1 Kereso aporo hinamo metakiramo Yasumo aina kepoane koteaka hemakapurafapo. Aporo metamo Yasuaki himu hakásaraka hemakapusuane kakaro wakapuaka hemakapunafonona aporoane perakano asekea repo someraka, “Isuyaki hakasa sarimaraka kurikurihoko peae.” Aíyaka aseane e perakano asekea repo eaki tafatafaraka somehokopo.

2 Arirakano Kereso aporo metakiramo hemakapuraka, “Makata kakayiane isiapo nenapo. Makata kakayia neane siareapo,” aíyaka hemakapurapo. Arirakano Kereso aporo metakiramo hemakapuraka, “Makata kakayia suane isiapo nenafapo.*Makata kakayia kotafe kotiaki kaka marekea maketea aporomo roponapo. Makata kakayia kotafe kotiaki kasasamo aporo metakiramo roponafapo. Some ane 1 Korini 8 á menohoanie. Makata kakayia neane siahoasifareapo,” aíyaka hemakapukua, hemo makata hákasane ipu nenapo. 3 Arirakano makata kakayia nená aporoamo, makata kakayia nanafonona aporoane makefehokopo. Arirakano makata kakayia nanafonona aporomo, makata kakayia nená aporoaki someraka, “Ne watikirareapo,” aihokopo. Makata kakayia nená aporoane Kotimo pasimosapo. 4 Arirakano aporo metamo aporo raipane nómo maropohoane siahoasifareapo. Aporo raipamo koteaka rakirakano soko, hasaka rakirakano soko, e asekea rea wafayamo ipi maroponapo. Aina ayiáka Unihae Yasumo ipi hákasamo isu asekea reasasamo, epo isuaki, re siareapo, aíyaka soko, re siafareapo, aíyaka soko, epo ipi yiamo somehokosapo. Aíyaka somerane nómo ní menafapo. Aporo raipane koteaka rekeasimo Unihae Kotimo e mawakapuhokosapo. Mawakapurakano epo koteaka rakiraka rekeakosapo.

5 Arirakano Keresoa paosa mae namina yia aporo metamo hemakapuraka, “Sere metakira yaposapo. Sere metakira yaposafapo.” Airakano aporo metamo hemakapuraka, “Sere su hakasa yinesapo. Sere meta yaposafapo.” Aíyaka kekepoaka hemakapurakanapo. Kekepoaka hemakapurane siapo. Asiamo repo himumo hemakapurakarakano kaikia kekemahoanie. 6 Keresoa paosa aporo metamo someraka, “Koti kekerehokosa sere one kárapo,” aíyaka hemakapukua somerakano, Kotiane makamafanahoko somerakanapo. Arirakano makata su nena aporomo Unihaeane hemakapukua makárahokosakipoko Kotiaki suseraka makata su nenapo. Arirakano makata kakayia sokoaina aporomo Unihaeane hemakapukua makárahokosakipoko Kotiaki suseraka makata nakosa sokoainapo.

7 Hauaka wo ne hitafe areamo né ní haku rekenafapo. Asiamo né níane makamafanaraka maseseraka aíyaka hemakapukupo. Né hitaferaka areane soko kukusane soko nómo ní asekea rekenafapo. 8 Asiamo hauaka wo re hitafe arisia maiya amo Unihaemo yano motosane makárahoanie. Akura maiya amo soko, Unihaemo yano motosane makárahoasimo hemakapunie. Arirakano isu hitafe arisiane soko, isu akurane soko, Unihae Kotimo ipi hákasa hemakapukua murikimarapo. Asiamo ipi yano motosane makárahoanie.

9 Arirakano Yasu Keresoane isiapo watikisapoko farimaka kusuane maturikia taesapo. Maturikia taesasamo epo aporo hitafe risiane soko, aporo kusuane soko aporo hinamo suane ipi unihaeaka asekea rekenapo. 10 Asiamo repo namina yia maemo ainane asekea hokomaka someraka, “Ne watikirareapo.” Aíyaka marirakano nómo hokomaka somerakanare? Repo metakiramo anapo. Ainane siahoasifareapo. Kotimo ipi hukuarura maiya amo e reakipoko isu su sarimahokosapo. Keseke Kotimo huku arura maiaya amo e reakipoko isu su sarimaraka risikiakosapo. Risikino Kotimo ipi isu suane takekea hukurukusapo. 11 Hukurukusane Kotimo sawia popasane oyapo.

