1 Jisasame lao pituu, “Nambame nyakama etete kiningi langilyo: Endakali mende sipisipi kamenya andakote ipanya, sipisipi lumbao nyingi kalomba dokonya-kaita naepenya, waka mendasa-kaita kisoo pyakanatamo doko, baa makongao, pake nao paenge mende. 2 Dopaka doko, sipisipi lumbao nyingi kalomba dokonya-kaita epenge doko baa sipisipi setao katenge akali doko. 3 Akali doko epelyamopa, sipisipi epenge kalomba doko isoo katenge akali dokome baanya kaita lumbakamaingi. Dokopa sipisipi setao katenge doko ipupala, baanya sipisipi dupa kenge lao wii lelyamopa, dupame baanya pii doko sepala baa watengema. Watelyaminopa baame dupa laminao kamaka penge. 4 Baanya sipisipi dupa pitaka laminao kalomba dokonya kamaka pyakalyetala, baa wambao penge. Dopa pilyamopa, baanya sipisipi dupame baanya pii sepala, nyakamanya akali doko-lumu lao masetala, baa watao pengema. 5 Dopaka doko, sipisipi dupame endakali waka mendenya pii sepala, endakali doko nyakama nakandenge mende-lumu lao masetala, baa watala naenya paka pengemana” lea. 6 Jisasame kongali doko dokaita lamaiyaka doko, pii lamaiya dokonya tenge doko dokaitame aipa pyoo lelyape lao soo nanyiami.

7 Dopa piaminosa Jisasame deaka dokaita lamaiyoo, “Nambame nyakama etete kiningi langilyo: Sipisipi dupa kolandapenge kalomba doko namba. 8 Endakali wambao epeami dupa pake nengepi, makongopaepi dupa epeami. Epeamiaka doko, sipisipi dupame dokaitanya pii nasakamaiyami. 9 Namba kalomba doko. Endakali mende namba-kisa kolandatamo doko, baa Goteme pyoo nyeta. Baa namba-kisa kamaka pata, andakote ipata pyoo, nee nyoo nao katata. 10 Pake nenge dokome sipisipi dupa pake nyepa, koeyaseta, pyao kumaseta pyaanya epenge. Dopaka doko, namba epeo doko, sipisipi dupa lete katenge doko nyepala, auu pyoo katataminopa lao epeo. 11 Namba sipisipi setao katenge epe doko. Sipisipi setao katenge epe dokome baanya sipisipi dupa kumala naena lao baa tange kame soo kumala penge. 12 Dopaka doko, yole kalai pingi akali doko baa sipisipi setao katenge doko daa, baa sipisipi dupanya yumbange doko daaka dokonyana, yana kapu mende epelyamo kandatala, baame sipisipi dupa yakinatala paka penge. Paka patelyamopa, yana kapu dokome sipisipi dupa watambatala pyao nelyamopa, yangi dupa paka pyakao tale pingima. 13 Yole kalai pingi akali dokome yolenya iki masoo kalai pingi. Dopa pilya dokome, sipisipi dupa nee nakaenya baa paka penge. 14-15 Matyu 11:27; Luku 10:22Sipisipi setao katenge epe doko namba. Takange dokome namba kandelyamopa, nambame Takange doko kandenge. Mendai dopaka pyoo, nambanya sipisipi dupa namba tange kandelyopa, dupame namba kandengema. Tenge dokonya, nambanya sipisipi dupa kumala naena lao namba tange kame soo kumala penge. 16 Nambanya sipisipi mendatupa kame dakenya nakalyamino dupa apata nambame lanyepenge. Lanyepatopa dupame nambanya pii setami. Dokopa sipisipi dupa pitaka tata mendai katataminopa, setao katenge mendaiyaka katata. 17 Nambanya lete katenge doko yakinao kumapala dee tange nyotopa lao, namba tange kame soo kumala penge dokonya, nambanya Takange dokome namba auu kaenge. 18 Namba kumatale lao endakali mendeme nambanya lete katenge doko nyokonyala naeyata. Lete katenge doko kame soo kumala penge dokopa, pilyoo nyingi dokopa, dolaponya kyeto doko namba-kisa singi. Dopa pipi lea pii doko nambanya Takange-kisa nyiona” lea.

19 Juu dupame pii dutupa sepala, nyakama-lapo deaka wakale pyaloo piami. 20 Wakale pyaloo piami dupanya longome lao pituu, “Baa-kisa imambu koo mende palipya dokome baa kyakelyamona, aipuma nyakamame baanya pii sakamailyamipi?” leami. 21 Yangimi lao pituu, “Pii epe dopale dupa imambu koo palenge dupame nalengema. Imambu koo palenge akali mendeme endakali lenge monda mende kapa pao lenge auu pyoo tena lengepe?” leami.

