3
Dion Iesu neginewa wariwandin
At Rom bawarewa da, Taibirias Sisa, en mega aonagaet pusin yamunaet (15) ayop taiwandini gapan, gauarape mega upi at Isurero ayope taiwanumun. Gauarape nagire yaumua apan Pontias Pailat, at Diudia ayopewa, ge apan Erot, at Galili ayopewa ge Erot gwaniwa Pilip, at Ituria ge Tekonaetis ayopewa, ge apan Laisanias, at Abilini ayopewa. Amba ap wamewa gapan, apan Anas ge Kayapas pirisi ayop muga taiwanumun.
Wam ame, Sekaraya otua, Dion, at kaimewa gapan iniwandin. Ap mepe, God nop mega me inap tauen. Inap taueni menan kaum Diodan arige tau ge tau ae opata anega waiwandin, “E koewa taianawa ae vean, imuya entanen anu tumat dupewa ian amba God koewa ega anu ae veta.” Watageta God nop mega waiwandini apanewa Aisaya Dion oisewa ok anega sen,
Apan da pua, at kaimewa gapan, opata anega waiwandin.
Ayop nuga negin mega wa tarasen, wat tamanamene amba tauep.
Bumak ae ao iragi piup tu enane pon tap.
Tunup endao wandao iragi tu ponamene taue aep.
Negin gegerawa iragi wat tamanamene tamana tap,
amba negin ae ao taniwa momagene pon tap.
Amba ap gapan, waenapan at at iravi,
God inak ewakewa nunini apanewa ame yao anu asigip tain.
Dion dup iamopen menan waenapan aruga inewa onam wanumune, amba me anega wadiamon, “Guegue ega mokare seram naewa umap! E darinaya da enuni gapan God wae wae nemoro mega tawa aisepen taiwanin? Inak ega koewa taiana ame ae vean garewa imuya entanen amba kakaewa yambuni ta aisiwanian. Ek mondi anega ya wane, ‘Nu omayan baewa Eibaraam menan God atonunu anuiwan,’ ap anega ya wane. Wapena anun, e Eibaraam naewa megawa megenat wane ya umap, iwa God Eibaraam naewa upi gwat ma wapi venat mutain. Wapena anun, endi mame di oma visiwa arogamen, gurini apanewa nugusepen nauase wandia. Oma da da tavewa kakaewa ya iamopi gure ireta.”
10 Dion anega wani menan waenapan iragi singui anega wayawan, “Endi ame nu anenen tait?” 11 Me gare wadiamon, “E da da etua okomewa dere wanumopi, da ware, orup da uoniwa wanep. Amba e da da taba inayap wandepiwa den ap anega tan.”
12 Ian moni bongamine nagirewa Dion dup iamopen menan den tauan anega wayawan, “Wadianet apanewa, nu endi anenen tait?” 13 Dion gare anega wadiamon, “Rom iup muga omewa gapan moni bongamepen diaene, aigap sia ya bongamene.”
14 Amba Rom ita nagirewa upi Dion anega wayawan, “Nu anenen, nu dim da tait?” Me gare wadiamon, “Apan da puraput mega menan aopan ega ya wane, up tapen menan kaimakaet ya nanam mumane. Nao ega garewa menan gunat ya anu wane.”
15 Ap menan, waenapan iragi God inak ewakewa munapen menan amat taiwanumun, amba anu bambam den taiwanumun, iwa Dion taueni mu imumup anega anun, ‘Dion God mega wa watu eneni Keriso go uon?’ 16 Ap anega anune menan Dion gare wadiamon, “Ne kaum iragen gapan dup iaivin go ayop da evinap oniwandini. Me God Guewa Woup Seniwa ge oma yamewa merao gapan dup iaiwandata. Me aiganap aroe amunu den oniwan, amba ago otua ayop mega pusi okomewa vesini mini, ne ap wat agoaset anun, go ne kakae uon. 17 Me iman taue oma makewa bongameta, makewa kakaewa ai bongame mek mini siwandata amba pokewa mek mini siwandata. Makewa kakaewa tambu ae dugupa eneta go pokewa tam ae da ya togura gura omae yamewa gapan uatamep yagimota.”
