1 Matyu 28:1-8; Make 16:1-8; Jone 20:1-10Enda dutupapi, dutupa-pipa enda peteami dupapi, dupa Sande gii dokonya yongama wamba sakatatala, tunduma pingi mendapu depa lanya seteami dupa nyoo malu dokonya peami. 2 Pupala kandeaminopa, malu kambu dokonya kana piti petae doko kapilya mina-mina pyoo nyoo kapya latae katea. 3 Dokopa enda dutupa malu dokonya kolandatala kandeaminopa, Kamongo Jisasanya yonge doko nasia. 4 Nasiamosa aipa pyaape lao etete tatake kaeyao kateaminopa, akali lapoma yonge pee etete kyeo lao polepole pipae pingi mendalapo ipao kalyu piambi. 5 Dokopa enda dutupa paka kaeyapala yuu kandanatae kateaminopa, akali dolapome dokaita lamaiyoo, “Nyakamame aipuma akali saka katenge doko endakali kumapae setenge panda dakenya kutilyami? 6-7 Matyu 16:21; 17:22-23; 20:18-19; Make 8:31; 9:31; 10:33-34; Luku 9:22; 18:31-33Baa dakenya nasilyamo. Baa sakatatalamo. Baa Galali kateamo gii dokopa nyakama langyoo, ‘Akalinya Ikiningi doko endakali koo pingi dupanya kinginya maitaminopa, dupame kaeyala naeyao baa poko itanya pyao yukutami. Dopa petataminopa, yuu gii tepo dokonya baa kaeyala naeyao sakatatana’ leamo doko masalapa” leambi. 8 Dopa leambinopa enda dutupame Jisasanya pii dupa masiami. 9 Masetala enda dutupa malu doko yakinatala pilyiami. Pilyetala, pia dupa 11 aposole dutupapi, endakali waka apata kateamipi, dupa lamaiyami. 10 Aposole dupa lamaiyami enda dutupa datupa: Magadala tange Maria dokopi, Joanaapi, Jemesa endangi Maria dokopi, dutupa-pipa enda mendapu peami dupapi, dutupa. 11 Lamaiyaminopa siami endakali dupame mee lelyaminona lao masetala, kiningi lelyaminona lao masala naeyami. 12 Dopaka doko, Pita sakatatala alo pyao malu dokonya pupala, elyo pyao kandeamopa, lapalapa kyeo lapae dupa iki siamo kandea. Kandatala andaka pilyoo pituu, pia dupanya moname longo lao masoo pea.

13 Make 16:12-13Yuu gii dokopaka, disaipolo lapoma yuu yakane Emeasa lenge dokonya paanya peambi. Emeasa doko Jerusalema katao 11 kilomita joo singi. 14 Akali dolapome kaitinisa pao pituu, pia dupa pitakanya atome lao peambi. 15 Atome lao peambinopa, Jisasa ipao tengesa pyakaeyalu petala, akali dolapo-pipa peami. 16 Dopaka doko, baa doko-lamo lao nakandena lao akali dolaponya lenge iminjia. 17 Dokopa Jisasame dolapo lamaiyoo, “Nyakambame kenda kaeyao aki pii mende lao pelyambipi?” lea. 18 Dopa leamopa, akali dolaponya mende, Kiliopasa lenge dokome baanya pii yanu pyakamaiyoo, “Endakali opone Jerusalema epeamino dupanya embame iki yuu gii datupanya pipumu dupa nakandapipi?” lea. 19 Dopa leamopa baame dolapo lamaiyoo, “Dupa aki mendapupi?” lea. Dokopa akali dolapome baa lamaiyoo, “Nasarete tange Jisasa doko-kisa pipumu dupanya lelyambano. Akali doko baa propeta mende. Gotenya enombanyapi, endakali dupa pitakanya enombanyapi, baame kyeto joo kalai pyoo, pii lao pingi. 20-21 Baame Israele dupa mokao nyetana lao naimame nee kaeyao malisoo kateama. Dopaka doko, prisa mupapi, isingi akalipi dupame baa pyao kumasina lao tenge setapala amii dupa maiyaminopa, baa pyao yukuiyami. Dupa pitaka piamino dokonya pituu, indupa yuu gii dakeme tepo pilyamo. 22 Pii mende doko, naima-pipa petenge enda mendapuame naima dapa lao walu lasalamino: Yongama wamba enda dupa malu dokonya pupala, 23 Jisasanya yonge doko kutao nakanjamano lamino. Enda dupa pilyetala, lee manemaneme enjele mendalapome Jisasa kalyamona lambinopa, dupame salamanona lamino. 24 Dokopa naima-pipa katenge dupanya mendapu malu dokonya pupala, enda dupame lamili petae simupa kanjamino. Dopaka doko Jisasa nakanjaminona” leambi. 25 Dokopa Jisasame akali dolapo lamaiyoo, “Nyakamba masepae napalenge! Propeta dupame pii leami dupa pitaka kiningina lao nyakambame yapa masala naelyambino. 26 Kraisa doko kaeyala naeyao dopa pyoo tanda nyepala, baanya tii pipae dokonya kolandatana lao masala naelyambipi?” lea. 27 Dopa latala, Mosesapi, propetapi dupame pii pepa piami dupanya tee pyao, Gotenya pii pepa pyapae singi dupa pitakanya baa lao pyapae singi dupa dii tambao dolapo lamaiya.