22 Lotuu anda nee nyetae doko kaita lumbiami gii doko masoo, Jerusalema nee nengema gii doko poo lao aiyuu epenge gii dokonya epea. 23 Dokopa Jerusalema lotuu anda nee nyetae kamapu dokonya veranda kaname petae Solomonenya lenge dokonya Jisasa baa paeya. 24 Dopa piamopa, Juu dupa ipao Jisasa kakopatala baa lamaiyoo, “Emba akali dokona lao gii andukupa naima panao langitopa lao yalo petae kalye? Emba Kraisa doko-tamo doko, embame naima tolao langi” leami. 25 Dokopa Jisasame dokaitanya pii yanu pyakamaiyoo, “Namba akali dokona lao nyakama langipupa, kiningi lelyenona lao nyakamame masala naelyamino. Nambanya Takangenya kengenya kalai pilyo dupame namba akali dokona lao panasilyamo. 26 Dopaka doko, nyakama nambanya sipisipi daa dokonyana, namba akali dokona lao nyakamame masala naelyamino. Nyakamame masala naeyalamino lao nambame nyakama langitapu. 27 Nambanya sipisipi dupa namba tange kandenge. Dupame nambanya pii doko sepala namba watao epengema. 28 Epelyaminopa dupa tanga-tangapi kumao alu napitaminopa lao lete etete katenge doko nambame maingi. Maitae dupa nambanya kinginya mendeme nyokonyala naeyata. 29 Nambanya Takange, sipisipi dupa namba dia dokome dupa pitaka ita miningi. Sipisipi namba ditae dupa nambanya Takangenya kinginya mendeme kapa pao nyokonyala naeyataka. 30 Nambapa, nambanya Takangepa, nalimba mendaina” lea.

31 Dokopa Juu dupame baa pyalanya dee kana nyiami. 32 Dopa piaminopa Jisasame dokaita lamaiyoo, “Nambanya Takangeme kalai pyaale lao namba dia dupanya kalai epe longo mendapu nyakamame kanjepale lao pipu. Dupanya anduku nambame kopeta pipusa, nyakamame namba kaname pyalanya pilyamipi?” lea. 33 Lep 24:16Dopa leamopa Juu dupame baanya pii yanu pyakamaiyoo, “Embame kalai epe mende pipino kandatala, naimame emba kaname pyalanya napilyamano. Emba yuunya akali dokome Gote anda-anda semaiya naeyao emba Gote kalyona lapinosa, naimame emba pyalanya pilyamanona” leami. 34 Sam 82:6Dopa leaminopa Jisasame dupanya pii yanu pyakamaiyoo, “ ‘Nyakama gote mendapu kalyaminona leana’ lao nyakamanya loo dupanya pepa pyapae nasingipi? 35 Gotenya pii pepa pyapae singi doko endakali mendeme kapa pao aloo napita. Gotenya pii wambao nyiami dupa gote mendapu kalyaminona lao baame lea-lumu doko, 36 ‘Namba Gote Ikiningina’ lapupa, aipuma nyakamame ‘Gote anda-anda semaiya naeyao lelyenona’ lelyami? Nambanya Takange dokome namba makande latala, isa yuu dakenya puu leamopa epeo. 37-38 Nambame pii lelyo dupa kiningina lao nyakamame masala naeyatamino doko, nambanya kalai pilyo dupa kanjepape. Nambanya Takangenya kalai dupa nambame napingi-tamo doko, nambame pii lelyo dupa kiningina lao masala naeyalapape. Dopaka doko, nambanya Takangenya kalai dupa nambame pingi-tamo doko, kalai dupa kandatala nambame pii lelyo dupa kiningina lao masalapape. Dokopa namba Takange dokonya mona andaka kalyopa, baa nambanya mona andaka katenge-lamo lao nyakamame kandatamina” lea. 39 Dokopa dokaitame baa anjepenge kaitini kutiaminopa, dupa yakinatala baa pea.

40 Jone 1:28Pupala endaki Jodane yangitena, wamba Joneme endakali kaimbu pyakamaiyamo yuu dokonya katea. 41 Dokopa endakali longo baa katea dokonya ipupala lao pituu, “Joneme mirakolo mende napiamoaka doko, baame akali dakenya lao pii leamo dupa pitaka kiningi-lamona” leami. 42 Dokopa endakali dosa kateami dupanya longome baa tungi piami.