taen amba ta koeragam imaiwanumun. Amba wam upi sia waenapan upine inap itan ap anega inamup venaseni menan e mu aigavene aisean. 34 Ap gapan den gwat noke wanumone nagirewa munan bagu sisi anuyan. Amba up nagirewa pa ega tauan puraput ega up tane go e aton gapan wanian. Iwa kiman gapan puraput ega kakaewa yaibobot wandiniwa menan anuyan.
35 Ap menan, God inap epara ega ya wakaumai iwa epara ega ame garewa mega baware iragen God enapen wandia. 36 God anuni e tapen amba nunat wa agiat nimaneni e warapen menan yaentuk mantuk amat taiwanian. 37 God wani ok anega sean,
Wam otu da amba sia onini apane taueta,
use sia ya enu waneta.
38 Waenapan nega ame tamanawa taine nagirewa,
anu tumat nimanege di wanumoin.
Go mu da da ae venege ewagai amopi atonamu ya anuin.
God ap anega wan. 39 Go nu borit wa ian ewagai ane ane nagirewa uon go Iesu tumap am dagim yonat inak warat.