6
“Kotimo hemakapukua yaku ararenane repo metakariakopo,” aisane oyapo.
1 Isiapo Kotiyaki hakāsa rakiraka risike, reaki paroaka somerakanapo. Kotimo re hemakapukua yaku ararenane, repo mosane hemakapuraka, “Makata ane nenakamaka makatareapo,” aíyaka hemakapukupo. 2 Fana Kotimo somerakano porofete aporomo kaikia popasane oyapo.
“Nōmo re yaku ararehokosa ikia karane ropakataesapo. Repo anoaki mafasisiesa maiya hakása yiamo nōmo re mafasisiapo. Asiamo nōmo reane ararehoasimo, repo anoaki wása maiya amo nōmo kaisiapo,” aíyaka popahoareapo. (Aisaia 49:8)
Asiamo isuane Kotimo yaku ararehokosa ikia kara ropakataesane yaiya kakenapo. Mafasiakosapo aíyaka fana popasane, pipu yumo soko yaiya kakenapo.
Kotimo makata rakirane Poremo rakisiasamo aporomo eane mokoatikisane oyapo.
3 Repo isuaki someraka, “Repo watikiraka rakirakanapo,” aihokohoamo, isiapo repoko rakiraka, ikia kara makata matasosakipoko terafaka arura ayiáka, terafaka rusimo, matasoraka arakira ayiáka, isiapo mokome some kaka rakirakanafapo.
4 Isu Kotimo aporo raipapo, aíyaka repo asekea hemakapusimo, isuaki aporo metakiramo mokopipirakano, isiapo Kotiane metakarirakanafapo. Isu Kotiyaki wakapuraka risikinapo. Wakapuraka risike isu mokoatikirakano soko, 5 rurakano soko, tipura kerakano soko, isuaki sapehoasimo kirimarakano soko, mawaforo marerakano soko, yaiya mekéraka risike, Kotipoko wakapuraka rakirakanapo. Rakiraka risike, waforosasamo ereamo wakanafonoraka, arirakano makata soko nanafonoraka himuraru ayiáka risike yia, isiapo Kotiane metakarirakanafapo.
6 Arirakano isiapo ereketae hemakapukua risike, arirakano makata kepo koteaka hemakapukua risike, arirakano aporo metakiramo isu mokoatikirakano soko, isiapo sapehoanafonoraka risike, arirakano aporo hinamo metakira arareraka makoteraka risike, isu Kotimo aporo raipane isusasamo aporo metakiramo isuane asekeasimo, isiapo ayiáka koteaka susu rakiraka risikinapo. Asiamo Ho Kotesa isu himua risikirakano, aporo hinamo suane isiapo himu tumurumo hemakapurakanapo. 7 Kotimo kakaro someane isiapo some karáka risike, Kotimo wakapu amo isu ararerakano, isu koteaka risikinapo. Ereketae susu rerane asi tare asíapo. Hokono tumurumo maka, hokono kasakaimo soko maka area ayiáka, ereketae susu rerane maka rekenapo.
8 Arirakano aporo metakiramo isu makáraraka, arirakano aporo metakiramo isu mawakasemarakanapo. Arirakano aporo metakiramo isuaki someraka, “Re aporo kotesapo,” airapo. Arirakano aporo metakiramo isuane hokomaka somerapo. Arirakano aporo metakiramo isuaki someraka, “Repo kotafe somerakae,” airapo. Aisa nine isiapo namo kakaro susu somerapo. Aporo metakiramo isu mokoatikirakano yia, isiapo Kotimo kakaro someane metakarirafaraka yaiya some karakanapo.
9 Arirakano aporo metakiramo isu asera nine isu aseraka makefenapo. Arirakano aporo metakiramo isu rusua kusuahonine, isu kusuafapo. Arirakano isu rurakano soko isu kusuafapo. 10 Arirakano aporo metakiramo isu mahisihoasimo rakirakano yia, isu seseraka risikinapo. Arirakano isu makata kemo faraka risike yia, mahimuraka yaiya rekeakosa makata kemoane aporoaki isiapo karápo. Arirakano isu makata kemo forokoa risike yia makata suane isiapo menapo.
11 Korini aporo hinamo reo, isiapo reaki hufitaeraka somerakanapo. Isiapo re himu tumurumo hemakapukua re ararehoko hemakapurakanapo. 12 Isiapo re ararehoko hemakapurane metakarirakanafapo. Asiane repo isuaki hemakapurane matasorareapo. Asiamo isina yia himu hakásaraka hemakapurakanafapo. 13 Isiapo soko reane ararehoko hemakapura yaiya, repo soko isuaki ararehoko hemakapunie. Aíyaka aporomo ipi hokosaki some akara ayiáka, nōmo reaki ayiáka some karakanapo.
“Keresoa paohoanafonosa aporo hinamoyaki hakāsa sarimaraka rakiakopo,” aisane oyapo.
14 Keresoa paosa aporo hinamoyaki, nena aporo hinamoyaki, hakāsa sarimaraka rakipe pukupo.*Aporo tetámo makata ira paka puraka meta horopo meta kitake asia tati ira paka purafapo. Makata rakiakosakipoko aporo tetá tati siasa rakirapo. Aina ayiáka aporo tetá Keresoa paosa tati rakiane siahoasireapo. Arirakano makata kotesayaki makata watikisayaki sarimanafapo. Kepo hakásafapo. Arirakano faesayaki katosayaki sarimaraka hakāsa risirafapo. 15 Arirakano Keresope Satane tati sarimaraka hakāsa tákeraka risirafapo. Asiamo Keresoa paosa aporomo Keresoa paohoanafonosa aporo tati makata hemakapurane hakása ninesafapo.
16 Arirakano Kotimo apeane soko yatafu yakasa ho menane soko, tati hakása ninesafapo. Yaiya rera Kotimo apeane isu supo. Arirakano Kotimo somesane oyapo. “Re suane nōmo aporo hinamopo. Asiamo repo Kotiane anopo. Ano reyaki hakāsa rekeakosapo.” Aíyaka Kotimo somerakano popahoareapo. (Wok Pris 26:12; Jeremaia 32:38; Esekiel 37:27)
17 Arirakano maiya metamo Unihae Kotimo someraka,
“Nena aporomo hemaka apura ayiáka repo hemakapukohoamo re fasikia risikianie. Fasikia risike ipu aina watikisane kekemahoanafonorakano, nōmo re pasimokoa karikia nakosapo.” (Aisaia 52:11; Esekiel 20:41)
18 Karikia nenaka nōmo reaki someraka, “Repo atane anopo nōmo aporo hokosane soko nōmo hinamo hokosane soko repo,” aihokosapo. Aíyaka Unihae Koti káramo somerakano popahoareapo. (2 Samuel 7:14; 7:8)
*6:14: Aporo tetámo makata ira paka puraka meta horopo meta kitake asia tati ira paka purafapo. Makata rakiakosakipoko aporo tetá tati siasa rakirapo. Aina ayiáka aporo tetá Keresoa paosa tati rakiane siahoasireapo.