3
Magana, Jijei no ere gau higidu bona no nomo huwanya ere inyangaro higai! No ere Itou nomo magana gane higai. Onowai waha ngalenga tigini, ere nomo magana gane yafaya. Nere oulaha fai Itou bode alai uwa, waha bode nere ere bode fere alai uwa. O ilibafe gane, elebe ere Itou nomo magana gane yafaya. Onoya waha iinga gonga ere adadu yafei nomo waha foowei uwa inyina. Ariya ere isiya, saini Kristus no malala heige gonga, ere no tigini urei nomo, onodu boya ere no nogo dorofe heigo boya. Onodu nere fai oruwanga no itari tude waha, nere nage Itou ago langa jijiga uwamudu bode, nere Kristus no jijiga uwau yafana dorofenga jijiga uwau yafa-yafade.
Fai no une tafa-tafana waha, no Itou nomo nuuni beele feiyana. Une no nuuni beele feiyawei nomo fanyimu. Tere alai, Kristus no une uuluwei nomo heigai, onodu une ete no langa inyei uwa. Ariya fai no Kristus fada tu-tuna waha, no une nomo fanyimu ada oojoo‑ojona. Ariya fai ete no une nomo fanyimu oojowei mata wonga, ere edo iso boya, fai waha no Kristus urei uwa, onodu no Kristus bona alai uwa.
O yame magana mene-mene, tere ure dewagu, gamaji fai ete yaawa tigoga. Fai no fanyimu tigini onona waha, no fai tigini, Kristus dorofenga. Gai aminanga hugu warou langa, Satan no gai-gai une tafagai, onou bona fai no une tafagou waha, no Satan nomo fai. Ariya Itou Idau no Satan nomo haruwe inyabamu fudu te kaite fuwei nomo bona malala heigai. Fai ete no Itou nomo magana heigei mata bona wonga, no une nomo fanyimu ada oojo-oojona. Itou no nogo nomo ago auma yafou fai waha langa inyina, onou waha bona no une nomo fanyimu oojowei nomo edo uwa. No Itou nomo magana yafana. 10 Ariya ere faiwei no Itou nomo magana yafana, onodu faiwei no Satan nomo magana yafana, ere waha haawedu isei nomo wonga, ere edo benou iso boya, fai no fanyimu tigini ada onona waha, no Itou nomo uwa. Onodu fai no Itou nomo magana ila tigini ada gau nigina waha, no fere Itou nomo uwa.
Yesus no ere fai ila gaude nigei nomo fanyimu waha abitimu higina.
11 Gai aminanga, tere beele benou iseye, ere etenga-etenga fai ila gaude nigo boya. 12 Ere Kein dorofe adai yafoya. Kein no Satan nomo fai, no bemu dukote wainga umai. No bemu taate bona dukote wainga umai? No bemu dukote wainga umai taate bona, no nomo fanyimu inyaba, onodu no nomo bemu nomo fanyimu no tigini.
13 O baabo gane, nere oulaha fai tere honggoro fai tafa tigei mata wogunga, tere waha bonade adai horoto wagu. 14 Ere ebere huwanyage Itou nomo fai-aita ila nigi-nigiya waha bona ere isiya, ere umei nomo fanyimu awadu agege auma yafei nomo fanyimu langa yafaya. Ariya fai no nomo huwanya nere baabo gane ada nigina waha, no umei nomo fanyimu langa gai yafana. 15 Ariya fai no nomo bemu tigini ada gau tu bona huwanya inyaba tuna waha, no fai dukote ganga umena dorofe. Onodu tere isiya, fai no fai ete dukote ganga umena waha, no ago auma gai-gai yafou waha tei uwa. 16 Yesus no ere hoyo higei nomo bona no nogo ago auma yafou waha awai, onodu fanyimu waha no fai ila gaude nigei nomo fanyimu waha abitimu higai. Onou waha bona ere fere Kristen baabo gane hoyo nigei nomo boya ebere agege auma yafou awei nomo. 17 Ariya fai ete no oula beha nomo dada bagu wonga, no baabo ete dada bona tutu tuna waha uredu bona baabo waha bona ada augami tuwei mata wona wa, ere isiya, fai waha no Itou nomo fanyimu langa nere fai ila gaude nigei nomo waha, fai waha langa inyei uwa. 18 O yame magana mene-mene, ere beele langanga yo hurage langanga baabo gane ada gau nigo boya. Ere ebere huwanyage nere nigi deboya, hilou tafa nigei nomo.
Kristen nere Itou ago langa edo danga bagu oto wodbode.
19-20 Ere fai ila gaude nigei mata boya wonga, ere edo iso boya, ere ngalenga beele oojoya. Edo ebere huwanyage no dada ete bona kot langa tafa higona, ariya ere Itou ago langa edo huwanyage foinga inyi gonga yafo boya. Taate bona, Itou no dada oruwanga bona isina, onodu no nomo isou ere ebere huwanyage langa isou inyina waha feiya dewou. 21 O ilibafe gane, ere ebere huwanyage no ere kot langa tafa higei uwa wonga, ere Itou ago langa danga bagu oto-otoya. 22 Onodu ere dada ete boya hauyadu no isoki tuwei mataya waha, no ere higi-higina, taate bona, ere nomo nuuni beele oojo-oojoya, ono boya ere fanyimu no gau tuna waha ono-onoya. 23 Ariya no nomo nuuni beele benou. Ere no nomo Idau Yesus Kristus nomo unyi boya huwanyage ngalenga wonga, ere etenga-etenga nere ila gaude nigo boya, no ere lehigai dorofe. 24 Fai ete no Itou nomo nuuni beele oojowei mata bona wonga, fai waha no Itou fada tu ganga, Itou no fai waha fada tuna. Itou no ere Hauri Guuni higi ganga, Hauri waha no ere benou abitimu higina, Itou no ere bagu yafana.