28 Akali dolapo paanya peambi yuu yakane dokonya tengesa pyakameaminopa, Jisasa kaita londati mendenya paanya pele lao pea. 29 Dopa piamopa, akali dolapome kyeto joo baa lamaiyoo, “Yuu kuiyalanya niki landa pyatelyamona, emba nalimba-pipa palimana kae” leambi. Dopa leambinosa, baa akali dolapo-pipa palimana lao andaka kolandea. 30 Kolandatala akali dolapo-pipa nee nalanya peteaminopa, baame breta mende nyepala, Gote yaka pilyino latala konjia. Konjepala dolapo maiya. 31 Dokopa akali dolaponya lenge tii peteamopa, baa doko-lamo lao kandeambi. Dokopa dolapome baa nakandena lao baa pyoo alu pia. 32 Alu peteamopa nyakamba-lapo laloo pyoo, “Kaitinisa baame Gotenya pii pepa pyapae singi dupa dii tambao nalimba langimupa, nalimbanya mona tii pyoo etete auu pyaa naeyalape” leambi. 33 Gii dokopa dolapo sakatatala Jerusalema pilyiambi. Pilyetala 11 disaipolo dutupapi, endakali waka Jisasa watao paengemapi, dupa kambu pyatae peteamino kandeambi. 34 Dokopa dokaitame akali dolapo lamaiyoo, “Kiningi etete, Kamongo baa malunya sakatatala, baa Saimoneme kandena lao panasalame-lamona” leami. 35 Dokopa akali lapo dolapome kaitinisa pia dupapi, breta konjiamopa Jisasa-lamo lao kandeambi dokopi, dutupa pitaka dokaita lamaiyambi.

36 Matyu 28:16-20; Make 16:14-18; Jone 20:19-23Pia dupanya pii lao peteaminopa, Jisasa dokaitanya kainanya ipao kalyu petala dokaita lamaiyoo, “Nyakama mona yaepao pilyepape” lea. 37 Dopa leamopa, baa timangopi mende kandelyamanona lao dokaitame masetala, walu lao paka kaeyami. 38 Dokopa baame dokaita lamaiyoo, “Nyakama aipuma walu latala, namba kiningi Jisasa-lamona lao masala naelyami? 39 Nambanya kingipi, mokopi dupa kandatala, nambaka kalyenona lao masalapape. Yongepi, kulipi nambanya palimupa kandelyamino dopale dupa spirita mendenya napalengena, namba minao kanjepa” lea. 40 Dopa latala baanya kingi mokopi dupa kandena lea. 41 Dokopa dokaitame eteke pyao, kiningi kandelyamape, sambo kandelyamape lao walu lao peteaminopa, baame dokaita lamaiyoo, “Nee napenge mende dakenya silyape?” lea. 42 Dokopa dokaitame pisa yangapae mendepa, oni andandanya paleta mendepa baa maiyaminopa, 43 baame nyepala dokaitanya enombanya nea.

44 Napala baame dokaita lamaiyoo, “Namba nyakama-pipa kateamano gii dokopa, pii nyakama langio dupa dapa lao leo: Mosesanya loo dupanyapi, Propeta dupanyapi, Wee Buku dokonyapi, dupanya pii namba lao pepa pyapae singi dupa pitaka angi jepenge jilyamona leona” lea. 45 Dopa latala, Gotenya pii pepa pyapae singi dupanya tenge dupa masoo nyina lao, baame dokaitanya masingi tii pisakamaiya. 46 Dopa petala baame dokaita lamaiyoo, “Dapa lao pepa pyapae silyamo: Kraisa doko kaitini dakenya tanda nao kumapala, yuu gii tepo dokonya malunya sakatatana lapae silyamo. 47 Ap 1:8Baanya kenge dokonya koo dupa kunao nepena lao mona kapilyingi mana doko, Jerusalema katao tee pyao lamaitala, akali tata dupa pitaka lamaiyoo patana lao pepa pyapae silyamoaka. 48 Pipumu datupa kandatala, nyakamame lao panapenge. 49 Ap 1:4Salapape! Nambanya Takangeme nyakama mende ditona lea doko nambame nyakama-kisa epena lato. Dopana, nyakama Jerusalemaka katao, ketae kaitinya kyeto singi doko nyakama-kisa ipatamo gii dokonya tuu lapape” lea.

50 Make 16:19-20; Ap 1:9-11Dopa latala, baanya disaipolo dupa laminao Betani pea. Betani katao baanya kingi dolapo minalyetala, baame disaipolo dupa auu pisia. 51 Baame dokaita auu pisoo kateamopa, baa lanyoo kaiti-kisa pea. Dopa piamopa baame dokaita yakinea. 52 Yakinatala pateamopa, dokaitame baa mambo pyapala, eteke andake mende pyao Jerusalema pilyiami. 53 Pilyetala lotuu anda nee nyetae kamapu dokonya koteaka lao Gote baa auu petaena lao mambo pyao kateami.