5
Kisol kamok kiba, kidela uta bom nadiwo kalin sung uta ko.
Kamane kisol kayak kiba, nam weng be kidinamin kala! Kale kiba aket luklak bom kilim kalan aman bom lofidin bom nadiwo kala. Watawo kaleyo bá, kiba abin mafak seng teinámin uyo matam kimal tadokabu kala. Kale kim kisol bo fomsu ade kim ilim bo nuk kinken ta bom wakadit wanesiw. Kale am afung am mewso tadokabu uyo kiba kilim kisol win tabin kutad tiw tiw bom tein bidiw bi anawol teinanusu uyo kilim kisol anawol uluta am afung am dánokabu uyo kukuyam kiba sanung wanin kinim atin kinim mafak, yakei uta kin walayamokabu ade kilim kisol anawol uluta as daung taw kei im mafak dádokabu. Kiba kinim kimi yong wok fakuyámsiw iyo kisol mak kuyamongin banim. Imi weng fakam bela kidiyamal! Kinim kam yong ufek ufek fákan kámusiw im amaneng dákamin uyo un bi Got Kamok atin kitid ami kilung tem uneba ko. Kimi bakan dim kadák teinámin uyo kiba ufek ufek mak iwongin banim, kata ufek ufek seng seng kutad kutad bom kilim aket kidelyamin ki kanabiw, kayo kiba kinim kung mak lu anbidono, kalba taw kilim dam uyo kano ifem si yak as kainin abiw unokabiw. Kiba kinim am ban keimin banim ayo sák bisok dam mafak dákanábiw, kata akal yán mak kidongin banim sák bisok kiwta min anbiyábiw.
Dakbuyámin so Got suksukin so umi sung uta ko.
Nalam nikil fikal kiba, fiyaw dakbu tein sidiw si Kamok Yesus tadak kala. Kale kiba yong falin kinim be atamin, aka yong kai faká tei kudá nadane fiyaw dakbu tein sada si am kidel dánámin so weiw lilín so tadom ufek ufek kidela tabako kalokaba. Kale kiba, kiliwso akol dakbu ken kitid tabe todin kala. Kamok ami tademin atan uyo mewso tadabu kala. Nalam nikil fikal, kiba kakanum ayo kanabawo aka akain bá, kanamokabiw, be Got aka taktaka imudokaba kala kaleyo taktakin kinim ayo mewso tadono, kalba kala. 10 Nalam nikil fikal kiba, lum senin kinim imi Kamok ami win dim weng bakansiw uyo utam aboduwo imi kál funin akfak tem akol dakbu dudew tabe unemin kukuw uyo numi kit kukuyamin keidako. 11 Nuka bakoyam, adikum idak teinámin kinim yakumo, watawo kaleyo bá. Ika kanodin kukuw kudew tabe unsidiw kala. Kiba kinim Yow ami dakbu fibu teinámin kinim sung be kibilim kal keisiw. Aka bán mafak tein badano, yanol Kamok ayo tá dau ufek ufek kidel seng kudawsa umi sung bo kibilim kal keisiw kala. Kaleyo Kamok aka atin aket budunin ade kinkino kalin Kamok ka.
12 Nalam nikil fikal kiba, weng babid makuw bela atamin, kiba ufek ufek kakanum weng sánlawiw namti, Got win so Yesus win so ufek ufek madik im win so imson nuduwo matam kitidanako kalin bá. Kale be kiba afan weng sánlawokabiw namti, bako atin afan kanokamokabino, kalin ade kanodokabuw báyo kal bom keimin kala. Kale beta kanamom nadiwo kiba tad Got ami sok gimin akfak tem tadoliw banim keidin kala.
13 Kilim iwyak tem bewok kinim mak idum kudu be namti, aka Got gán dádawako. Kinim so mak kalfalba namti, dabadáliw Got fuw faktodawak kala. 14 Kinim so mak asanba namti, Got kinim gu gebom gebom gán dáyama tad Got gánla bom Kamok win dim tukul wok kál takádawiwo, 15 Got tabe ilim afan kalin dim kinim asan bada Got gánlabiw kinim be daw kidel dauda Kamok ta bom gadel daudaw nadane kinim alam ban keisa uyo lukuwá kudálawokaba kala. 16 Kaleyo kilim ban keimin uyo akanum dim kumusun teida teida bom ade akanum ami luk Got wis sánla bada wis sánla bada kei bom nadiwo beta matam kasáyámin kala. Kale kinim kidel tatun kinim ami Got wis sánlawin be atin kitid dukum so kayo kinim asanin uyo banimámokaba.
17 Kale kinim Ilaitsa aka kanom nulutaw, kata aka kitid kuw tabe Got wis modaw weiw banimuko, aka afan weiw madák bakan tadongin banimu bi itol alewbino mak ade anung mak keidune, 18 alo Got wis modawane, abid tikin weiw fukadála tabu bakan dim ufek ufek uyo matam besu. 19 Kale nalam nikil fikal kiba, kinim mak afan weng tatun uyo kudá ibik dumam sakaba alo kinim mak ata alo dew maek Got mit tem tada namti, 20 bela fukan dádin kala. Kan ata ban keimin kinim ayo alam ban keiba kalo dew maek Got mit tem tada namti, aka atin kinim ayo ban keimin kail bá takeikudaw fikalanin kalo dew maek dádaw ban keimin seng seng uyo lukuwá banimlawa ko.