1 Yosefalï gobela ïlo busa amolige, dolö dafidilo amolige, mala dawadigi amolige, Galïsolö dolö amoli sulubadelage gegedolahilä ilia hamomolö amoïe ado didiäha dilo. Didiäha dilolahilä ilia Yesu e igi ëfëa nafodolahilä Bailadi neebea sigi gaula asi. 2 Sigi gaula maasebegi, Bailadia Yesuma nabahalea, Yu udia dolöïe beaha aligilo ginida dilela nabi. Amala nabasebegi, ea säla obëgësalea, Dia säse gomelëla säi. 3 Gobela ïlo busa amolia sähalea, Eada nafade yafie hamoimelëla säi. 4 Ilia Amala säsebegi, Bailadia ema bu elö nabahalea, Dia ado afädë made säla obëgëmolöle. Ilia dia nafade yafie hamoila säi amo nabilela nabi. 5 Amala nabi amogi Yesuea ado elö made säla obëgësebegi Bailadi e fudugisa nelo.

6 Gäheo i sulubadelagi Segeyo Ede amoïe molö nase segeyo amo galada, udia dolöea galabaia negei amoligi ëi säla gowe fisigämola säsegi Bailadia fisigähamu aligilo. 7 Segeyo amo gaaluda, dolö odoaea gamanebalä nudusalea dolö odoa nufudasebegi, ilia ili galabaia negei. Amogi dolö afädë galabaia negei nelo amoïe ëida, Balabasa. 8 Udia dolö gegedoi amolia Bailadi neebea maalahilä, ema sähalea. Dia nilïma gäheo i sulubadelagi hamolo amo gadola walio hamomäiamelëla säi. 9 Ea ilima säla obëgësalea, Na Yu udia dolöïe beaha aligilo gini dihilima fisigämäiala helësësebelela nabi. 10 Amala säi amoïe mida, gobela ïlo busa amolia Yesuma mudiala mihalälahilä e sigi gaula misi gabula helësëla, Bailadia amala säi. 11 Gaso, gobela ïlo busa ilia, udia dolö gegedoi amolia Bailadima, Balabasa hilima fisigämäiala gelola sämäiala si nigilasi. 12 Bailadia ilima bu elö nabahalea, Dilia Yu udia dolöïe ginila sälo neebe gowema na abilia hamomäia helësësebela nabi. 13 Amala nabasebegi, ilia bu uuala sähalea, Eda i fügäigi baala negemalola säi. 14 Amala säsebegi, Bailadia ilima sähalea, Mi edogi. Ea edo nafade hamoi gabiola nabi. Amala nabasebegi, ilia gelolafalï sähalea, I fügäigi baala negemalola säi. 15 Amala säsebegi, Bailadia, udia dolö gegedoi amolia obeägïmäia, Balabasa hilima fisigälahilä, ea ami dolö ilia Yesu fëgämalolahilä, ilia i fügäigi baala negemolö sigi mosalai.

16 Ami dolö amolia Yesu sigi gaula gamane sigi aligiloïe mosö yala isogi nogila digai. (Mosö amoïe ëida Beledoliama.) Ilia ami dolö odoage misialosebegi gegedoi. 17 Gedolahilä ilia fagulo sedade bëi gadoi Yesuma salugasilahilä, ëfë äyo gägäi amalela nasigïla giniïe habuga gadoi hamolahilä ïe busagia salugasi. 18 Amalahilä ilia naabo sögödigila sähalea, Yu udia dolöïe beaha aligilo gini, namolöi namiäiamelëla säi. 19 Amala sälahilä, ilia ïe busagia buudi damuia nufudalahilä, gofedela gagalai. Amalahilä ilia ïe ëi gauia adogose gadoi hamola emo gumu sasagala dia digafui. 20 Ilia ema gagadela hamomolö amo gadoi hamosa maadelahilä, fagulo bëi sedade gäsi amo gilahilä hïle fagulo amo salugasi. Salugasilahilä ilia e i fügäigi baala negemolöïe segea sigi asi.

