Tarira Aporomo Makata Rakisiane Oyapo.
Tarira Aporomo Makata Rakisia sawi one mahemakapukusa someane oyapo.
Yasu hauaka wo reke makata rakisiane, Rukimo fana Tiaforaseaki sawi meta poparaka makesapo. Amo patera kesekea soko, sawi meta one Rukimo Tiaforaseaki poparaka makesapo.
Yasu hepene yapura hisiakipoko, Kotimo ipi Ho Kotesane Keresoa paosa aporo hinamo ararehoasimo, hauaka wo pusiesapo. Ho Kotesa peraka, Kotimo wakapuane kakimara aporo hinamoaki kasapo. Arirakano Yasu hauaka wo reke aporo metakira Yasuyaki hakāsa pusuapo. Yasu hisiakipoko ipu Yasuane some kape pusuapo. Some kape purakano iane tarira aporopo, aíyaka somesapo.
Ho Kotesamo iaki Kotimo wakapuane karakano ipu makata kara wakapuaka rakisiapo. Aporo hinamo makata tasane ipu mafasapo. Mafaraka Yasu kusua maturikia taesane some karakano, aporo hinamo yakaimo kakimaraka, ipu makata watikisane metakarikia Yasu Keresoa paosapo. Yu aporoane soko, Yu aporohoanafonosane soko, aporo hinamo yakai Keresoa paosapo. Asiasamo Yu aporo Keresoa paohoanafonosa aporomo Keresoa paosa aporo hinamoane kára mokoatikisapo. Mokoatikirakano Keresoa paosa aporo hinamo hauaka kekepoa teketarikia pusuapo. Teketarikia puraka, ipu Yasumo someane hauaka kekepoa soko somesapo. Tarira aporo soko, hauaka kekepoa pukua Yasuane some kasapo. Pore kimisi puraka, Yasuane some karakano taone metakira a sese apeane kepo maresapo.
Tarira Aporomo Makata Rakisia sawia some kepo parakuraka popasane oyapo.
1:1-26 Yasu hepene yapura hinakano, Ho Kotesa peakosaposane perakarihoamo, kakimara aporo hinamomo kau toapo.
2:1-47 Ho Kotesa pesa maiya amo, Pitamo some karakano, aporo hinamo yakaiane Yasuaki risikiako parisapo.
3:1–6:7 Yarusarame sitia tarira aporomo makata kara wakapuaka rakirakano, Keresoaki yunuraka risia aporoamo ian e mokoatikisapo.
6:8–7:60 Keresoaki yunuraka risia aporoamo Sitifene waseremaka, eane ekemo karesapo.
8:1-40 Sameria hauaka á tarira aporomo Yasumo makata rakirane rakisiapo.
9:1-31 Soreane Yasuaki rekeako parisapo.
9:32–12:25 Pitamo Yasumo makata rakirane rakisiapo. Yu aporohoanafonosaki Pitamo some karakano i risikiako parisapo.
13:1–14:28 Porepe Pánapase teta kimisi pusuapo.
15:1-35 Yu aporohoanafonosane Keresoa paosasamo, Yarusarame sitia, sése aporo asekea risia aporomo somemaneane maroposapo.
15:36–18:22 Porepe Saerase teta efere hunia kimisi pusuapo.
18:23–21:16 Pore efere hunia kimisi pusuapo.
21:17–23:35 Yarusarame sitia Pore waseremaka Sisaría taonea karikia pusuapo.
24:1–26:32 Sisaría taonea Pore tipura makesa rekeno, ipu eane hukurusuapo.
27:1–28:15 Pore Rome sitia puraka kasu sipia ripaka pusuapo.
28:16-31 Rome sitia Poreane ipi apea tipura reke, aporo hinamo yakaiaki Yasumo someane some kasapo.
1
Rukimo Tiaforaseaki sawi poparaka makesane oyapo.
