1 “Yasuane isiapo Unihae Kotimo murikimasane ipi Keresopo.” Aira aporo hinamoane Kotimo hokosapo. Arirakano Koti Atamo hokosa risike, isiapo Ataki himu tumurumo hemakapura ayiáka, isiapo Atamo hokosa metakirane, isiapo mae papa parisa ayiáka, iaki himu tumurumo hemakapurakanapo. 2 Isiapo Kotiaki himu tumurumo hemakapukua, arirakano Kotimo somemane motosane soko kakimaka ayiáka risikino Kotimo hokosa suane isiapo himu tumurumo hemakapurakanapo, aíyaka isiapo hemakapurakanapo. 3 Asiamo Kotiaki himu tumurumo hemakapurane oyapo. Kotiaki himu tumurumo hemakapuraka, Kotimo somemaneane soko kakimaka rakiraka rerapo. Asiamo Kotimo somemane amo isuane maumimarerafapo. 4 Isu Kotimo hokosasamo hauaka omo menane rukutopakatapirapo. Asiamo isiapo Kotiaki himu hakásaraka hemakapura amo hauaka omo menane rukutopakatapirapo.

5 Hauaka omo menane rukutopakatapiakosa aporoane epare? “Yasu ipi Kotimo hokosapo.” Aira aporoamo hauaka omo menane rukutopakatapirapo. 6 Rukutopakatapiakosakipoko Yasu Kereso hauaka wo pesapo. Wate fana Kereso peakosaposane Yasu pesane ipi Keresopo. Aíyaka aporomo asekeasimo hemo soko yapimo soko*Yasu ipi ira matopesa paremaresa maiya amo e ketayia ferepemo kareane he yapiyaki hakāsa pusuapo. (Yone 19:34) tarisiapo. Yasu hea tapukumaresane soko, ira matopesa paremareraka yapi pusuapo. Aporomo eane asekeasimo he hákasamo tarisiafapo. Hemo soko yapimo soko tetákara tarisiapo. Arirakano Ho Kotesamo soko someraka, “Yasu ipi Keresopo.” Aíyaka isiapo hemakapusimo Ho Kotesamo somesapo. Kakaro somera kepoane Ho Kotesa ipipo. 7 Yasu ipi Kotimo hokosapo, aíyaka isiapo hemakapusimo makata isíamo tarisiapo. 8 Ho Kotesa soko, he soko, yapi soko, makata isia tarisia amo kepoane hakása yiyapo.

9 Kepoane Yasu pesane ipi Kotimo hokosapo. Eane Kotimo murikimaka pusierakano e pesapo. Pesane makata isía amo isuaki tarirakanapo. Tarirakano asekea kakimaka hemakapunie. Asesa aporo wikinisimo somerakano isiapo kakimarapo. Asesa aporo wikinisimo Kotimo hokosa Yasuane tarira ayiáka, isiapo kakimakasimo Kotimo makata isía amo isuaki tarisiapo. Arirakano hauaka wo asesa aporomo makata tarisiane Kotimo makata isía tarisia amo marokesapo. Ipi hokosane Keresopo. Aíyaka Kotimo makata isia amo isuaki tarisiapo. 10 Tarirakano Yasu ipi Kotimo hokosapo. Aira aporoamo makata isia ane hemakapuraka, himo asekea hemaka apura ayiáka hemakapurakanapo. Arirakano kakimakanafonona aporoamo Kotiaki someraka, “Nómo isuaki kotafe someaka atarire.” Aíyaka Kotimo ipi hokosane Keresopo aíyaka hemakapusimo makata tarisiane asekepayaraka hemakapurafapo.

11 Arirakano Kotimo makata tarisiane oyapo. Kotimo ipi yaiya rerane isuaki kasapo. Isiapo Kotimo hokosaki kataka marekea risikino yaiya risikiakosapo. 12 Kotimo hokosa Yasuaki kataka marekea risia aporo hinamoane yaiya risikiakosapo. Arirakano Kotimo hokosa Yasuaki kataka marekea risikianafonona aporo hinamoane i yaiya risikiakosafapo. 13 Kotimo hokosa Yasu Keresoaki repo himu hakásaraka hemakapukua risikino, re yaiya risikiakosapo. Ane repo hemakapusimo ano Yonemo sawi one reaki poparaka makerakarapo.

14 Isiapo kurikurinamo Kotimo hemakapusua aki, isiapo hemakapusua aki, tati siasekeno ane Kotimo sia kaiyakosapo. Aíyaka isiapo namonafaraka mapiraraka kurikurihokosapo. 15 Kotimo ipi hemakapusua aeyaka isiapo kurikurirakano, Kotimo kaikia aohokosapo. Aíyaka isiapo hemakapurapo.

16 Isiapo Keresoa paosa aporo mae metamo makata watikiaka rakisia nine, makata watikisa amo eane kura ikia kara á karikia punafonorakano epoko kurikurihoanie. Kurikurihoane, aporoamo watikiaka rakisiane hufitaerakano koteaka rerane Kotimo eaki kakakosapo. Arirakano aporo metamo makata watikisa meta rakiraka reke, ipi kura ikia kara á purapo. Kura ikia kara á pusua aporo akipoko kurikurihoanie, aíyaka nōmo somerakanafapo. 17 Makata watikiaka rakira kekepo suane kakaro watikisapo. Makata watikisa meta aporomo rakiraka rekeno, kura ikia kara á pukusapo. Arirakano makata watikisa metakira aporomo rakisiane hufitaerakano Kotimo mafanapo. Mafarakano, aporoane kura ikia kara á pukusafapo.

18 Aporo hinamo i Kotimo hokosasamo ipu watikiaka rakiraka risirafapo. Aporo hinamoane Kotimo hokosasamo Yasumo mafairaka asekea rekenapo. Asekea rekeno aporo hinamoane Satanemo sakainafapo. 19 Kotimo hokosane isupo. Asiane hauaka kara wo aporo hinamo Kotimo hokosa risikianafonosane Satanemo unihaeaka asekea rekenapo. 20 Asekea reanine Kotimo hokosa Yasu hauaka wo pesapo. Pekea isiapo Kotiane hemakapusimo, hemakapura ane epo isuaki kasapo. Kasasamo Yasu Keresoaki kataka marekea risike Kotiaki soko kataka marekea risikinapo. Kotiane ipi namo kakaro Kotipo. Yaiya rera kepoane ipipo. 21 Hameo, yatafu soko, yakasa ho soko, kotafe hora hoane soko, kotafe koti pariraka risia, i suaki patera tarikia risikianie.