21 Ili idiafa afiaha dibegi Sailini fii dolö afädë ïe ëida Saimono. Alegisäda Ulufasalele eedo amo, sagaiala maaha nebegi gausiala digalahilä, ami dolö amolia ema Yesuïe i fügäi gaumalala eegei. 22 Ilia Yesu sigi gaula sege ëi Gologoda asi. (Gologoda nilïle ado adolada Busa Giwi Sege.) 23 Ilia wani ödäge i afädëïe ödä muwege gegoalahilä egali muäia ï gaso, ea made mai. 24 Amalahilä, ilia e i fügäigi baala negei. Ilia ïe fagulo amo nowëa nimabelela, ilia sadu dahilahilä, ïe fagulo amo amala mogei. 25 Yose eso neëla udigisa nebegi, e i fügäigi baala negei. 26 Ea nafade hamoila sälo amolia dëdësaleada, Yu udia dolöïe beaha aligilo ginila säla dëdëla negei. 27-28 Amase, Yesu baala negei amo gaalu, fa nelo dolö äudä, elö ïe naabo dafädimadi, elö ïe naabo fefeädimadila, i fügäigi baala negei. 29 Udia dolö e dibeadi baagila afu mafusaleada, Yesu gagadiabola busa dugagila sähalea, Ëhehe, Godeïe mosö haila digilahilä, segeyo ohodoagi ulimolöeai amo, 30 dihïmu damula awäla i fügäia adogoila digamola säla baagila nelo. 31 Amo gadola wäla gobela ïlo busa amoliage, mala dawadigi amoliage Yesu gagadiabola säla didigahalea, Eada udia dolö odoa ugila negela wahilo amo gadola, e hïmu ugila negemolöi made gabugi dialealedu. 32 Nilïa ema asigi afädë negedeläïe Afädë Memelei, Isilale udia dolöïe gini ameada, e i fügäia adogoilahilä digamäia. Nilïa amo bealahilä, asigi afädë negedeläla säi. E i fügäigi baala negei gaalu, i fügäigi baala negei äudä amoleage e gadiabola amo gadolamu säi.

33 Eso mogogila eso bëgise gaaluge, sege sulubadela gasilasimu dilo. 34 Eso bëgise gaalu, Yesuea gelolafalï säia adahalea, Elöi, Elöi, lama sabagadanila säi. Nilïle ado adolada, Nïe Gode, nïe Gode, abisigi ne dïgïla asila säi. 35 Amala säi amo nabalahilä, udia dolö odoa ami nefolalo amolia sähalea, Nabuö. Ea Elaia wesebegola säi. 36 Afädë baluluia awälahilä, nelebo afädë dahudu gadoi wani ödä gamogai dibea ami gelahilä, i bidigi yaala, egali muäia ïalahilä sähalea, Aso. Elaiaea e i fügäigi dibea adogoi fisigämolö maasebelela beaha aligidila säi. 37 Yesuea gelola uualahilä hame doala asi. 38 Amasebegi, gobela ïlo mosöa fagulo edefade negei dilo amo, gadogola gadelala digalahilä, elö eamu eamula negesi. 39 Ami dolö hädali afädë beaha aligilo dolö amea sida adogola beahamelebe, Yesu amala hame doala asi amo bealahilä sähalea, Dolö goda dofä Godeïe malö gabula säi. 40 Amo gaalu, udiafalï holöbö wagadi madela nea, sida gala nefolalo amoligi Magadala udia Melige, Yosese ïe ëo Yameselele eme Melige, Salomege nelo. 41 Dafidi Yesu e Galili neëgida, ilia e awäse amo gadola awälahilä, e ugila negesa filo. Udia odoa yafie ebalä Yalusaleme misi amolige nefolalo.

42 Segeyo amoda nelebo daialo segeyo. Deadise gaalu, segeyo Sabada aiyo namolö gabula helësëlahilä, 43 Alimadia dolö Yosebe Bailadi neebea awälahilä, bedälo made mumulasi amea, Yesuïe domalo nimolö audulela nabi. Dolö amoda Galïsolö amoligi asigi hedabi negei nea, Godea Beaha Maadela Sigi Neebe amo beaha nelo. 44 Amala nabasebegi, Bailadia e aabela baagoi gabula fudugilahilä, ami dolö hädali afädë beaha aligilo amo welahilä e hä baagoilela nabi. 45 Amala nabasebegi, Bailadima ami beaha aligilo amea e hä baagoimelëla säi amo nabalahilä, Yosebema ïe domalo nimolö dofeala säi. 46 Amala sälebegi Yosebea fagulo falei hedabi afädë nealahilä, ïe domalo i fügäidaia dibe amo neala gaula digalahilä, fagulo amea usulala gaulahilä, igi äbä dafidi hamola negei diloa ami baumolö gaula asi. Bausilahilä, igi edefademalä afädë bebugula gaula maalahilä amea idi gasi. 47 Amala bausi dibe amo Magadala udia Meli Yoseseïe eme Melilea melï.