18 Amba Dion nop ugup ugup gapan, oit mega kakaewa mu anu tapen men wadidiam wandin. 19 Go wam ame gapan, ayop Erot Dion inap gari gangan naen iwa Dion namu anega diguren, “Ge apan koerage, narawaga Erodias up ta naitaan.” Amba Erot inak koe koe upinewa den taiwandini menan Dion aigap sia diguren. 20 Ap menan, evi amba, Erot wan ita mega nagirewa Dion waran gwat noke baraene, mame tani Erot koewa mega aigap iragenawa tan.
Dion Iesu ware dup ien
21 Go Dion gwat noke ya baraene wamewa gapan, wam da, Dion waenapan iravi dup iamon uon tani ewap Iesu ware den dup ien. Amba Iesu God inap mup taniwa, kiman ase watapen. 22 Boge God Guewa Woup Seniwa nenip bairantan mini kimani visiwandin e Iesu wapip wanden. Wandeni nop da kiman gapan anega tauen, “Ge Otun iragenawa, imuna genan anu gurivin. Ge gamugap ne imuna ae meare tau aen.”
Iesu Keriso omae baewa batnagen
23-38 Iesu God menan nao ere taiwandini, en mega apane daiton apan da aonagaet (30). Dugup mega se ge se manega onam wanumun endi mame tauen. God ere Adam nanip tan.
Adam orup Set baraen.
Set orup Inos baraen.
Inos orup Keinan baraen.
Kenan orup Maalaleo baraen.
Maalaleo orup Dieret baraen.
Dieret orup Inok baraen.
Inok orup Metusela baraen.
Metusela orup Lemek baraen.
Lemek orup Noa baraen.
Noa orup Sem baraen.
Sem orup Apaksat baraen.
Apaksat orup Keinan baraen.
Keinan orup Sila baraen.
Sila orup Iba baraen.
Iba orup Pelek baraen.
Pelek orup Reu baraen.
Reu orup Seruk baraen.
Seruk orup Neo baraen.
Neo orup Tera baraen.
Tera orup Eibaraam baraen.
Eibaraam orup Aisik baraen.
Aisik orup Diekap baraen.
Diekap orup Diuda baraen.
Diuda orup Peres baraen.
Peres orup Esiron baraen.
Esiron orup Anai baraen.
Anai orup Atmin baraen.
Atmin orup Aminadap baraen.
Aminadap orup Nason baraen.
Nason orup Salomon baraen.
Salomon orup Boas baraen.
Boas orup Obet baraen.
Obet orup Diesi baraen.
Diesi orup Devit baraen.
Devit orup Netan baraen.
Netan orup Matata baraen.
Matata orup Mena baraen.
Mena orup Melea baraen.
Melea orup Elayakim baraen.
Elayakim orup Dionam baraen.
Dionam orup Diosep baraen.
Diosep orup Diuda baraen.
Diuda orup Simion baraen.
Simion orup Livai baraen.
Livai orup Matat baraen.
Matat orup Diorim baraen.
Diorim orup Eliesa baraen.
Eliesa orup Diosua baraen.
Diosua orup O baraen.
O orup Elemadam baraen.
Elemadam orup Kosam baraen.
Kosam orup Adi baraen.
Adi orup Meluki baraen.
Meluki orup Narai baraen.
Narai orup Siatiero baraen.
Siatiero orup Serababero baraen.
Serababero orup Resa baraen.
Resa orup Dioanan baraen.
Dioanan orup Dioda baraen.
Dioda orup Diosek baraen.
Diosek orup Semein baraen.
Semein orup Matatayas baraen.
Matatayas orup Maat baraen.
Maat orup Nagai baraen.
Nagai orup Esili baraen.
Esili orup Neum baraen.
Neum orup Emos baraen.
Emos orup Matatayas baraen.
Matatayas orup Diosep baraen.
Diosep orup Dianai baraen.
Dianai orup Meluki baraen.
Meluki orup Livai baraen.
Livai orup Matat baraen.
Matat orup Elai baraen.
Elai orup Diosep baraen.
Diosep orup Iesu mamewa uon go waenapan mamewa dian.