13 Repo aporo metaki hokomaka watikiaka somerane metakarinie. Repo úyaka hemakapunie. Ni maeane Keresomo ikia kara kekemaraka pusuane, etehoasimo makata matasona ayiáka, nómo kirimaraka makata meta rakiakopo. 14 Nōmo Unihae Yasuaki kataka marekea reasasamo epo anoaki tarirakano nōmo úyaka hemakapurakanapo. “Makata nakosa suane kotesapo,” aíyaka nōmo hemakapurakanapo. Asiāne aporo metamo hemakapuraka, “Makata nakosa metane watikisapo,” aíyaka hemakapukua nenakano, ipi yia mawatikirakanapo.

15 Arirakano nómo makata nakosane nenaka rekeno Keresoa paosa aporo mae metamo aseraka someraka, “Epo makata nanafononane anene.” Airakanone nómo ní Keresoa paosa aporo maemo hemakapusuane mokoatikirakanapo. Mokotikinapaka epoko nómo makata nakosane sokoaihoanie. Epo aíyaka somerakanone e terafaka ruraka etesa kakenapo. Akipoko makata nakosane sokoaihoanie. Nómo sokoaihoanafonorakanone nómo ní maeane himu tumurumo hemakapurakanafapo. Asiamo ní maepoko Yasumo farimaka kusuapo. Farimaka kusuasamo nómo ní maeane mokoatikihoane siahoasifareapo. 16 Asiamo nómo makata rakirane hemakapukua, “Ayiáka rakiane siahoasireapo.” Aíyaka hemakapusua nine ní Keresoa paosa aporo maemo someraka, “Ayiáka rakiane siahoasifareapo.” Aihokohoamo nómo ayiáka rakiakopo.

17 Arirakano Kotimo aporo hinamo asekea rerane makata nená ayafapo. Makata fanane oyapo. Repo ereketae hemakapurane soko, auaraka risirane soko, arirakano seseraka risirane Ho Kotesamo karapo. Ayiáka risia aporo hinamoane Kotimo unihaeaka asekea rerapo. 18 Ayiáka Keresoaki hemakapukua rakira aporo hinamoaki Kotimo sesenapo. Arirakano aporo metakiramo asekea someraka, “Aporo hinamoane koteaka ereketaeraka risikinapo,” airapo.

19 Asiasamo Keresoa paosa aporo hinamomo himu hakásaraka hemakapusimo isiapo makata ereketae aina susuane kekemahokosapo. Isu isina suane mawakapuhokosakipoko ereketae aina susuane kekemahokosapo. 20 Arirakano ní Kereso aporo maemo someraka, “Nómo makata ane neane siahoasifareapo,” airakano nómo yaiya nenakano Kotimo mafasiako rakirane matasorakanapo. Asiamo makata nená akipoko Kotimo rakirane matasohokopo. Arirakano Koti ipi hikumisia makata nená suane neane siahoasireapo. Asiane nómo makata anenamo aporo meta eterakanone ane, nómo makata ainane watikisapo. 21 Asiamo nómo makata kakayia soko, waene he soko nenakanone, nómo Keresoa paosa aporo maemo aseraka terafaka ruraka eterakano, nómo makata nenáne sokoaihoanie. Nómo makata meta soko rakirakanone, Keresoa paosa aporo ní maemo asekea, e etehoane siahoasifareapo. Etenapaka nómo ayiáka rakiakopo.

22 Arirakano tau auaraka risira metane oyapo. Nómo ní hemakapusua aeyaka hemakapuraka, “Makata nenáne soko, makata rakirane soko siareapo,” aíyaka hemakapurane Koti tetápo titi menapo. Nómo hemakapusuane Kotimo aserapo. Asiamo Kotimo neaki somehokosapo. Aporo metaki tafatafahokopo. Makata nená soko makata rakira soko takekea hemakapukua, “Siareapo,” aíyaka hemakapukua rakinie. Ayiáka makata rakira maiya amo himumo tau hemakapukua someraka, “Watikirareapo,” aíyaka somehoanafonorakano né seseraka rekeakosapo. 23 Arirakano nómo makata nakosa himu tetáraka hemakapukua nenakanone watikiaka rakiraka ayiakakosapo. Nómo hemakapuraka, “Makata one rakiane watikihoasireapo.” Aisa nine nómo rakirakanone nómo watikiaka rakiraka ayiakakosapo. Nómo makata rakiakosapoko Kotiaki himu hakásaraka hemakapunafonosamo watikiaka rakiraka ayiakakosapo. Himu tetaraka hemakapukua rakirakano, ane nómo watikiaka rakirakanapo.