1 Fana Tiaforase néaki nōmo sawi meta popasapo. Popasane Yasu hauaka wo reke ipi makata rakiraka reane soko, some karaka reane soko, keseke e rusua kusuane Kotimo maturikia taeraka hepene yapunaka pasimarakano hisiane soko, makata su nōmo neaki poparaka makesapo. 2 Arirakano Yasuane hepene yapura Kotimo pasimakasiraka Yasu hauaka wo rea maiya amo tarira aporoaki someaka maresapo. Someaka maresane ipu makata rakiakosane Ho Kotesamo someaka marerakano tarira aporoaki somesapo. Arirakano tarira aporoane*Tarira aporoane Pisini meaka yano motosa Aposopo, airapo. Yasu hisiakipoko tarira aporomo makata rakisiane Rukimo Tarira Aporo sawia popasapo. fana Yasumo aporo hakāsa pura murikimasa ayapo.
3 Arirakano Yasu kusuane Kotimo maturikia taerakano turikia pukua sere foti amo (40) tarira aporomo e asekeasimo e pekea pukua efera hunia soko pekea pukua ayiáka yape yakai iaki e kakaro maturikia taesane tariako pesapo. Ipu hemakapuraka, “Yasu maturikia taesane turikia pukua rekenarakapo.” Aíyaka hemakapurapaka i risiakipoko tariako peraka, Kotimo unihaeaka asekea reane iaki somesapo. 4 Iyaki hakasa sarimaraka rea maiya amo epo someraka, “Yarusarame sitiane metakarikia pukupo. Atamo makata kakakosaposane mokoako Yarusarame siti yia kau tokoanie. Makata kakakosaposane nōmo reaki somesapo. 5 Yonemo ré hea hákasa tapukumurisiapo. Arirakano maiya wakasema risina Ho Kotesa re himua muriakosapo.” Aíyaka Yasumo somesapo.
Yasu hepene yapura hisiane oyapo.
6 Tarira aporo suane sarimaraka risike ipu Yasuaki someraka, “Unihaeo, fana isiapo isina Yu aporomo unihaeaka asekea risia ayiáka, maiya yumo Isiraya hauaka ane isiapo isina unihaeaka asekea risikiasimo nómo mareakosare?”†Yasu rea maiya amo Rome kamani aporomo Isiraya hauaka ane unihaeaka asekea risiapo. 7 Airakano Yasumo iaki someraka, “Ayiakakosa maiyane nōmo Atamo hákasa hemakapukua marerapo. Marerane repo hemakapurafapo. Ayiakakosa maiya ane repomenafapo. 8 Arirakano Ho Kotesane re himua murirakano maiya amo epo wakapuane repo mokoakosapo. Epo wakapuane repo mokoa risike, anoane repo some kakakosapo. Nōmo some kasane soko, repo some kakakosapo. Yarusarame sitia soko, Yutía hauaka á soko, Sameria hauaka á soko, hauaka sua repo ano asesane some kape pukusapo.”
9 Aíyaka someaka farakano, ipu aseane Yasu hepene yapura hinakano asesapo. Asekea risiakipoko Yasuane akomo matairaka maka hinakano asekea fasisiapo. 10 Yasu hinakano aporomo ti yapura asekea risiakipoko, hepene aporo tetá pasu pakaesa osoraka wate foaka pekea 11 iaki someraka, “Kariri aporo reo, repo marirakano ti yapura asekea risikinare? Yasuane Kotimo pasimarakano hinakasa ayiáka, keseke soko yaiya paripeakosapo. E hinakano repo aserakasa ayiáka Yasu efera hunia paripeakosapo,” aíyaka hepene aporomo somesapo.
Yutase finihaoa rekeasimo aporo meta murikimasane oyapo.
12 Tarira aporo i ūri Orofeane metakarikia Yarusarame sitia poparipusuapo. Arirakano Yarusarame siti aeyaka ūri Orofe ane make tamiyiyapo. 13 Arirakano i Yarusarame sitia pauraka huturu apea i risira á hisiapo. Aporo apea poparipusua susuane yano taesane oyapo. Pita soko, Yone soko, Yamese soko, Enitu soko, Firipi soko, Tomase soko, Patóromiu soko, Matiu soko, Afiasemo maeya Yamese soko, kamaniaki patera asesa aporo Saemone soko, Yamesemo maeya Yutase soko, i su á sarimaraka toapo. 14 Namina su sarimaraka himu hakásaraka hemakapukua Kotiaki kurikurisapo. Ipu kurikuriraka toa a hinamo metakira soko, Yasumo kaīyia Maria soko, Yasumo mamanea soko, iyaki hakāsa sarimaraka toke kurikurisapo.
15 Maiya amo Keresoa paosa aporo hinamo sarimasane wane harote tuaneti su (120) sarimasapo. Sarimarakano Pita takahikia iaki someraka 16 “Maeo, Yutasemo Yasu parakehokosane, wate fana Ho Kotesamo Tefeteaki some karakano, Tefetemo popahoareapo. Kakaro ayiakakosapo aíyaka popasane faserepesa ayareapo. Yutasemo aporo metakira pasimokoa e fanaraka pukua, Yasu parakeraka, ipu Yasu waseremasapo. 17 Arirakano fana isiapo Yasumo makata rakirane rakisimo, Yasumo isu soko murikimaka, Yutase soko murikimasapo.
18 Murikimasa nine Yutasemo mone maraka Yasuane parakesapo. Wakasema nina, é kuraka hauaka harepa ikia huruperaka fako fausapo. Faurakano asekea, hauaka á Yutasemo ipi mone mosa amo hauaka ane roposapo. 19 Fako fausaporakano Yarusarame aporo suamo kaikia, hauaka roposane Yu aporo meaka yano motoraka Akeramapo. Namo meaka yano motoraka Yapi Pusua hauakapo.
20 Asiamo wate fana Kotimo sawia Tefetemo popasane oyapo. ‘Aporomo ipi apeane kauanehokosapo. Ipi apea aporo metakira risikiakosafapo,’ aíyaka popahoareapo. (Buk Song 69:25)
Maiya metamo Tefetemo poparaka, ‘Ipi rakirane aporo metamo rakiakosapo,’ aíyaka popasane Yutasemo ayiakakosane Tefetemo popahoareapo. (Buk Song 109:8)
21 Aíyaka popasasamo aporo metamo isuyaki hakāsa rakisimo isiapo murikimakosapo. Aporo murikimakosane oyapo. Yasu isuyaki koraka rea maiya amo, aporo meta isuyaki hakāsa pusuane e murikimakosapo. 22 Arirakano Yonemo kepo marekea aporo hinamo hea tapukumurisia maiya amo, nina, Yasu kusua maturikia taerakano, turikia pukua hepene yapura hinakano, asesa aporo isuyaki hakāsa pusua aporoane isiapo murikimakosapo. Yasu kusuane maturikia taerakano turikia pusuane asesa aporoamo isina hakāsa somehokosakipoko murikimakosapo.” 23 Aíyaka Pitamo somerakano aporo tetá nenakamaka murikimaraka, meta yano motosa Yosefe Pásapase, ipi aporo ira yano motosane Yásatase eane murikimaka, arirakano aporo meta yano motosa Matiase ipu murikimasapo.
24 Murikimaka faraka ipu kurikuriraka, “Unihaeo, aporo tetá one isiapo nenakamaka murikimasapo. Murikimarakano tetapō himuane nómo aserapo. Aporo tetá yano motosa popasane, hakása meta nómo murikimaka isuaki tarinie. 25 Yutasemo tarira aporomo rakirane metakarikia, watikiaka rakisiakipoko watikisamo ropo mara hauaka á pusuapo. Tarira aporomo rakirane epo metakarisiane, aporo metamo rakisimo nómo murikimaka isuaki tarinie,” aisapo. 26 Airakano aporo Kotimo murikimasane asekea hemakapuko, aporo tetá yano motosane poparaka petoro kakarua makekea, mahohoraka sawi hakása huruperakano aseane, Matiase yano motosa huruperakano aseraka Matiaseane ipu pasimasapo. Tarira aporoane kinusu risiakipoko kenoane Matiase paoraka sarimaraka, tarira aporoane keno su risiapo.